உயிர் கொல்லும்? (கவிதை)

**kirikasan** · **kirikasan** Fri Jan 06, 2012 5:21 pm

ஒற்றுமை இன்றி...???

திரையும் திரையெழு கடலும் கடலிடை
தினமும் எழுகதி ரொளியும்,
தரையும் தரைதொடு அலையும் அலைபுனல்
தரவிண் பொழிமழை முகிலும்
மிரையும் அதனுடை ஒலியும் இடியொடு
முழங்கு விரிசுழல் புயலும்
விரையும் பெருகிடப் புகும்நீர் இயற்கையின்
விளைவே எனில் உயிர்கொல்லும்

மரபும் மரபுடை மொழியும் மொழிசொலும்
மனிதர் அவருடை மனமும்
கரவும் கயமைகொள் உறவும் உயிரினைக்
கருதா இறைமைகொள் ளரசும்
பரவும் பெரிதெனும் உலகும் உலகிடை
பலதோர் குடிகளும் அவர்தம்
தரமும் தயவுடை இயல்பும் தாழ்ந்திடுந்
தருணம் வர உயிர்கொல்லும்

உதிரம் பெருகிடு நிலையும் நிலைதனை
உருவாக் கிடுமொரு சிலரும்
அதிரும் சடபட வெடியும் வெடியுற
அவலம் தொடரழு குரலும்
உதிரும் பலதர உடலும் அழிவுற
உலகம் விழிகொள்ளும் மௌனம்
எதிலும் அவர்தனி நலமும் நலம்பெற
விழையும் செயல் உயிர்கொல்லும்

மயிரும் இழந்திட உயிரும் விடுமான்
மனதை யுடைமா தமிழன்
பயிரும் பயிரிட விளையும் அதனுடை
பயனால் தனதெழில் மனையும்
உயிரும் பரிவுடை குணமும் பலமுறு
உடலு மதுகொளும் திடமும்
வயிரம் எனும்வெகு திறனும் மதியுற
வாழ்ந்திட ஏதுயிர் கொல்லும்?

...

**ரா.ரா3275** · **ரா.ரா3275** Fri Jan 06, 2012 5:29 pm

ஆகா..ஆகா...
விருத்தப்பாவில் விளையாடும் தமிழில்
கருத்துப்போகாது
களமாடும் கவிப் புலிபோல்
சந்தம் தெறிக்கும் தமிழில்
நலம் நாடும் தமிழர் பற்றி
நட(ன)மாடும் கவிதை தந்த
கிரிகாசன் அய்யாவிற்கு
நன்றி...நன்றி...நன்றி...
மகிழ்ச்சி

உயிர் கொல்லும்? (கவிதை)

உயிர் கொல்லும்? (கவிதை)

Re: உயிர் கொல்லும்? (கவிதை)

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக