விடுமுறை எடுப்பதில் கில்லாடியான பெண் அளித்த போலி சான்றிதழ் வேலையை பறித்தது

**சிவா** · **சிவா** Wed Jan 18, 2012 5:20 am

அமெரிக்காவை சேர்ந்த ஜோன் பார்நெட் என்ற பெண் பள்ளிக்கூடம் ஒன்றில் ஊழியராக வேலை செய்தார். இவர் விடுமுறை எடுப்பதில் பெரிய கில்லாடியாக விளங்கினார். கோடை விடுமுறையை குடும்பத்துடன் உல்லாசமாக கழிக்க நினைத்தால் போதும் இதற்காக பல குறுக்கு வழிகளை கையாண்டு விடுமுறை பெற்று வந்தார். பல நாள் திருடன் ஒரு நாள் மாட்டிக் கொள்வான் என்பதற்கு இணங்க ஒரு தடவை அவரது குட்டு அம்பலமாகி விட்டது.

அதாவது ஒருமுறை தனது குழந்தையே இறந்து விட்டதாக கூறி விடுமுறையை எடுத்து அதற்கான இறப்பு சான்றிதழையும் கொடுத்தார். ஆனால் நிர்வாகம் சந்தேகம் அடைந்து விசாரணை நடத்திய போது அது போலி சான்றிதழ் என்றும், 2005-ம் ஆண்டு ஒரு ஆணுக்கு வழங்கப்பட்ட சான்றிதழை திருத்தி மோசடி செய்திருப்பதும் கண்டுபிடிக்கப்பட்டது. இதனை அடுத்து அவரை வேலையில் இருந்து பள்ளி நிர்வாகம் நீக்கியது. அது மட்டுமல்ல மோசடி வழக்கிலும் சிக்கி தற்போது அவர் கோர்ட்டு படிக்கட்டுகளில் ஏறி இறங்குகிறார்.

**சிவா** · **சிவா** Wed Jan 18, 2012 5:21 am

படிக்கட்டு வழியாக காரை ஓட்டிச்சென்றவருக்கு ரூ.85 ஆயிரம் அபராதம்

போக்குவரத்து நெரிசல் என்பது எந்த ஒரு நாட்டிற்கும் விதிவிலக்க அல்ல போலும். சீனாவில் வாஹான் பகுதியை சேர்ந்த ஷேன் என்பவர் விலை உயர்ந்த சொகுசு காரில் சென்று கொண்டிருந்தார். சாலையில் போக்குவரத்து நெரிசலாக இருந்தது. உடனே அவர் குறுக்கு வழியில் செல்ல பயணிகள் நடந்து செல்லும் படிக்கட்டு வழியாக காரை ஓட்டிச்சென்றார். இதனால் படிக்கட்டு வழியாக நடந்து சென்றவர்கள் அலறியடித்தபடி ஓரத்தில் இருந்த தடுப்பு சுவர் மீது ஏறி தப்பினர்.

வாலிபரின் இந்த திடீர் வீரதீர விளையாட்டு நடவடிக்கை பற்றிய புகார் வந்ததும் போலீசார் விரைந்து வந்து அவரை காருடன் மடக்கி பிடித்தனர். இதற்கு அவரோ, போக்குவரத்து நெரிசலாக இருந்ததால் இந்த தந்திரத்தை கையாண்டதாக தெரிவித்தார். ஆனால் போலீசார் அந்த விவாதத்தை ஏற்கவில்லை. அவருக்கு ரூ.85 ஆயிரத்தை அபராதமாக விதித்து பணத்தை செலுத்தி விட்டு காரை எடுத்துச் செல்லும்படி கூறி, அதை பறிமுதல் செய்து கொண்டு சென்று விட்டனர்.