வறுமை தள்ளியது விபச்சார பாதையில்...: நேபாளம் டூ வத்தலக்குண்டு: பிரீத்தியின் கதை

வறுமையின் கொடுமையால் பாலியல் கொடுமைக்கு ஆளானார் நேபாள பெண் "பிரீத்தி'. திண்டுக்கல் மாவட்டத்தில் கைதாகி ஒருவழியாக அந்த தொழிலில் இருந்து மீட்கப்பட்டார். நடந்தது இது தான்... திண்டுக்கல் மாவட்டம் வத்தலக் குண்டில் ஜூலை இறுதியில் போலீசார் நடத்திய சோதனையில் லாட்ஜில் விபச்சாரத்தில் ஈடுபட்ட ஒரு கும்பல் கையும் களவுமாக சிக்கியது. நெல்லூர் ராஜேஸ்வரி, சேலம் ஹேமா, ஈரோடு திவ்யா, பெங்களூரு சரிதா மற்றும் பத்மா, கோல்கட்டாவை சேர்ந்த பிரீத்தி மற்றும் விபச்சார புரோக்கர்களை போலீசார் கைது செய்தனர். இவர்கள் அனைவரும் நிலக்கோட்டை மாஜிஸ்திரேட் கோர்ட்டில் ஆஜர்படுத்தப்பட்டு ரிமாண்டில் வைக்கப்பட்டனர்.


மறுவாழ்வளிக்க முயற்சி: பொதுவாக விபச்சார வழக்குகளில் கைதாகும் பெண்கள் கோர்ட்டில் ஆஜர்படுத்தப்படுவர். அவர்கள் சார்பில் புரோக்கர்களே அபராத தொகையை கட்டுவர். மீண்டும் அந்த பெண்கள் அந்த தொழிலிலேயே இறக்கி விடப்படுவர். அபராத தொகைக்காக கூடுதலாக தொழில் செய்ய வேண்டிய அவலமும் உண்டு. அத்தகைய நிலை ஏற்படாமல், அவர்களுக்கு மறுவாழ்வு அளிக்கும் வகையில் அப்பெண்களை காப்பகத்தில் வைத்திருக்கும்படி ஐகோர்ட் நீதிபதி ஜி.எம்.அக்பர் அலி உத்தரவிட்டார். விபச்சார வழக்கில் சிக்கியவர்களுக்கு மறுவாழ்வளிக்கும் தன்னார்வ தொண்டு நிறுவனங்களான "போர்டு' நிர்வாக அறங்காவலர் சையதுஅகமது, "டீப்சி' செயலாளர் புஷ்பம் ஆகியோர் பொறுப்பில் ஒப்படைக்கப்பட்டனர்.


சுவர் ஏறி தப்பிய பெண்கள்: ஆனாலும் காப்பகத்தில் தங்கியிருந்த நிலையில் பிரீத்தியை(22) தவிர மற்ற பெண்கள் சுவர் ஏறி குதித்து தப்பி விட்டனர். விபச்சார புரோக்கர்கள் தலையிட்டு அவர்களை மீட்டு சென்றிருக்கலாம் என போலீசார் சந்தேகிக்கின்றனர். பிரீத்தி குறித்து காத்மாண்டுவில் உள்ள "மைதி நோபாள்' என்ற நிறுவனத்தினருக்கு சையது அகமது தகவல் கொடுத்துள்ளார். அந்நிறுவனத்தை நடத்தும் அனுராதா, காத்மாண்டுவில் பணிபுரியும் பிரீத்தியின் சகோதரர் பீர்பகதூர் தமாங்கை கண்டுபிடித்து தகவல் கொடுத்தார். பிறகு பீர்பகதூர் தமாங்கும் நிலக்கோட்டை வந்து தங்கையை மீட்டு சென்றார்.


புரோக்கர்களிடம் சிக்கிய பரிதாபம்: இந்த தொழிலுக்கு இழுத்துவரப்பட்ட பிரீத்தியின் கதை மிக சோகமானது. நேபாளத்தில் மகன்கல் என்ற குக்கிராமத்தை சேர்ந்தவர். வறுமையில் வாடும் பெற்றோருக்கு பீரித்தியும், அவரது சகோதரர் பீர் பகதூர் தான் ஆதரவு. அவரது சகோதரர் காத்மாண்டுவில் தனியார் நிறுவனத்தில் உதவியாளராக பணிபுரிகிறார். அவர்களது குடும்ப சூழ்நிலையை தெரிந்து கொண்ட சுபாங் தமாங் என்பவர் சில ஆயிரங்களை கொடுத்து கோல்கட்டாவில் வேலை வாங்கி தருவதாக கூறி, பிரீத்தியை அழைத்து சென்றுள்ளார். அவரை விபச்சார புரோக்கர்களிடம் சில லட்சங்களை பெற்று கொண்டு விற்றுள்ளார். வேறு வழியில்லாமல் இதில் இறக்கி விடப்பட்ட பிரீத்திக்கு இதுவே தொழிலாக போய் விட்டது. தொழிலில் கிடைக்கும் தொகையை புரோக்கர்கள் பறித்து கொண்டு சாப்பாட்டுக்கும், துணிமணி வாங்கவும் மட்டுமே பணம் கொடுத்துள்ளனர்.


விழிப்புணர்வு தேவை: போர்டு நிர்வாக அறங்காவலர் சையது அகமது, ""இது போன்று எத்தனையோ பெண்கள் இன்னும் தொழிலில் உள்ளனர். பெற்றோரிடம் போதிய விழிப்புணர்வு இல்லாததே இதற்கு காரணமாகும். குழந்தைகளை வேலைக்கு அனுப்பும் பெற்றோர்கள், அவர் எங்குள்ளார், எப்படியுள்ளார்? என கண்காணிப்பதில்லை. இதனால் புரோக்கர்களின் கைகளில் சிக்கி, அவர்கள் மாநிலங்கள் விட்டு மாநிலங்களுக்கு அனுப்பி வைக்கப்படுகின்றனர். மேலும், விபச்சார வழக்குகளில் சிக்கும் பெண்களை கோர்ட்டில் ஆஜர்படுத்தி, அபராதம் செலுத்த வைப்பதுடன் கடமை முடிந்ததாக போலீசார் ஒதுங்கி கொள்ள கூடாது. அவர்களது பெற்றோர்களை கண்டறிந்து அவர்களிடம் ஒப்படைத்து, மீண்டும் தொழிலில் இறங்காத அளவுக்கு நடவடிக்கை எடுக்க வேண்டும். இத்தொழிலில் தள்ளப்படும் பெண்களும், இதுகுறித்து விழிப்புணர்வு பெற்று திருந்த வேண்டும். அதுவரை இத்தகைய அவலங்களை தடுக்க முடியாது,'' என்றார்.

பெண்களுக்கு இது சாபம் ..போலும் ..