ஆஸி. 659 ரன்களுக்கு டிக்ளேர்

**இளமாறன்** · **இளமாறன்** Thu Jan 05, 2012 12:26 pm

சிட்னி: இந்தியா, ஆஸ்திரேலியா அணிகளுக்கு இடையிலான 2வது டெஸ்ட் போட்டியி்ன் 3வது நாளில் ஆடிய ஆஸ்திரேலியா முதல் இன்னிங்சில் 4 விக்கெட்களுக்கு 659 ரன்கள் எடுத்து டிக்ளேர் செய்தது. கேப்டன் மைக்கேல் கிளார்க் முச்சதம் அடித்தார். ஹஸ்ஸி சதமடித்தார்.

இதையடுத்து இந்தியா தனது 2வது இன்னிங்ஸை ஆடி வருகிறது. காலை 11.30 மணி நிலவரப்படி, இந்தியா 2 விக்கெட்களை இழந்து 105 ரன்களை எடுத்திருந்தது. கம்பிர் அதிரடியாக அரைசதம் அடித்து இந்தியாவின் ஸ்கோரை உயர்த்தி உள்ளார். அவருடன் 100வது சதம் அடிக்கும் கனவுடன் சச்சின் களத்தில் உள்ளார். 2வது இன்னிங்சில் சச்சின் சதமடிக்கும் பட்சத்தில் இந்தியா, இந்த போட்டியில் தோல்வியை தவிர்க்க வாய்ப்பு உள்ளது.

ஆஸ்திரேலியா, இந்தியா அணிகளுக்கு இடையிலான பார்டர்-கவாஸ்கர் கோப்பைக்கான டெஸ்ட் தொடர் ஆஸ்திரேலியாவில் நடந்து வருகின்றது. இதில் முதல் போட்டியி்ல் இந்தியா தோல்வி அடைந்தது. சிட்னியில் துவங்கிய 2வது டெஸ்ட் போட்டியில் முதல் நாள் ஆட்டத்தில் இந்தியா முதல் இன்னிங்சில் பேட்டிங் செய்து 191 ரன்கள் எடுத்து ஆல்-அவுட்டானது.

அதன்பிறகு ஆஸ்திரேலியா முதல் இன்னிங்ஸை துவக்கியது. முதல் நாள் ஆட்ட முடிவில் ஆஸ்திரேலியா 3 விக்கெட் இழப்புக்கு 116 ரன்களை எடுத்திருந்தது. ரிக்கி பான்டிங்(44), கிளார்க(47) ஜோடி களத்தில் அவுட்டாகாமல் இருந்தனர்.

நேற்று 2ம் நாள் ஆட்டத்தை தொடர்ந்த ஆஸ்திரேலியா, ரிக்கி பான்டிங், கிளார்க் உள்ளிட்டோரின் சதத்துடன் இமாலய ஸ்கோரை எட்டியது. 2ம் நாள் முடிவில் ஆஸ்திரேலியா ரிக்கி பான்டிக்கை இழந்து முதல் இன்னிங்சில் 482 ரன்கள் எடுத்து வலுவான நிலையில் இருந்தது. மைக்கேல் கிளார்க்(251), மைக்கேல் ஹசி(55) உள்ளிட்டோர் களத்தில் இருந்தனர்.

3வது நாளாக இன்று ஆஸ்திரேலிய முதல் இன்னிங்ஸ் ஆட்டத்தை தொடர்ந்தது. பொறுப்பாக விளையாடிய ஆஸ்திரேலிய கேப்டன் மைக்கேல் கிளார்க் சிட்னி மைதானத்தில் அதிகபட்ச ரன்கள் எடுத்த ஆஸ்திரேலிய வீரர் என்ற பெருமையைப் பெற்றார்.

கிளார்க் உடன் ஜோடி சேர்ந்து ஆடி வந்த மைக்கேல் ஹசி 150 ரன்களை கடந்தும் அவுட்டாகவில்லை. இந்த ஜோடியின் சிறப்பாக ஆட்டம் மூலம் ஆஸ்திரேலியா 4 விக்கெட்களுக்கு 659 ரன்கள் என்ற வலுவான நிலையை எட்டி, முதல் இன்னிங்சை டிக்ளேர் செய்தது.

ஆஸ்திரேலிய அணி 468 ரன்கள் லீட் பெற்ற நிலையில் இந்திய 2வது இன்னிங்சை துவக்கியது. துவக்கத்திலேயே இந்திய துவக்கவீரர் ஷேவாக் 4 ரனகளில் ஆட்டமிழந்தார்.

தட்ஸ் தமிழ்