உதவி - சிறுகதை

உதவி
- தா.ஆறுமுகம்

பூனையைக் கண்டதும் எலி வேக வேகமாக தப்பி தோட்டத்திற்குள் ஓடியது.

பூனை, "அட அற்ப பதரே, என்னிடம் சிக்காமல் ஆட்டமா போட்டுக் கொண்டிருக்கிறாய்? இன்று உன்னை பிடித்து என்ன செய்கிறேன் என்று பார்? உன்னை எனக்கு இரையாக்காமல் விட மாட்டேன். நீயா, நானா? இரண்டில் ஒன்றை பார்த்து விடுவோம்'' என்று எலியை விடாமல் துரத்தியது.

இதைக் கவனித்துக் கொண்டிருந்த முயல், எலிக்கு உதவ நினைத்தது. உடனே, "எலியாரே, என் புதருக்குள் வந்து ஒளிந்து கொள்ளுங்கள். சீக்கிரம் வாருங்கள்'' என்று அழைத்தது.

பூனை தன் கோபக் கண்களால் தோட்டம் முழுவதையும் சல்லடை போட்டுத் தேடியது. "புதருக்குள் எங்கோ, ஓடி ஒளிந்து கொண்டாயா? இப்போது போகிறேன். இன்னொரு நாளைக்கு வந்து உன்னைக் கவனித்துக் கொள்கிறேன்'' என்று கோபத்துடன் சொல்லிவிட்டுப் போனது.

பூனை சென்று விட்டதை அறிந்த முயல், "நண்பரே பூனை சென்று விட்டது. சீக்கிரம் உங்கள் இடத்திற்குச் சென்று விடுங்கள்'' என்றது, எலி.

"முயலே எனக்கு இதைவிட பாதுகாப்பான இடம் வேறு எதுவும் இருக்காது. நீ வேறு இடத்தைப் பார்த்துக் கொள்'' என்று அதிகாரப்பூர்வமாக சொன்னது எலி.

"என்னடா, இது வம்பா போச்சு? இடத்தைக் கொடுத்தால், மடத்தைப் பிடித்த கதையாக இருக்கிறதே! உன் உயிர் காக்க உதவியதற்கு இதுவா நீ செய்யும் நன்றி?'' என்று கண் கலங்கியது முயல்.

"இதோ பார். எனக்கு என் உயிர் தான் முக்கியம். நீ இடத்தைக் காலி செய்யவில்லை என்றால், உன்னைக் கடித்துக் கொன்று விடுவேன்'' என்று கடிக்க முயன்றது, எலி.

முயல், பயந்து `மூடர்களுக்கு உதவினால், அதனால் வரும் துன்பத்தை உதவியவர் அனுபவித்து தானே ஆக வேண்டும்' என்று வேறு தோட்டத்திற்கு ஓடியது.

அப்போது எலிக்குப் பசி எடுக்கவே, புதருக்குள் இருந்து தோட்டத்தை எட்டிப் பார்த்தது. மாம்பழம் ஒன்று மரத்தில் இருந்து கீழே விழுந்து கிடப்பதைக் கண்டு சாப்பிட ஓடி வந்தது.

மறைந்து இருந்த பூனை அதைக் கவ்வி, "நீ எப்படியும் வெளியே வருவே என்று காத்திருந்தேன். நான் நினைத்தது வீண்போகவில்லை. இடம் கொடுத்த முயலையும் துரத்தி விட்டாய். அது அழுதபடி சென்றதை பார்த்தேன். உன்னைக் காப்பாற்ற இடம் கொடுத்த முயலையே விரட்டி விட்ட நீ, வாழத் தகுதி இல்லாதவன்'' என்று அதைக் கடித்துக் குதறியது, பூனை.

கதை உணர்த்தும் நீதி: ஒருவருக்கு உதவி செய்யும் போது, அந்த உதவியைப் பெற, அவர் தகுதியானவர்தானா என்று சிந்தித்தே உதவ வேண்டும். இல்லாவிட்டால், உதவி செய்த நமக்கே அது ஆபத்தாக முடிந்து விடும்.


சிறுவர் தங்க மலர்