முதுகலை மருத்துவ படிப்பு நுழைவுத் தேர்வில் மெகா மோசடி

புதுடில்லி : டில்லியில் உள்ள அகில இந்திய மருத்துவ அறிவியல் மையத்தில் (எய்ம்ஸ்) நடந்த நுழைவுத் தேர்வில், மோசடி செய்தது தொடர்பாக டாக்டர் மற்றும் இரண்டு எம்.பி.ஏ., மாணவர்கள் உள்ளிட்ட ஐந்து பேர் கைது செய்யப்பட்டுள்ளனர்.

நாடு முழுவதும் உள்ள மருத்துவக் கல்லூரிகளில் 50 சதவீத முதுகலை படிப்புகளுக்கான இடங்களை நிரப்ப, எய்ம்ஸ் மூலம் 156 மையங்களில் நேற்று முன்தினம் நுழைவுத் தேர்வு நடந்தது. டில்லியில் உள்ள பிரகதி மைதானத்தில், இந்த நுழைவுத் தேர்வுக்கான வினாத்தாள் வெளியானதாக செய்தி கேள்விப்பட்டு போலீசார், உஜ்ஜெயின் மருத்துவக் கல்லூரி மாணவர் மொகித் சவுத்ரி என்பவரை கைது செய்தனர். இவரைத் தொடர்ந்து டாக்டர் அமித் புனியா, 23, எம்.பி.ஏ., மாணவர்கள் கபில் குமார், 27, கிரிஷன் பிரதாப் சிங், 27, பீஷ்மா சிங், 27, ஆகியோர் கைது செய்யப்பட்டனர்.

மோசடி விவரம் : இதுகுறித்து டில்லி குற்றப்பிரிவு துணை கமிஷனர் அசோக்சந்த் கூறியதாவது: முதுநிலை படிக்க விரும்பும் எம்.பி.பி.எஸ்., மாணவர்களை குறி வைத்து இந்த கும்பல் செயல்பட்டுள்ளது. இதற்காக எம்.பி.ஏ., மாணவர்கள் கபில் குமார், பிரதாப் சிங் ஆகியோரை எம்.பி.பி.எஸ்., படித்த மாணவர்களைப் போல விண்ணப்பிக்கச் செய்து, பதிவு எண் பெற்ற பின், "ஹால் டிக்கெட்' பெற்று, நொய்டாவில் உள்ள தேர்வுக் கூடத்துக்கு அனுப்பியுள்ளனர்.

கேமராக்கள் மூலம் சதி : தேர்வு துவங்கியதும் அதிநவீன கேமராக்கள் கொண்ட மொபைல் போன் மூலம் வினாத்தாள்களை படம் எடுத்து, இ-மெயில் மூலம் இருவரும், பிரகதி மைதானத்தில் உள்ள மொகித் சவுத்ரிக்கு அனுப்பியுள்ளனர். அங்கு பட்டதாரியான பீஷ்மா சிங் உதவியுடன் வினாத்தாள்களை டவுண்லோடு செய்து, குறுகிய காலத்தில் அந்த வினாக்களுக்குரிய விடைகள், "ப்ளுடூத்' மூலம் சொல்லப்பட்டுள்ளன.

எம்.பி.ஏ., மாணவர்கள் தங்கள் மொபைல் போனை சட்டையில் மறைத்து வைத்து, வினாத்தாள்களை படம் எடுத்து அனுப்பியுள்ளனர். இதே போல விடைகளை பெறுவோரும் தங்கள் சட்டை பையில் மொபைல் போனை மறைத்து வைத்துக் கொண்டு, மைக்ரோ போன் மூலம் விடைகளைப் பெற்று தேர்வு எழுதியுள்ளனர். தேர்வு துவங்கிய அரை மணி நேரத்திற்குள் வினாத்தாள் வெளியாகிவிட்டது.

ரூ.35 லட்சம் வசூல் : விடைகளை வினியோகிப்பதற்காக ஒவ்வொரு எம்.பி.பி.எஸ்., மாணவரிடமிருந்தும், 25 முதல் 35 லட்சம் ரூபாய் வரை வசூலிக்கப்பட இருந்தது. முதுநிலை படிப்பில் சீட் கிடைத்த பிறகு பணம் தந்தால் போதும் என்ற அடிப்படையில், இந்த சதித் திட்டங்கள் அரங்கேறியுள்ளன. விடைகளை பயன்படுத்திய மாணவர்கள் ஏமாற்றி விடுவர் என்பதால், இந்த மோசடிகாரர்கள், அந்த மாணவர்களின் ஒரிஜினல் சான்றிதழ்களை தங்கள் வசம் வாங்கி வைத்துள்ளனர்.

ஒரிஜினலுடன் ஒப்பீடு : பிரகதி மைதானத்தில் மொகித் சவுத்ரியை கைது செய்த போலீசார், அவரிடமிருந்த வினாத்தாள்களை பறிமுதல் செய்து, எய்ம்ஸ் மையத்துக்கு சென்று, அங்கிருந்த ஒரிஜினல் வினாத்தாள்களுடன் ஒப்பிட்டு பரிசோதனை நடத்தியுள்ளனர். இரண்டு வினாத்தாள்களும் ஒத்து போகவே, தேர்வு மையத்துக்குச் சென்ற போலீசார் அங்கிருந்த எம்.பி.ஏ., மாணவர்களை கைது செய்தனர்.

கைது செய்யப்பட்டுள்ள கபில் குமார், ஜாமியாமிலியா இஸ்லாமியா பல்கலைக் கழகத்தில் பட்டம் முடித்தவர். அங்கு பிஎச்.டி., படிக்க திட்டமிட்டிருந்தார். பீஷ்மா சிங், மீரட்டில் உள்ள ஐ.எம்.டி.,யில் எம்.ஏ., பொது நிர்வாகவியல் பட்டம் பெற்றவர். எனினும், இந்த மோசடியில் எய்ம்ஸ் அதிகாரிகள் யாரும் சம்பந்தப்படவில்லை. இவ்வாறு அசோக்சந்த் கூறினார்.

தினமலர்

மேக அருமையான திட்டம்