யாதுமாகி

**ரா.ரா3275** · **ரா.ரா3275** Wed 4 Jan 2012 - 15:10

என்னைப்பற்றிக்
கேட்டுப் பாருங்கள்

சிலர் மிரளுவதும்
சிலர் மெலிதாய்ச் சிரிப்பதும்
சிலர்
மின்னலாய்க் கண் சிமிட்டுவதும்
சிலர் புருவம் வளைப்பதும்

புரிந்துகொள்ள
என்னைப்பற்றிக் கேட்டுப்பாருங்கள்

***

இருள் கிழிக்கும்
என் சைக்கிள்
எதிரே ஓர் இளையமுகம்
இறங்கிப்பார்த்தால் நீ...
எல்லாம் மாயைதான்
இருந்தும்...

மழைத்தூறலில்
குடைக்கம்பியின் துளி சேமிப்பில்
சிந்தாமல் தொங்கும் நீ...
தொட்டால் சொட்டிப் போவாய்
இருந்தும்...

மொட்டை மாடியில்
முன்புற வாசலில்
வானம் பார்த்துக் கிடக்கையில்
நெஞ்சோரத்தில் நீ...
எழுந்து பார்த்தால் எதுவுமில்லை
இருந்தும்...

மோவாயில் கைவைத்து
மூளையோடு பேசுகையில்
வந்துவந்து சிரிக்கும் நீ...
வளைத்துப் பிடிப்பதற்குள்
கரைந்துபோவாய்
இருந்தும்...

தென்னங்கீற்றின் திடீர் அசைவில்
தெரியும் நீ...
விலக்கிப் பார்த்தால் வெற்றிடம்
இருந்தும்...

அதிகாலைக் கனவுகளில்
அடர்த்தியாய்த் திரியும் நீ...
அருவம்தான்
இருந்தும்...

எதிரிகளிடம்-நண்பர்களிடம்
எதிர்காலம் பேசுகையில்
துணையிருக்கும் நீ...
துளிநேரத்து தைரியம்தான்
இருந்தும்...

நதிக்கரை-நாணல்
என் வானம்-என் வழி
என் ஒளி என
புதுப்புதுப் பெயர்களில் நீ...
உன் பொதுப்பெயர் வேறுதான்
இருந்தும்...
உன்னையே நான் சொல்வேன்!

சூரியச் சூடுதான்
அதன் சுயம்
திரைவிலகாத ரகசியம்தான்
பயம்

ஆகவே...
என்னைப்பற்றிக் கேட்கும்
ஒவ்வொருவருக்கும்
உன்னையே நான் சொல்வேன்!