எருது விடும் விழாவில் சீறிப்பாய்ந்த மாடுகள் முட்டியதில் 3 பேர் சாவு

எருது விடும் விழாவில் சீறிப்பாய்ந்த மாடுகள் முட்டி 3 பேர் பரிதாபமாக இறந்தார்கள். வேடிக்கை பார்த்தபோது இந்த பரிதாப சம்பவங்கள் நடந்தன.

மாடு முட்டியது

கிருஷ்ணகிரி அருகே உள்ளது கிட்டம்பட்டியில் எருது விடும் விழா நேற்று நடந்தது. இதற்காக ஏராளமான எருதுகள் விடப்பட்டன. இந்த விழாவை காண்பதற்காக சுற்று வட்டார பகுதியில் இருந்து ஏராளமான மக்கள் வந்திருந்தார்கள்.

அருகில் உள்ள ஊசி கொட்டாயை சேர்ந்த மாது (வயது 37) என்பவரும் இந்த எருது விடும் நிகழ்ச்சியை வேடிக்கை பார்த்தார். அப்போது சீறி பாய்ந்து வந்த ஒரு மாடு மாது மீது முட்டியது. இதில் அவர் ரத்த வெள்ளத்தில் சரிந்தார்.

மற்றொரு சம்பவம்

கிருஷ்ணகிரி மாவட்டம் வேப்பனப்பள்ளி அருகே பெரியமனவாரணப்பள்ளி கிராமத்தில் நேற்று எருது விடும் விழா நடைபெற்றது. இதை பார்ப்பதற்காக கொல்லப்பள்ளி கிராமத்தைச் சேர்ந்த முத்தப்பா என்பவரின் மகன் மணி (வயது 18) வந்திருந்தார். அவர் எருது விடும் விழாவை வேடிக்கை பார்த்துக் கொண்டு இருந்தபோது சீறி பாய்ந்து வந்த எருது ஒன்று மணி மீது கொம்பால் முட்டியது. இதில் மணி ரத்த வெள்ளத்தில் சரிந்தார். உடனே அருகில் இருந்த பொதுமக்கள் அவரை மீட்டு சிகிச்சைக்காக பெங்களூர் மருத்துவமனைக்கு கொண்டு சென்றார்கள். ஆனால் வழியிலேயே மணி பரிதாபமாக இறந்தார்.

வேலூரில் ஒருவர் பலி

வேலூர் அருகே மூஞ்சூர்பட்டு, வடக்கு தெருவைச் சேர்ந்தவர் ராஜா (வயது 25), அரக்கோணத்தை அடுத்த சோளிங்கரில் உள்ள தனியார் நிறுவனம் ஒன்றில் வேலை செய்து வந்த, ராஜா பொங்கல் பண்டிகையை கொண்டாடுவதற்காக விடுமுறையில் ஊருக்கு வந்திருந்தார். நேற்று மூஞ்சூர்பட்டு புதுத்தெருவில் நடைபெற்ற மாடு விடும் திருவிழாவை வேடிக்கை பார்க்க ஆயிரக்கணக்கானவர்கள் கூடியிருந்தனர். ராஜாவும், தன் நண்பர்களுடன் சென்று வேடிக்கை பார்த்துக்கொண்டு இருந்தார்.

திமிரி வந்த மாடு ஒன்று ராஜாவை முட்டித் தள்ளியது. அதனால் நிலைகுலைந்த ராஜா படுகாயங்களுடன் கீழே விழுந்தார். பின்னர் அவர் வேலூர் அடுக்கம்பாறை ஆஸ்பத்திரியில் சிகிச்சைக்காக சேர்க்கப்பட்டார். ஆனால் அங்கு அவர் சிகிச்சை பலனின்றி பரிதாபதமாக செத்தார்.

டிப்ளமோ படித்துள்ள ராஜாவுக்கு இன்னும் திருமணம் ஆகவில்லை என்பது குறிப்பிடத்தக்கது.

தினதந்தி