ஒரு பறவை விரிக்குது சிறகை

கவினா · கவினா Tue Jan 17, 2012 5:48 pm

விடிஞ்சாக்க கல்யாணம்
வீதியெல்லாம் ஊர்கோலம்
முடிஞ்சாச்சி மச்சானே - இந்த
மூதியோட எதிர்காலம்

பொட்டபுள்ள கண்ணோரம்
பொழுதுக்கும் நீரு வரும் - இந்த
பொட்டலத்த கொண்டுபோக
பொழுசாய காருவரும்.

மருதானி அரைக்காக - இந்த
மடச்சிறுக்கி விரலுக்கு - கொஞ்சம்
அரளிவிதை அரைச்சி தந்தா
அப்படியே முழுங்கிருவேன்.

சீமத்துரை மாப்பிள்ள
சென்னையில இருக்காராம் - ஆனா
மாமன் மகன் நீதானே
மனசெல்லாம் நெறஞ்சிருக்க

வீரபாண்டி திருவிழாவில்
வித்தையெல்லாம் காட்டுனியே-எம்
மாராப்பு சீலக்குள்ளே
மன்மதத்தீ மூட்டுனியே.

ரோசாப்பூ உதட்டோரம்
இளநீரு பறிச்சீயே-இந்த
ராசாத்தி உடம்பெல்லாம்
தேனள்ளி குடிச்சீயே.

அய்யனாரு கோயிலில
அச்சு வெல்லம் தின்னோமே
கொய்யா தோப்பில் களவாடி
கொறத்தனமா நின்னோமே.

ஒத்தரூபா நோட்டுமேல
கையெழுத்து போட்டுத்தந்த-ஆனா
பத்தலயே மச்சானே-இந்த
பாவிமக செலவுக்கு.

முந்தானையில் படுத்தவனே
முடிச்சி மூனு போடனுன்னு
முந்தாநேத்தே முடிவு பண்னேன் -உம்
முடிவுக்காக காத்திருக்கேன்.

மதுரபக்கம் போயிரலாம் - ஒரு
மரக்குடிச பாத்துக்கலாம்
மண்பாண்டம் ஒன்னுரெண்டு
முடிஞ்சாக்க சேத்துக்கலாம்.

ஓடப்பக்கம் ஓரத்தில
ஒத்தையில நின்னிருப்பேன்-என்
உசுர கொண்டு வருவீன்னு
உனக்காக காத்திருப்பேன்.

அசுரன் · அசுரன் Tue Jan 17, 2012 6:53 pm

இவ்வளவு அருமையாக யாரும் கவிதை எழுத முடியாதுன்னே சொல்லுவேன். ஆமாம் மாமனுக்காக காத்திருக்கும் ஒரு மயிலின் மனதை அப்பட்டமாக படம் பிடித்து காட்டியமைக்கு 5 நட்சத்திர பாராட்டுகள் நண்பரே

இந்த பதிவைத் துவங்கியவர் நன்றி கூறியுள்ளார் அசுரன்

கவினா · கவினா Tue Jan 17, 2012 7:00 pm

அசுரன் wrote:இவ்வளவு அருமையாக யாரும் கவிதை எழுத முடியாதுன்னே சொல்லுவேன். ஆமாம் மாமனுக்காக காத்திருக்கும் ஒரு மயிலின் மனதை அப்பட்டமாக படம் பிடித்து காட்டியமைக்கு 5 நட்சத்திர பாராட்டுகள் நண்பரே

உங்கள் பாராட்டு பரவசப்படுத்துகிறது.
உங்கள் வாசிப்புக்கும் பாராட்டுக்கும் நன்றி நண்பரே.

வாஞ்சையுடன் சுந்தரபாண்டி