தினமும் ஆவின் பால் விற்பனையை 60,000 லிட்டர் அதிகரிக்க முடிவு

சென்னை : சென்னையில் ஆவின் பால் விற்பனையை தினமும் 60,000 லிட்டர் அதிகரிக்க, முகவர்களுடன் அதிகாரிகள் ஆலோசனை நடத்தினர்.
சென்னையில் ஆவின் பால் விற்பனையை அதிகரிக்க, கடந்த சனிக்கிழமை மற்றும் திங்கள்கிழமை ஆகிய 2 நாட்கள், சோழிங்கநல்லூர் ஆவின் அலுவலகத்தில் முகவர்களுடன் உயர் அதிகாரிகள் ஆலோசனை நடத்தினர். இதில், ஆவின் பால் விற்பனையாளர்கள் மற்றும் ஆவின் பார்லர் நடத்துபவர்கள் என சுமார் 80க்கும் மேற்பட்டோர் கலந்து கொண்டனர்.

சென்னையில் நாள் ஒன்றுக்கு சுமார் 10 லட்சத்து 40 ஆயிரம் லிட்டர் ஆவின் பால் விற்கப்படுகிறது. இதை 11 லட்சம் லிட்டராக அதிகரிக்க அரசு முடிவு செய்துள்ளது. இதற்கான ஆலோசனை கூட்டத்தில் முகவர்கள் தரப்பில் தெரிவிக்கப்பட்ட கருத்துகள்: ஆவின் பால் விற்பனைக்கு வழங்கப்படும் கமிஷன் குறைவாக இருப்பதால், அதை உயர்த்தி வழங்க வேண்டும். ஓட்டை விழுந்த பால் பாக்கெட்களை திரும்ப எடுக்கவேண்டும்; அல்லது அதற்கு பதில் வேறு பாக்கெட்களை வழங்க வேண்டும். ஆவின் ஐஸ் கிரீம் பாக்கெட்கள் நசுங்காத வகையிலும், சில நேரங்களில் காலி சாக்கோபார் பாக்சுகள், ஐஸ்கிரீம் கப் இருப்பதை தடுக்க வேண்டும்.

ஆவின் நெய் மற்றும் வெண்ணெய் அதிக அளவில் வழங்க வேண்டும். ஆவின் பொருட்களை வாங்க வரும் நுகர்வோருக்கு இல்லை என்று சொல்லாத அளவுக்கு எல்லா பொருட்களையும் வழங்கவேண்டும் என்பது உள்ளிட்ட பல்வேறு ஆலோசனைகளை முகவர்கள் தெரிவித்தனர். ஆவின் எம்.டி., ஜே.எம்.டி., ஏ.ஜி.எம் (உற்பத்தி) ஆகியோரின் செல்போன் எண்கள் முகவர்களுக்கு வழங்கப்பட்டது.

ஆவின் விநியோகத்தில் ஏற்படும் தாமதம், பொருட்களில் ஏற்படும் குறைபாடுகள் குறித்து, உடனுக்குடன் தெரிவிக்குமாறு முகவர்களிடம் அதிகாரிகள் கேட்டுக் கொண்டனர். இப்போது வழங்கப்படும் கமிஷனே தொடர்ந்து வழங்கப்படும்; கமிஷன் உயர்வுக்கு இப்போது வாய்ப்பில்லை என அதிகாரிகள் தரப்பில் தெரிவிக்கப்பட்டது. இதுதொடர்பாக, தங்களின் அதிருப் தியை முகவர்கள் அதிகாரிகளிடம் தெரிவித்தனர்.