காத்தான்குடி நல்லாட்சிக்கான மக்கள் இயக்கம் வறிய மாணவர்களுக்கு அப்பியாசப் புத்தகங்களை வழங்கியது

காத்தான்குடி நல்லாட்சிக்கான மக்கள் இயக்கம் 2012ம் ஆண்டிற்கான இலவச அப்பியாசக் கொப்பிகள் வழங்கும் திட்டத்தின் அங்குரார்ப்பண நிகழ்வு கடந்த 27.12.2011 செவ்வாய்க்கிழமை காலை 8.00 மணியளவில் நடைபெற்றது.

காத்தான்குடி தேசிய பாடசாலையின் பரீத் மண்டபத்தில் நடைபெற்ற இந்நிகழ்விற்கு நல்லாட்சிக்கான மக்கள் இயக்கத்தின் சூறாசபை அமீர் எம்.பி.எம். பிர்தெளஸ் நளீமி அவர்கள் தலைமை தங்கினார்.

இந்நிகழ்வில் காத்தான்குடி பொலிஸ் நிலைய பொறுப்பதிகாரி யு.எம். அபேசிங்க சிறப்பு அதிதியாக கலந்து கொண்டதுடன், விசேட அதிதியாக போக்குவரத்து அமைச்சின் விசேட உதவி செயலாளர் ஆரிபா ஜபருல்லாஹ் அவர்களும் கலந்து கொண்டார்கள். அதேவேளை நல்லாட்சிக்கான மக்கள் இயக்கத்தின் கல்வி அபிவிருத்திக்குழுவின் தலைவரும் சூறாசபை உறுப்பினருமான வித்யாகீர்த்தி அமீரலி ஆசிரியர், சூறாசபை உறுப்பினர்களும் நகரசபை உறுப்பினர்களுமான பொறியியலாளர் எம்.எம். அப்துர் ரஹ்மான், அல்ஹாஜ். ஏ.ஜீ.எம். ஹாறூன் ஆகியோர் உட்பட சூறாசபை உறுப்பினர்கள், அங்கத்தவர்கள் உட்பட பொதுமக்கள், பாடசாலை மாணவர்கள், அவர்களது பெற்றோர்கள் பலரும் கலந்துகொண்டனர்.

இதன்போது காத்தான்குடி மற்றும் அதனை அண்டியுள்ள கிராமங்களைச் சேர்ந்த முஸ்லிம் மற்றும் தமிழ் மாணவர்களுக்கு இலவச அப்பியாசக் கொப்பிகள் வழங்கி வைக்கப்பட்டன.

நல்லாட்சிக்கான மக்கள் இயக்கத்தின் மூலம் பாடசாலை செல்லும் வறிய மாணவர்களின் நலங்கருதி வருடா வருடம் வழங்கப்பட்டுவரும் இந்த அப்பியாசக் கொப்பிகள் இவ்வருடம் 8000 தமிழ், சிங்கள மற்றும் முஸ்லிம் மாணவர்களுக்கு வழங்கி வைக்கப்பட்டமை குறிப்பிடத்தக்கது.

காத்தான்குடி மற்றும் அதனை அண்டிய தமிழ் பகுதிகளிலும் ஏறாவூர், ஓட்டமாவடி மற்றும் மூதூர் போன்ற பகுதிகளிலுள்ள பாடசாலைகளில் கல்வி கற்றுவரும் வறிய நிலையிலுள்ள தெரிவு செய்யப்பட்ட மாணவர்களுக்கு இந்த அப்பியாசப் புத்தகங்கள் வழங்கி வைக்கப்பட்டன.