எல்லாமே அரசு திட்டம் தான்: சொல்கிறார் கருணாநிதி

**ந.கார்த்தி** · **ந.கார்த்தி** Sat 14 Jan 2012 - 13:30

சென்னை: "அனைத்தும் அரசின் திட்டங்கள் தான். எந்தத் திட்டத்தையும் தி.மு.க., திட்டம், அ.தி.மு.க., திட்டம் என தனித்துப் பார்ப்பது நல்லதல்ல' என, தி.மு.க., தலைவர் கருணாநிதி தெரிவித்துள்ளார்.

அவரது அறிக்கை: உயிர் காக்கும் உயர் சிகிச்சைக்கான காப்பீட்டுத் திட்டத்தை தி.மு.க., அரசு, ஆண்டுக்கு 517 கோடி ரூபாய் செலவழிக்கும் வகையில் துவங்கியது. இத்திட்டத்தில் 1 கோடியே 34 லட்சம் குடும்பங்கள் பதிவு செய்து, 3 லட்சத்து 3,328 நோயாளிகளுக்கு, 781 கோடியே 40 லட்சம் ரூபாய் செலவில் அறுவை சிகிச்சைகள் செய்யப்பட்டு, அவர்கள் பயனடைந்தனர். தி.மு.க., ஆட்சிப் பொறுப்புக்கு வந்த நேரங்களில், புதிய புதிய திட்டங்களை அறிவித்து நடைமுறைப்படுத்தியது. பிற ஆட்சிக் காலங்களிலும் நிறைவேற்றப்பட்ட நல்ல திட்டங்களையும் சிறப்பாக நடத்தும் முனைப்பில் ஈடுபட்டதற்கு பல சான்றுகளைத் தர முடியும்.

குறிப்பாக, புரட்சித் தலைவர் எம்.ஜி.ஆர்., சத்துணவுத் திட்டம், தி.மு.க., ஆட்சியில் துவங்கப்பட்டதல்ல. எனினும், அ.தி.மு.க., ஆட்சியை விட தி.மு.க., ஆட்சி தான் இத்திட்டத்தை தீவிரமாகச் செயல்படுத்தியது. வாரத்துக்கு ஐந்து முட்டைகள் வழங்கப்பட்டது. அ.தி.மு.க., ஆட்சியில் தொகுப்பூதியத்தில் பணியாற்றி வந்த சத்துணவு சமையலர்கள், உதவியாளர்கள், அங்கன்வாடி உதவியாளர்கள் அனைவருமே தி.மு.க., ஆட்சியில் தான் சிறப்பு ஊதிய விகிதம் பெற்றனர். ஆனால், தி.மு.க., ஆட்சியில் துவங்கப்பட்டது என்பதற்காக, புதிய தலைமைச் செயலகம், அண்ணா நூற்றாண்டு நூலகம், தமிழ்ப் புத்தாண்டு தினம், செம்மொழித் திங்கள் தமிழாய்வு நூலகம் போன்றவற்றை இன்றைய ஆட்சியாளர்கள் ஏற்க மாட்டோம் என அறிவித்திருக்கின்றனர்.

தி.மு.க., ஆட்சியில் துவங்கப்பட்ட திட்டத்துக்கு பதிலாக, வேறொரு பசுமை வீடு வழங்கும் திட்டத்தை அறிவித்திருக்கின்றனர். அதேபோல, மருத்துவக் காப்பீட்டுத் திட்டத்தை மூடிவிட்டு, அதற்கு பதிலாக புதிய திட்டத்தை துவங்கியிருக்கின்றனர். தி.மு.க., ஆட்சியில் 642 நோய்களுக்கு சிகிச்சை அளிக்கப்பட்டதற்கு மாறாக, தற்போது 1,016 நோய்களுக்கு சிகிச்சை அளிக்கப்போகின்றனர் என்றால், அதில் எனக்கு மகிழ்ச்சி தான். நான்கு ஆண்டுகளுக்கு ஒரு லட்சம் ரூபாய் என்றிருந்ததை, நான்கு ஆண்டுகளுக்கு நான்கு லட்சம் ரூபாய் அறிவிக்கப்பட்டுள்ளதற்காக, இந்தத் திட்டத்தை வரவேற்கிறேன். அதேபோல, தி.மு.க., அரசு கொண்டு வந்த மற்ற திட்டங்களையும் பகைமை நோக்கோடு பார்க்காமல், அந்தத் திட்டங்களை எல்லாம், நான் என் சொந்தப் பணத்திலிருந்தோ, கட்சிப் பணத்திலிருந்தோ நிறைவேற்றியதல்ல; அதுவும் அரசின் பணம் தான் என்பதை மனதில் கொண்டு சற்று பரந்த நோக்கத்தோடு செயல்பட வேண்டும் என எதிர்பார்க்கிறேன்; செயல்படுவார் என்று நம்புகிறேன். அனைத்தும் அரசின் திட்டங்கள் தான். எந்தத் திட்டத்தையும் தி.மு.க., திட்டம், அ.தி.மு.க., திட்டம் என தனித்துப் பார்ப்பது நல்லதல்ல. இவ்வாறு கருணாநிதி தெரிவித்துள்ளார்.
தினமலர்

**உமா** · **உமா** Sat 14 Jan 2012 - 13:37

அவர் சொல்வதும் சரி தான்...சற்று யோசிக்க வேண்டிய விடயம்.
ஆனால் தமிழ் புத்தாண்டை மாற்றியது தான் சற்று ஏற்றுக்கொள்ள முடியல...

உங்களின் ஆட்சியில் ஏற்படும் பிரச்சனையிலே நாங்க 5 வருடத்திர்க்கு ஒரு முறை எங்கள் வாழ்க்கை முறையை மாற்றுகிறோம்.. எங்களுக்கு எது நல்லது என்று பார்த்து செய்தால் போதும்..

அருமையிருக்கு