ஏன் சிங்கம் தனது குட்டியைத் தானே தின்கிறது?

by **சிவா** Wed Jan 11, 2012 5:19 pm

First topic message reminder :

புலி, சிங்கம் இவைகள் தன் குட்டிகளைத் தானே கொன்று தின்றுவிடுகிறது. ஏன் இவ்வாறு நிகழ்கிறது. தன் குட்டியைத் தின்னுமளவிற்கு இவைகள் கோரமானவைகளா?

இல்லையென்றுதான் கூற வேண்டும். தினமும் பல மிருகங்களைக் கொடூரமான முறையில் கொண்ரு தின்றாலும் இந்த மிருகங்கள் தன் குட்டியின் மீது மிகுந்த பாசத்துடன் தான் உள்ளது. சரி விஷயத்திற்கு வருவோம். ஏன் குட்டிகளைக் கொன்று தின்கிறது? இதில் சிறு திருத்தம். கொன்று தின்பதில்லை, கொல்லப்பட்ட அல்லது இறந்துவிட்ட குட்டிகளைத் தின்றுவிடுகிறது.

சிங்கத்தின் குட்டிகள் இறப்பதற்குக் காரணம்?

சிங்கங்கள் கூட்டமாக வாழும் தன்மை கொண்டது. இந்தக் கூட்டத்திற்கு ஒரு தலைவராக ஆண் சிங்கம் ஒன்று இருக்கும். இந்த ஆண் சிங்கம் மட்டுமே மற்ற பெண் சிங்கங்களுடன் உறவு வைத்துக்கொள்ளும் தகுதி பெற்றது. எனவே அந்தக் கூட்டத்திலுள்ள குட்டிகள் அனைத்துமே தலைவர் ஆண் சிங்கத்தின் சந்ததிகள்தான். ஆனால் அந்தத் தலைமைக்கு அடிக்கடி மோதல்கள் நடக்கும். கூட்டத்திலுள்ள வலிமையான ஆண் சிங்கங்கள் அல்லது வெளியிலிருந்து வரும் ஆண் சிங்கங்கள் தற்பொழுது தலைவராக இருக்கும் ஆண்சிங்கத்துடன் சண்டையிடும். எப்பொழுது வேறொரு ஆண் சிங்கம் இந்தப் பதவிச் சண்டையில் வெற்றி பெறுகிறதோ அந்த நிமிடமே ஏற்கனவே தலைமைப் பதவியிலுள்ள ஆண் சிங்கம் விரட்டப்பட்டுவிடும். அதற்கு மேல் அந்தச் சிங்கத்தின் நிலை மரணத்தை நோக்கித்தான் என்பதில் சந்தேகமில்லை. ஏனெனில் இந்தச் சிங்கம் வேறு எந்தச் சிங்கக் கூட்டத் தலைவனையும் வெற்றி கொண்டு வேறொரு தலைமைப் பதவியை அடைய முடியாது. தனியாக வேட்டையாடவும் முடியாது. பசியால் சில வாரங்களில் உயிரிழக்கும்.

இப்பொழுது புதிதாக தலைமையேற்றுள்ள ஆண் சிங்கத்தின் முதல் பணி என்ன தெரியுமா? பழைய தலைவருக்குப் பிறந்துள்ள சிறிய குட்டிகளைத் தாக்கி சாகடிப்பதுதான். இதற்குக் காரணம் அதன் அதிகாரத்தை அந்தக் கூட்டத்தில் நிலைநிறுத்தவும், பழைய தலைவரின் வாரிசுகளை அழிக்கவும், இப்பொழுது உள்ள பெண் சிங்கங்கள் குட்டி இருந்தால் ஆண் சிங்கத்திற்கு உடன்படாது என்பதாலும் குட்டிகளைக் கொன்று வீசி விடுகிறது. இந்தக் குட்டிகளை பழைய தலைவர் ஆண் சிங்கம் அதாவது அக்குட்டிகளின் தந்தை தூக்கிச் சென்று தின்றுவிடும். இது தனது குட்டிகளை வேறொரு மிருகம் தின்பதை இந்தச் சிங்க இனம் விரும்பாததுதான் காரணம் என ஆராய்ச்சியாளர்கள் கூறுகிறார்கள்.

அந்தச் சிங்கம் கொல்லப்பட்ட தனது குட்டிகளைத் தின்னும் பொழுது அதன் கர்ஜனை பல கிமீ தூரத்திற்குக் கேட்குமாம். அந்த அளவுக் கோபமுடன் அந்தச் சிங்கம் அப்பொழுது காணப்படும்.

இதே முறைதான் குரங்குக் கூட்டங்களிலும் நிலவுகிறது. ஆனால் புலி இனத்தின் நிலை வேறு. அதைப் பற்றி அடுத்து எழுதுகிறேன்!