லாரி கவிழ்ந்து ஆறாக ஓடிய "சரக்கு'பொங்கலுக்கு கிடைத்தது "உற்சாகம்'

by மகா பிரபு Sun Jan 15, 2012 7:15 am

திருச்சி அருகே, மதுபான லோடு ஏற்றி வந்த லாரி கவிழ்ந்து, மது பாட்டில்கள் உடைந்து ஆறாக ஓடியது. பொங்கல் பண்டிகையை கொண்டாட, "ஓசி'யில் கிடைத்த மதுபாட்டில்களை குடிமகன்கள் அள்ளிச் சென்றனர்.முன்னாள் மத்திய அமைச்சர் பாலுவுக்குச் சொந்தமான, மன்னார்குடி அருகிலுள்ள கர்ணாவூர் ஊராட்சியில் செயல்படும், "கோல்டன் வாட்ஸ்' மதுபான தயாரிப்பு நிறுவனத்தில் இருந்து, மதுபான பெட்டிகள் ஏற்றிய லாரி, கடந்த 12ம் தேதி இரவு, சேலம் டாஸ்மாக் குடோனுக்கு சென்று கொண்டிருந்தது. நள்ளிரவு 2.30 மணியளவில், திருச்சி திருவெறும்பூர், "பெல்' அருகே ரவுண்டானாவில் திரும்பும் போது, எதிர்பாராதவிதமாக கவிழ்ந்தது.

லாரியில் இருந்த மதுபாட்டில்கள் கீழே விழுந்து நொறுங்கின. சாலையில் ஆறாக ஓடிய மதுவால், அப்பகுதி முழுவதும், நாற்றம் குடலைப் புரட்டியது. ஒன்றோடு ஒன்றாக கலந்த பெட்டிகள், மதுபாட்டில்கள், சாலை ஓரத்தில் குவிக்கப்பட்டன.அங்கு புதையல் எடுப்பதைப் போல, கண்ணாடி சிதறல் குவியல்களுக்குள், உடையாமல் கிடந்த சில நூறு பாட்டில்களை, "குடி'மகன்கள் கவனமாக தோண்டி எடுத்தனர். பொங்கல் பண்டிகைக்கு கிடைத்த, "ஓசி' பரிசுடன், உற்சாகமாக கிளம்பினர்.விபத்துக்குள்ளான லாரியில், எத்தனை பெட்டிகள் ஏற்றப்பட்டிருந்தன என்பது உறுதியாகத் தெரியவில்லை. போலீசார் வழக்கு பதிந்து விசாரிக்கின்றனர்.

dinamalar லாரி கவிழ்ந்து ஆறாக ஓடிய "சரக்கு'பொங்கலுக்கு கிடைத்தது "உற்சாகம்' 676261