ஆனந்தப் பசு

**ரா.ரா3275** · **ரா.ரா3275** Wed Jan 11, 2012 3:40 pm

இப்போது(ம்)கூட
எப்போதாவது நான்
ஆழ்ந்திருக்கும்போது
வலிக்காமல் அறையப்பட
விழித்துக் கொள்கிறேன்
உன்னோடு பேச
உத்திரவிடப்படுகிறேன்

இளமை மலராத
அந்த வயதிலேயே
என்னை நீ இளக்கியது

இலைகளில்
நம்மிருவரின் பெயரையும்
நான் எழுதியவுடன்
வெட்கப்பட்டு அது
நிறம் மாறியது

தோழிகளோடு
மழைக்கு நீ ஒதுங்க
அந்த ஒழுகும் பந்தலின் கீழ்
நானும் ஒதுங்கியது

தினமும் காலையில்
கொடிக்கம்பம் முன் கூடும்போது
உன்முகம் பார்க்கும்படி
இடம் தேர்ந்து நின்றது

உனக்கே தெரியாமல்
உன் எழுத்துக்களைப் பார்த்து
இன்புற்றது

'அந்த' ஒரு வாரம்
நீ வராததால்
உன் வகுப்பில் வெற்றிடம் பார்த்தது

ஆண்டு விழாவில்
'அம்மாடிச் சின்னப்பொண்ணு'ப்
பாடலுக்கு
நீ(யும்) ஆடிய நடனம்

உன்னிடம் பேச
காரணம் தேடித் தேடி
நானே காணாமற்போனது

இது மட்டும்தானா?
இன்னும் இன்னும்...

உன்னிடம் திறமை இல்லையென்று
தெரிந்தவர்கள் சொன்னதுண்டு
அதனாலென்ன?

உனக்கிருக்கும்
சந்தனக் குங்கும அழகு
காதல் ததும்பும்
உன் முகம்
கவிதை சொல்லும்
உன் பெயர்
எனக்குப் பிடித்த
உன் முழங்கைத் தழும்பு
என
இன்னும் இன்னும்...

உன் நினைவு வரும்போதெல்லாம்
கால்களை
விரித்தும் குறுக்கியும்
மாற்றி மாற்றி வைக்கும்
காம்பு சுரந்த பசுவாய்...

நான் நான் நான்!