தமிழக அமைச்சரவையில் 4 அமைச்சர்களின் இலாகாக்கள் மாற்றம்

தமிழக அமைச்சரவையில்
4 அமைச்சர்களின் இலாகாக்கள் மாற்றம்


சென்னை, ஜன.19-

அமைச்சர்கள் சி.வி.சண்முகம், அக்ரி எஸ்.எஸ்.கிருஷ்ணமூர்த்தி, எஸ்.பி.வேலுமணி, பி.தங்கமணி ஆகிய 4 அமைச்சர்களின் இலாகாக்கள் மாற்றி அமைக்கப்பட்டு உள்ளன. இதற்கான உத்தரவை கவர்னர் கே.ரோசய்யா நேற்று பிறப்பித்தார்.

இதுகுறித்து தமிழக கவர்னர் கே.ரோசய்யா நேற்று வெளியிட்ட உத்தரவில் கூறியிருப்பதாவது:-

முதல்-அமைச்சர் ஜெயலலிதா ஆலோசனையின் பேரில், 4 அமைச்சர்களின் இலாகாக்கள் மாற்றி அமைக்கப்பட்டு உள்ளன. அதன் விவரம் வருமாறு:-

வணிக வரி-பள்ளிக்கல்வி

அமைச்சர் அக்ரி எஸ்.எஸ்.கிருஷ்ணமூர்த்தி இதுவரை கவனித்து வந்த வணிக வரிகள், பத்திரப்பதிவு மற்றும் முத்திரைத்தாள் சட்டம் ஆகிய துறைகள் அமைச்சர் சி.வி.சண்முகத்திற்கு ஒதுக்கப்பட்டு உள்ளது. அவர், வணிக வரிகள், பத்திரப்பதிவு, சட்டம், நீதிமன்றங்கள் மற்றும் சிறைத்துறை அமைச்சர் என்று அழைக்கப்படுவார். பணியாளர் மற்றும் நிர்வாக சீர்திருத்தத் துறை மற்றும் லஞ்சம் ஒழிப்பு ஆகிய துறைகளையும் அமைச்சர் சி.வி.சண்முகம் தொடர்ந்து கவனிப்பார்.

பள்ளிக்கல்வி, தொல்லியல், விளையாட்டு மற்றும் இளைஞர் நலம், தமிழ் ஆட்சிமொழி மற்றும் தமிழ் கலாசாரம் ஆகிய துறைகள் அமைச்சர் அக்ரி எஸ்.எஸ்.கிருஷ்ணமூர்த்திக்கு ஒதுக்கப்பட்டு உள்ளன. அவர், பள்ளிக்கல்வி, விளையாட்டு மற்றும் இளைஞர் நலம் துறை அமைச்சர் என்று அழைக்கப்படுவார்.

தொழில்கள்-வருவாய்த் துறை

அமைச்சர் எஸ்.பி.வேலுமணி கவனித்து வந்த தொழில்கள், இரும்பு கட்டுப்பாடு, சுரங்கம், கனிமவளம் மற்றும் சிறப்பு திட்டங்கள் செயலாக்கம் ஆகிய துறைகள், அமைச்சர் பி.தங்கமணிக்கு ஒதுக்கப்பட்டு உள்ளது. அவர், தொழிற்துறை அமைச்சர் என்று அழைக்கப்படுவார்.

வருவாய், மாவட்ட வருவாய் நிர்வாகம், துணை கலெக்டர்கள், எடையளவு, கடன் நிவாரணம், சீட்டுகள், கம்பெனிகள் பதிவு ஆகிய துறைகள் அமைச்சர் எஸ்.பி.வேலுமணிக்கு ஒதுக்கப்பட்டு இருக்கிறது. இனிமேல் அவர், வருவாய்த் துறை அமைச்சர் என்று அழைக்கப்படுவார்.

இவ்வாறு கவர்னர் வெளியிட்ட உத்தரவில் கூறப்பட்டுள்ளது.


தினத்தந்தி