வெந்நீர் ஊற்றியதால் சென்னை அய்யப்ப பக்தர் சாவு

by **சிவா** Wed Jan 18, 2012 5:09 am

சபரிமலை சென்ற சென்னை அய்யப்ப பக்தர்மீது வெந்நீர் ஊற்றியதால் அவர் உடல் வெந்து இறந்தார். அவரது இறுதிச்சடங்கிற்கு வந்தவர்கள் திருவேற்காட்டில் இருந்த கேரள நிதி நிறுவனம் மீது தாக்குதல் நடத்தினர்.

உடல் வெந்தது

சென்னை திருவேற்காட்டை அடுத்த கோலடி திருவேங்கட நகரில் வசித்தவர் சாந்தவேல் (வயது 39). பிளம்பர் மற்றும் பெயிண்டிங் வேலை செய்து வந்தார். இவருக்கு சித்ரா (32) என்ற மனைவியும், தாட்சாயணா (12), சஞ்சனா (9) ஆகிய இரண்டு மகள்களும் உள்ளனர். சாந்தவேல் கடந்த 6-ந் தேதி அய்யப்பனை தரிசிக்க கேரளா சென்றார்.

பம்பையில் குளித்துவிட்டு அருகில் இருந்த டீக் கடையில் அவர் டீ குடித்தபோது அங்கு ஏற்பட்ட வாய்த்தகராறில் டீக்கடைக்காரர் அவர்மீது வெந்நீரை ஊற்றியதால் பலத்த காயமடைந்ததாக கூறப்படுகிறது. இதனால் படுகாயமடைந்த சாந்தவேல் ராயக்கோட்டை அரசு மருத்துவமனையில் சிகிச்சைக்காக சேர்க்கப்பட்டார்.

இதுபற்றி அவரது உறவினர்களுக்கு தகவல் கிடைத்து அவர்கள் அங்கு சென்று சாந்தவேலை கடந்த 13-ந் தேதி சென்னை கொண்டுவந்து கீழ்ப்பாக்கம் அரசு மருத்துவமனையில் சிகிச்சைக்காக சேர்த்தனர். அங்கு சிகிச்சை பலனின்றி சாந்தவேல் நேற்று முன்தினம் இறந்தார். பிரேத பரிசோதனைக்குப்பிறகு நேற்று அவரது வீட்டுக்கு சாந்தவேலின் உடல் கொண்டுவரப்பட்டது.

நிதி நிறுவனம் மீது தாக்குதல்

அவருக்கு அஞ்சலி செலுத்துவதற்காக நாம் தமிழர் கட்சியின் திருவள்ளூர் மாவட்ட செயலாளர் சுந்தரமூர்த்தி தலைமையில் மாநில ஒருங்கிணைப்பாளர் அன்பு தென்னரசன், திருவள்ளூர் மாவட்ட ஒருங்கிணைப்பாளர் சுந்தரமூர்த்தி உள்பட ஆவடி, அம்பத்தூர் பகுதியிலிருந்து நாம் தமிழர் கட்சியை சேர்ந்த சுமார் 20 பேர் நேற்று மதியம் சாந்தவேலின் வீட்டுக்கு வந்தனர். அங்கு அவரது உடலுக்கு அஞ்சலி செலுத்தினார்கள். இந்த நிலையில் சிலர் திருவேற்காடு பஜாரில் சன்னதி தெருவில் உள்ள கேரள நிதி நிறுவனத்தினுள் நுழைந்து அங்கிருந்த டேபிள், சேர், கம்ப்ïட்டர், பீரோ, ஜன்னல் கண்ணாடிகளை அடித்து நொறுக்கினர்.

அப்போது அலுவலகத்திலிருந்த நிர்வாகி காந்தி மற்றும் அலுவலக ஊழியர்கள் 3 பேரும் பயத்தில் அங்கிருந்து வெளியே ஓடிவிட்டனர்.

விசாரணை

இதுபற்றி தகவல் அறிந்ததும் துணை கமிஷனர் மகேஷ்குமார், உதவி கமிஷனர் அய்யப்பன், திருவேற்காடு போலீஸ் இன்ஸ்பெக்டர் பாலசுப்பிரமணியன் மற்றும் போலீசார் சம்பவ இடத்துக்கு சென்று பாதுகாப்பு பணியில் ஈடுபட்டனர். மேலும் அசம்பாவிதங்கள் நடைபெறாமல் இருக்க 200-க்கும் மேற்பட்ட போலீசார் சம்பவ இடத்தில் குவிக்கப்பட்டனர்.

இது தொடர்பாக நாம் தமிழர் கட்சியை சேர்ந்த ஆவடி நகர ஒருங்கிணைப்பாளர் முகிலன், அம்பத்தூர் நகர ஒருங்கிணைப்பாளர் ஜெயபாலன் உள்ளிட்டோரை போலீசார் பிடித்து விசாரித்து வருகின்றனர்.

தினதந்தி