புதுவையில் மதுபானங்கள் விலை உயர்வு

புதுச்சேரி அரசு கலால் வரி மற்றும் கூடுதல் கலால் வரியை உயர்த்தியதால் மதுபான வகைகளின் விலை உயர்கிறது. இதற்கான உத்தரவு செவ்வாய்க்கிழமை பிறப்பிக்கப்பட்டது. எனினும் தமிழகத்தை ஒப்பிடும்போது புதுச்சேரியில் மதுபான விலை குறைவு என்ற தற்போதைய நிலை, விலை உயர்த்தப்பட்ட பின்னும் தொடர்ந்து நீடிக்கும்.

தமிழகத்தில் இரு வகையான இந்திய தயாரிப்பு அயல்நாட்டு மதுபான வகைகள் (ஐஎம்எப்எல்) உள்ளன. அவை சாதாரணமானவை, நடுத்தரம் மற்றும் பிரீமியம். ஆனால், புதுச்சேரியில் இதுவரை ஒரே வகையிலேயே இந்த ஐஎம்எப்எல் வகைகள் வைக்கப்பட்டிருந்தன. அவற்றுக்கு லிட்டருக்கு ரூ.63 என கலால் வரி இருந்தது. தற்போது தமிழகத்தைப் போலவே இங்கும் இரு வகைகளாக இவை பிரிக்கப்பட்டு, சாதாரண வகை மதுபானத்துக்கான கலால் வரி ரூ.63ல் இருந்து ரூ.73 ஆகவும், நடுத்தரம் மற்றும் பிரீமியம் வகை மதுபானங்களுக்கு ரூ.63ல் இருந்து ரூ.80ஆகவும் கலால் வரி உயர்த்தப்பட்டுள்ளது.

பீர் வகைகள் ஒரே ரகமாக உள்ளன. அவற்றுக்கு லிட்டருக்கு ரூ.2.75 ஆக இருந்த கலால் வரி ரூ.3.75 ஆக உயர்த்தப்பட்டுள்ளது. இதேபோல, கூடுதல் கலால் வரியும் உயர்த்தப்பட்டுள்ளது. மொத்தம் 18 வகையான ஸ்லாப் மூலம் கூடுதல் கலால் வரி வசூலிக்கப்பட்டு வந்தது. அதில் ரூ.299 வரை விற்பனையானால் ரூ.26 கூடுதல் கலால் வரி என்பதே குறைந்தபட்சமாக இருந்தது. அது தற்போது ரூ.41 ஆக உயர்த்தப்பட்டுள்ளது.
முன்பு ரூ.6000க்கு மேல் விற்பனையானால் அதிகபட்சமாக ரூ.149 கூடுதல் கலால் வரி விதிக்கப்பட்டிருந்தது. தற்போது அதிகபட்சமாக ரூ.334 என உயர்த்தப்பட்டுள்ளது.

பீர் விற்பனையில் கூடுதல் கலால் வரி முன்பு ரூ.299க்கு விற்பனையானால் குறைந்தபட்சம் ரூ.9 ஆக இருந்தது. அது தற்போது ரூ.18-ஆக உயர்த்தப்பட்டுள்ளது. ரூ.400க்கு மேல் விற்பனையானால் அதிகபட்சமாக ரூ.15-ஆக இருந்த கூடுதல் கலால் வரி தற்போது ரூ.24-ஆக உயர்த்தப்பட்டுள்ளது. இந்த கலால் வரி மற்றும் கூடுதல் கலால் வரி உயர்வு உடனடியாக அமலுக்கு வருவதாக அரசு உத்தரவு தெரிவிக்கிறது.
இந்த வரி உயர்வால், மதுபான விற்பனை மூலம் அரசுக்குக் கிடைக்கும் வருவாயில் கூடுதலாக ரூ.80 கோடி வசூலாகும் என அரசு வட்டாரங்கள் தெரிவித்தன. கடந்த ஆண்டு மதுபான விற்பனை மூலம் அரசுக்கு ரூ.380 கோடி வருவாய் கிடைத்தது.

தமிழகத்தை விடக் குறைவு: தமிழகத்தோடு ஒப்பிடும்போது மதுபான விற்பனை விலை தொடர்ந்து குறைவாகவே இருக்கும் எனத் தெரிகிறது.
தமிழகத்தில் ரூ.75க்கு விற்பனை செய்யப்படும் ஐஎம்எப்எல் மதுபானத்தின் விலை புதுவையில் ரூ.47ஆக இருந்தது. இது தற்போது ரூ.7 முதல் 8 வரை உயரக்கூடும் என எதிர்பார்க்கப்படுகிறது. அதே போல, பீர் வகைகள் தமிழகத்தில் ரூ.75-க்கு கிடைக்கிறது. அது புதுச்சேரியில் ரூ.53க்கு கிடைத்து வந்தது. இதுவும் ரூ.7 முதல் ரூ.8 வரை உயரக்கூடும் என்றும் அரசுத்துறை வட்டாரங்கள் தெரிவித்தன.

dinamani