பெண் டாக்டர் கொலையை கண்டித்து தமிழ்நாடு முழுவதும் 2 ஆயிரம் தனியார் ஆஸ்பத்திரிகள் மூடப்பட்டன

தூத்துக்குடியில் பெண் டாக்டர் கொலையை கண்டித்து சென்னையில் தனியார் ஆஸ்பத்திரிகளை மூடி டாக்டர்கள் நேற்று வேலை நிறுத்த போராட்டத்தில் ஈடுபட்டனர். தமிழகம் முழுவதும் 2 ஆயிரம் தனியார் ஆஸ்பத்திரிகள் மூடப்பட்டன.

பெண் டாக்டர் கொலை

தூத்துக்குடியில் கடந்த 2-ந் தேதி ஈ.எஸ்.ஐ. பெண் டாக்டர் சேதுலட்சுமி வெட்டி கொலை செய்யப்பட்டார். இந்த சம்பவத்தை கண்டித்து தமிழகம் முழுவதும் அரசு மற்றும் தனியார் டாக்டர்கள் மற்றும் மருத்துவக் கல்லூரி மாணவ-மாணவிகள் போராட்டத்தில் குதித்துள்ளனர்.

நேற்று முன்தினம் தமிழ்நாடு அரசு டாக்டர்கள் சங்கம் சார்பில் அரசு ஆஸ்பத்திரி, ஆரம்ப சுகாதார நிலையங்கள் ஆகியவற்றில் பணியாற்றும் டாக்டர்கள் வேலை நிறுத்த போராட்டத்தில் ஈடுபட்டனர். இந்த போராட்டத்துக்கு மருத்துவக் கல்லூரி மாணவர்களும் ஆதரவு தெரிவித்து கலந்து கொண்டனர். பெண் டாக்டர் கொலை செய்யப்பட்ட சம்பவத்தை கண்டித்து தமிழகம் முழுவதும் போராட்டம் வலுப்பெற்று வருகிறது.

2 ஆயிரம் ஆஸ்பத்திரிகள் மூடப்பட்டன

இந்த நிலையில், தமிழகம் முழுவதும் உள்ள தனியார் ஆஸ்பத்திரி டாக்டர்கள் வேலை நிறுத்த போராட்டத்தில் ஈடுபடுவார்கள் என்றும், ஆஸ்பத்திரிகள் மூடப்படும் என்றும், அனைத்து மாவட்ட தலைநகரங்களிலும் ஆர்ப்பாட்டம் மற்றும் ஊர்வலம் நடத்தப்படும் என்று இந்திய மருத்துவ சங்கம் தமிழ்நாடு பிரிவு அறிவித்து இருந்தது.

அதன்படி, தமிழகம் முழுவதும் நேற்று தனியார் ஆஸ்பத்திரி டாக்டர்கள் நேற்று வேலை நிறுத்த போராட்டத்தில் ஈடுபட்டனர். இவர்களுக்கு ஆதரவாக பல் டாக்டர்கள், ஆயுர்வேத டாக்டர்கள், சித்தா டாக்டர்கள் மற்றும் மருந்தாளுனர்கள், மருத்துவ பிரதிநிதிகளும் போராட்டத்தில் ஈடுபட்டனர்.

இந்திய மருத்துவ சங்கத்தில் உறுப்பினராக உள்ள 3 ஆயிரம் தனியார் ஆஸ்பத்திரிகளில் 2 ஆயிரத்துக்கும் மேற்பட்ட ஆஸ்பத்திரிகள் நேற்று மூடப்பட்டன. 3 ஆயிரம் ஆஸ்பத்திரிகளிலும் வெளி நோயாளிகளுக்கு சிகிச்சை அளிக்கப்படவில்லை. உள் நோயாளிகளுக்கு மட்டும் வழக்கம்போல் சிகிச்சை அளிக்கப்பட்டன.

சென்னையில் வேலை நிறுத்தம்

இதுபோல் சென்னையிலும் தனியார் ஆஸ்பத்திரி டாக்டர்கள் வேலை நிறுத்த போராட்டத்தில் ஈடுபட்டனர். பெரும்பாலான தனியார் ஆஸ்பத்திரிகள் வழக்கம்போல் திறந்திருந்தாலும் வெளி நோயாளிகளுக்கு சிகிச்சை அளிக்க டாக்டர்கள் மறுத்தனர்.

சென்னையில் உள்ள தனியார் ஆஸ்பத்திரிகளில் 200 ஆஸ்பத்திரிகள் மூடப்பட்டன. மிகவும் பிரபலமான தனியார் ஆஸ்பத்திரிகள் மூடப்படாமல் இருந்தாலும், வெளி நோயாளிகள் சிகிச்சைக்கு அனுமதிக்கப்படவில்லை. ஏராளமான நோயாளிகள் ஆஸ்பத்திரிக்கு வந்து பார்த்துவிட்டு சிகிச்சை மறுக்கப்பட்டதால் ஏமாற்றத்துடனும், சிரமத்துடனும் திரும்பிச் சென்றனர். சென்னையில் 5 ஆயிரத்துக்கும் மேற்பட்ட டாக்டர்கள் வேலை நிறுத்த போராட்டத்தில் ஈடுபட்டனர்.

பிரம்மாண்ட மனித சங்கிலி

பெண் டாக்டர் கொலையை கண்டித்தும், அனைத்து ஆஸ்பத்திரிகளுக்கும் பாதுகாப்பு அளிக்க வேண்டும் என்று வலியுறுத்தியும் அரசு டாக்டர்கள் சங்கம் மற்றும் இந்திய மருத்துவ சங்கம் தமிழ்நாடு பிரிவு ஆகியவற்றின் சார்பில் சென்னை மருத்துவக் கல்லூரி முன்பு இருந்து நேற்று மாலை பிரம்மாண்ட மனித சங்கிலி போராட்டம் நடைபெற்றது.

இதில், மருத்துவக் கல்லூரி மாணவ-மாணவிகள், மருந்தாளுனர்கள், மருத்துவ பிரதிநிதிகள் மற்றும் தனியார் ஆஸ்பத்திரி டாக்டர்கள் உள்பட ஆயிரத்துக்கும் மேற்பட்டவர்கள் கலந்து கொண்டனர். மனித சங்கிலி போராட்டம் சென்னை மருத்துவக் கல்லூரி முன்பு தொடங்கி அரசு பல் மருத்துவ கல்லூரி வரை நடைபெற்றது. மனித சங்கிலி போராட்டம் முடிந்ததும், டாக்டர்கள் ஊர்வலமாக சென்று கலெக்டரிடம் மனு கொடுத்தனர்.

இதுபற்றி இந்திய மருத்துவ சங்கம் தமிழ்நாடு கிளைத் தலைவர் டாக்டர் பிரகாசம் கூறியதாவது:-

நடவடிக்கை

சென்னை உள்பட தமிழகம் முழுவதும் சங்கத்தில் 24 ஆயிரத்து 500 உறுப்பினர்கள் உள்ளனர். இவர்கள் அனைவரும் அந்த மாவட்டத்தில் போராட்டத்தில் கலந்து கொண்டுள்ளனர். தமிழகத்தில் உள்ள தனியார் ஆஸ்பத்திரிகளில் சங்கத்தில் உள்ள 3 ஆயிரம் ஆஸ்பத்திரிகளில் உள்ள டாக்டர்கள் வேலை நிறுத்த போராட்டத்தில் கலந்து கொண்டனர்.

தனியாக கிளீனிக் வைத்து நடத்தும் அரசு டாக்டர்களும் கிளினிக்குகளை திறக்கவில்லை. சேலத்தில் இருந்து ஆயிரம் பேரும், ஈரோட்டில் 800 பேரும், திருச்சியில் 500 பேரும் ஊர்வலம் சென்றுள்ளனர். மருத்துவர்களின் எதிர்ப்பை அரசு புரிந்து கொண்டு, தூத்துக்குடியில் நடந்ததுபோன்ற அசம்பாவித சம்பவங்கள் நடைபெறாதவாறு நடவடிக்கை எடுக்க வேண்டும்.

இவ்வாறு டாக்டர் பிரகாசம் கூறினார்.

தினதந்தி

இந்த டாக்டர்கள் செய்வது சரியான செயல் அல்ல. இவர்கள் எல்லாம் எதற்கு படித்தார்கள் என்று தெரியவில்லை.