கொளத்தூரில் மனைவியை குத்தி கொன்ற கணவர்

கொளத்தூரில் மனைவியை குத்தி கொன்ற கணவர்: நடத்தையில் சந்தேகம் அடைந்ததால் ஆத்திரம்


சென்னை கொளத்தூர் முத்துமாரியம்மன் கோவில் உமாமகேஸ்வரி நகரைச் சேர்ந்தவர் மூர்த்தி (38). இவரது மனைவி ரமணி (35). இருவரும் காதலித்து திருமணம் செய்து கொண்டனர். கணேசன் (13), லோகேஷ் (8) ஆகிய இரண்டு மகன்கள் உள்ளனர். சென்னை மாநகராட்சியில் துப்புரவு ஊழியராக வேலை பார்த்த மூர்த்திக்கு கடந்த 3 வருடத்துக்கு முன்பு பக்கவாதம் நோய் பாதித்தது. இதில் அவரது கை, கால்கள் செயல் இழந்தன.

இதனால் அவர் வேலையை இழந்து வீட்டில் இருந்தார். பின்னர் தனியார் கம்பெனியில் கூலி வேலைக்கு சென்றார். ரமணி ஜவுளி கம்பெனி ஒன்றில் வேலை பார்த்து வந்தார். ரமணிக்கும், அவரது வீட்டிற்கு அருகில் வசிக்கும் கொத்தனார் ஒருவருக்கும் இடையே கள்ளத் தொடர்பு ஏற்பட்டதாக கூறப்படுகிறது.

அவரது நடத்தையில் சந்தேகம் அடைந்த மூர்த்தி குடித்து விட்டு வந்து தகராறு செய்தார். கை, கால்கள் செயல் இழந்து வேலைக்கு போகாததால் தன்னை மனைவி மதிக்கவில்லை என்று மூர்த்தி கருதினார். இதனால் மனம் வேதனை அடைந்தார். கள்ளக்காதலனுடன் தொடர்பு வைத்திருந்ததை மூர்த்தி கண்டித்தும் அவர் கேட்கவில்லை. இதனால் அவரை கொல்ல திட்டமிட்டார்.

நேற்று இரவு ரமணி வீட்டில் தூங்கி கொண்டிருந்தார். இந்த தருணத்தை பயன்படுத்த மூர்த்தி முடிவு செய்தார். அயர்ந்து தூங்கி கொண்டிருந்த அவர் அருகில் சென்று கத்தியால் சரமாரியாக கழுத்தில் குத்தினார். இதனால் ரமணி அலறினார். அவரது சத்தம் கேட்டு இளைய மகன் லோகேஷ் விழித்தான். அவனை அடித்து தூங்க வைத்தார்.

கத்திக்குத்தில் ரமணி ரத்த வெள்ளத்தில் அதே இடத்தில் பிணமானார். மனைவியை குத்திக் கொன்று ஆத்திரத்தை தீர்த்த மூர்த்தி அதிகாலை 4 மணிக்கு ராஜமங்கலம் போலீஸ் நிலையத்தில் சரண் அடைந்தார். ரத்த கரையுடன் காணப்பட்ட அவர் நடந்ததை போலீசில் வாக்குமூலமாக கூறினார். போலீசார் அதை பதிவு செய்தனர். மூர்த்தி கூறியதாவது:-

நான் நோயால் பாதிக்கப்பட்ட பிறகு என் மனைவி என்னை மதிக்கவில்லை. வேறு ஒருவருடன் தொடர்பு கொண்டு என்னை கொல்ல திட்டமிட்டாள். இதனால் பல நாட்கள் தூங்காமல் விழித்திருந்தேன். நாள் அவளை தீர்த்து கட்ட முடிவு செய்து அதனை நிறைவேற்றி விட்டேன்.

இவ்வாறு அவர் கூறினார்.

இன்ஸ்பெக்டர் ஜெயச் சந்திரன் வழக்குப்பதிவு செய்து மூர்த்தியை கைது செய்தார். பிணத்தை கைப்பற்றி விசாரணை நடத்தி வருகிறார்.

மாலைமலர்