கோலம் போடும் வீடு!

கோலம் போடும் வீடு!


சென்னை வில்லிவாக்கம், ராமமந்திரம் தெருவில் உள்ள ரேவதி ஜெயக்குமாரை யாருக்கும் தெரிந்திருக்க வாய்ப்பில்லை; ஏன் அந்தப் பகுதியில் உள்ளவர்களுக்கே அதிகமாகத் தெரியாது. ஆனால் "கோலம் போடுற வீடு' என்றால் அந்தப் பகுதி முழுவதும் பிரசித்தம்.


அதென்ன கோலம் போடுற வீடு? எங்க வீட்டிலேயும்தான் கோலம் போடுறோம்...என்ற குழப்பத்திலேயே அவர் வீட்டினுள் நுழைந்தோம். நுழைந்ததும் மாட்டுவண்டியில் ஒரு குடும்பம், பிள்ளை குட்டிகள் சகிதம் நம்மை வரவேற்கிறார் ரேவதி. அன்று அவர் வீட்டின் முன்னால் வரைந்திருந்த கோலத்தில், மாட்டு வண்டியில் வேட்டி, தலைப்பாகை கட்டிய ஒரு குடும்பத்தலைவர், புடவை கட்டிய குடும்பத்தலைவி என்று கிராமிய மணத்தோடு ஒரு குடும்பம் ஜாலியாக சவாரி செய்துகொண்டு இருந்தது.


எப்படி இதுபோன்று கோலங்களை போட வேண்டும் என்று உங்களுக்குத் தோன்றியது என்று ஆரம்பித்தோம். இனி ரேவதி கூறுகிறார்:


""சென்னை அயனாவரத்தில்தான் நாங்கள் குடியிருந்தோம். அப்போது என் அம்மா மார்கழி மாதத்தில் வித்தியாசமான கோலங்களைப் போடுவார். சிறு வயதிலேயே படம் வரையும் பழக்கம் இருந்ததால், எட்டாவது வயதில் இருந்தே கோலங்கள், ஓவியங்களை வாசலில்போட ஆரம்பித்தேன். அப்போது ரொம்ப நுட்பமாக வரைய மாட்டேன். பழகப் பழக என்னுடைய ஓவியங்கள் மெருகேறிக்கொண்டே வந்தன.


திருமணமாகி வில்லிவாக்கத்திற்கு 1993-ம் ஆண்டு வந்தேன். அன்றிலிருந்து சுமார் 18 ஆண்டுகளாக இந்தப் பகுதியில் ஓவியக் கோலங்களைப் போட்டு வருகிறேன். இதற்கென்று பிரத்தியேகமாக எந்தப் பயிற்சியையும் நான் மேற்கொள்ளவில்லை. மார்கழி மாதம் முழுவதும் ஏதாவது புதிய விதமான கோல ஓவியங்களைப் போடுவேன்.


இதுதான் போட வேண்டும் என்று நினைத்துக்கொண்டு போனால் கோலம் போட வராது. அதனால் அங்கே போய் நின்றவுடன் மனதிற்கு என்ன தோன்றுகிறதோ, அல்லது என் உறவினர்கள், குழந்தைகள் என்ன சொல்கிறார்களோ அதையே வரைந்துவிடுவேன். ஓவியத்தை கற்பனை செய்துகொண்டு அப்படியே வரைந்துவிடுவேன். ஏதாவது படத்தைப் பார்த்துப் போடும் வழக்கம் இல்லை.


கூட்டுக் குடும்பமாக வசிப்பதால், என் குடும்பமே எனக்கு உதவி செய்ய வந்துவிடுவார்கள். என் மாமனார்தான் கோலத்திற்குத் தேவையான கலர் பொடிகளை எங்கிருந்தாலும் தேடி வாங்கி தருவார்.
ஓவியத்திற்கு லைட் கலர் கொடுக்க வேண்டுமானால் கோல மாவில் கலர் பொடியை சேர்த்துப் போடுவோம். சற்று டார்க் கலர் வேண்டுமானால் உப்புடன் சேர்த்துப் போடுவோம். இரவு பதினோரு மணிக்கு கோலம் போட ஆரம்பித்தால் விடியற்காலை 2, 3 மணி வரை ஆகும்.


கண்ணன் எனக்குப் பிடித்த கடவுள் என்பதால், கண்ணனின் ஓவியங்கள் அதிகமாக எங்கள் வீட்டு வாசலை அலங்கரிக்கும். மார்கழி மாதத்தில் வரும் வேறு பண்டிகைகளான கிறிஸ்துமஸ், புதுவருடப் பிறப்புக்கும் கூட அந்தப் பண்டிகைகளுக்கு சம்பந்தப்பட்ட ஓவியங்களைக் கோலமாகப் போடுவேன். மேலும் சமுதாய சிந்தனைகள் கொண்ட கருத்தை மையமாகக் கொண்டு ஓவியங்கள் வரைவதுண்டு. ஏதாவது கருத்தை மையமாக வைத்து போடும் ஓவியங்களைப் பெரும்பாலானோர் வரவேற்கிறார்கள். தெரியாத நபர்கள் எல்லாம் வீடு தேடி வந்து பாராட்டி விட்டுச் செல்கிறார்கள். பலர் புகைப்படம் எடுத்துக் கொண்டு போகிறார்கள்.


இவ்வாறு பலர் இந்த ஓவியங்களை ரசிப்பதால், மார்கழி மாதம் தவிர, வாரம் ஒரு முறை இதுபோன்று ஓவியங்களை வரையத் தீர்மானித்துள்ளேன். நிறைய பேர் தங்களுக்கும் கற்றுத்தரும்படி வந்து கேட்பார்கள். நான் கழிவுப் பொருள்களைக் கொண்டு கலைப்பொருள்கள், ஃபேஷன் ஜூவல்லரி, கைவினைப்பொருள்கள், கண்ணாடி ஓவியங்கள், ஆரத்தி தட்டுகள் அலங்காரம் ஆகியவற்றையும் செய்து வருகிறேன். என் வீட்டின் உள் அலங்காரத்திற்கு வர்ணம் பூசியதும் நானே. இவை அனைத்தும் நான் மற்றவர்களைப் பார்த்து, கிரகித்து கற்றுக்கொண்டவைதாம்.


எனக்குத் தெரிந்த அனைத்துக் கலைகளையும் யார் வந்து கேட்டாலும் இலவசமாகவே கற்றுக்கொடுக்கிறேன். கட்டணம் வசூலித்து வகுப்புகள் நடத்தினால் பணத்துக்கு முக்கியத்துவம் கொடுப்பதுபோன்று தோன்றும். கலையை மட்டுமே மற்றவர்களுக்கு பரப்ப வேண்டும் என்ற எண்ணத்தில் இலவசமாவே கற்றுக்கொடுக்கிறேன். யாரென்றே தெரியாத புதிய நபர்கள் பலர் இந்தக் கலைகளை கற்றுக்கொண்டு செல்கிறார்கள்.


சென்னையில் நடைபெற்ற பல்வேறு போட்டிகளில் பங்கேற்று வெற்றி பெற்றுள்ளேன். இளைய தலைமுறையினருக்கு வழிவிட வேண்டும் என்ற எண்ணத்தில் இப்போது போட்டிகளில் பங்கேற்பதில்லை.
டி.வி., சீரியல் போன்றவற்றில் மனம் ஒன்றவில்லை.


அதனால் நேரம் கிடைக்கும்போதெல்லாம் ஸ்ரீமத் பாகவதம் படித்துக்கொண்டிருப்பேன். அதில் கூறப்பட்டிருக்கும் வாசகங்களைக் கூட வாசலில் ஓவியங்களாக வரைவேன்'' என்றார் ரேவதி.


பகிர்வு - தினமணி