சோ- வைகோ இரண்டாவது சந்திப்பு, ‘தேர்ட் பார்ட்டி கேரண்டி?’

சோ- வைகோ இரண்டாவது சந்திப்பு, ‘தேர்ட் பார்ட்டி கேரண்டி?’

அ.தி.மு.க. தரப்பில் நாடாளுமன்றத் தேர்தலுக்கான வியூகங்கள் வகுப்பது தொடர்பாக முதல்வர் ஜெயலலிதாவுக்கு டில்லியோடு ‘உறவுப் பாலம்’ ஏற்படுத்த முயலும் சிலர் சில முன்னேற்பாடுகளைச் செய்யத் தொடங்கியிருக்கிறார்கள். இவர்கள் முதல்வருக்கு கூறியுள்ள அட்வைஸ், “உள்ளாட்சித் தேர்தல் சமாச்சாரம் வேறு, நாடாளுமன்றத் தேர்தல் வேறு. இது பெரிய ஜயன்ட். தனியே எதிர்கொள்ள நினைக்காதீர்கள்” என்பதுதானாம்.

அதன் அர்த்தம், கூட்டணி ஒன்றை தயார்ப்படுத்தி வைத்துக் கொள்ளுங்கள்.
இது தொடர்பாக முதல்வருக்கும் அவர்களுக்கும் இடையே சில அலசல்கள் நடந்ததாக தெரிகிறது. கூட்டணி விவகாரம் தொடர்பாக பேசத் தொடங்கியபோதே, விஜயகாந்த் தவிர்த்து, மற்றைய கட்சிகள் பற்றி பேசலாம்” என்றாராம் முதல்வர்.

அதன் பின்னணியில் வேறு ஒரு விஷயம் உள்ளது. அதை மற்றொரு நியூஸ் ஸ்டோரியில் பார்க்கலாம். இப்போது கூட்டணி முன்னேற்பாடு.
பா.ம.க. பல காரணங்களுக்காக அ.தி.மு.க.-வுக்கு மறைமுகமாக நேசக்கரம் நீட்டிக் கொண்டுதான் உள்ளது. அவர்களது நிலைமை அப்படி. தற்போது அவர்களை கண்டு கொள்ளாமல் விட்டாலும், விடாமுயற்சியுடன் கொடி அசைத்துக் கொண்டுதான் இருப்பார்கள்.

“அவர்களுடன் பேசத் தேவையில்லை. கடைசி நிமிடத்தில் கதவைத் திறந்தாலும், சுனாமிபோல வந்து சேர்வார்கள்” என்றாராம் முதல்வரின் ஆலோசகர் ஒருவர் பலத்த சிரிப்புடன்! (முதல்வருக்கும் ஆட்சிக்கும் எதிராக எதுவும் பேச வேண்டாம் என்று டாக்டர் ஐயா கட்டளை இட்டுவிட்டாராம்)
“பா.ஜ.க.-வுடனும், ம.தி.மு.க.-வுடனும் ஓரளவுக்கு இணக்கமாக இருக்கலாம்” என்பதுதான் இன்றைய தேதியில் அ.தி.மு.க.-வின் வியூகம் என்கிறார்கள்.

“வைகோவுடன் எந்த பிரச்னையும் இல்லை. ஆனால், அவர் பிரச்னை கிளப்பாமல் இருக்க வேண்டுமே? ஆட்சிக்கு எதிராகவோ, அல்லது சங்கடம் ஏற்படுத்தும் விதத்திலோ அவரது நடவடிக்கைகள் இருந்தால், அதற்கு ஏற்றபடி நாமும் ரியாக்ட் செய்ய வேண்டியிருக்கும்” என்றாராம் முதல்வர்.
அதற்கு ஒருவிதமான ‘தேர்ட் பார்ட்டி கேரண்டி’ கொடுத்திருப்பதாக ஒரு பேச்சு அடிபடுகின்றது.

“வைகோ உங்களுக்கு தேவையற்ற சங்கடங்கள் எதையும் கொடுக்காமல் பார்த்துக் கொள்வது எனது பொறுப்பு” என்பதுதான் அந்த உத்தரவாதம் என்று தெரிகிறது. இந்த உத்தரவாதம் என்ன அடிப்படையில் கொடுக்கப்பட்டது என்பதுதான் தெரியவில்லை. ஆனால், ஒரு விஷயம் மாத்திரம் தெரியும்.
அது-சசிகலா வெளியேற்றத்தின்பின், பத்திகையாளர் சோ ராமசாமி, வைகோ சந்திப்பு ஒருதடவை நடைபெற்றது. கடந்த வாரம் மற்றொரு சந்திப்பு, இருவருக்கும் பொதுவான இடம் ஒன்றில் நடந்திருப்பதை எமது சோர்ஸ் ஒருவர் உறுதிப்படுத்தினார். அவர் சார்பில் இவரைச் சந்தித்தாரா? இவர் சார்பில் அவரைச் சந்திக்கப் போகிறரரா?

தகவல் பகிர்வு - தமிழ் வாரஇதழ் செய்திகள்...