ஈரான் தயாரித்த அணுமின் தயாரிக்கும் எரிபொருள் : வெற்றிகரமாக ஏவுகணையும் பரிசோதிக்கப்பட்டது

டெஹ்ரான் : அணுமின் நிலையங்களில் பயன்படுத்தப்படும், யுரேனியம் அடங்கிய எரிபொருள் கம்பிகளை தயாரித்து, வெற்றிகரமாகப் பரிசோதித்து விட்டதாக, ஈரான் அறிவித்துள்ளது. மேலும், வானில் உள்ள இலக்கை தரையிலிருந்து தாக்கும், குறுகிய தூர ஏவுகணையையும் பரிசோதித்துள்ளதாக, அந்நாடு அறிவித்துள்ளது.

தடை : ஈரான், தனது சுய தேவைகளுக்காக அணுசக்தியைப் பயன்படுத்துவதாக கூறி வருகையில், அமெரிக்காவும், மேற்குலக நாடுகளும், அணு குண்டு தயாரிப்பதற்காகத் தான், ஈரான் தனது அணுசக்தியைப் பயன்படுத்துவதாகக் குற்றம்சாட்டி வருகின்றன. அதனால், ஈரான் அணுமின் நிலையங்களுக்கான எரிபொருள் வினியோகத்திற்கு அமெரிக்காவும், மேற்குலக நாடுகளும் தடை விதித்துள்ளன.

ஏவுகணை பரிசோதனை : இந்நிலையில், நேற்று காலையில் ஈரானின் அதிகாரப்பூர்வ ஐ.ஆர்.என்.ஏ., செய்தி நிறுவனம் வெளியிட்ட செய்தி ஒன்றில், வானில் உள்ள இலக்கை தரையில் இருந்து தாக்கும் குறுகிய தூர ஏவுகணை ஒன்று, வெற்றிகரமாக பரிசோதிக்கப்பட்டதாகத் தெரிவித்தது. இந்தப் பரிசோதனை, சமீபத்தில் ஈரான், பெர்ஷிய வளைகுடாவில் மேற்கொண்ட கடற்படைப் பயிற்சிகளின் போது, நடத்தப்பட்டதாக தகவல்கள் வெளியாயின. ஆனால், இரு நாட்களுக்கு முன்பு, ஈரான் கடற்படைத் தளபதி மகமூத் மவுசாவி, அத்தகவல்களை மறுத்தார்.

ஏவுகணை சோதனைக்குப் பின் மவுசாவி கூறுகையில், "இந்த ஏவுகணை, நவீன தொழில்நுட்பத்துடன் கூடியது. அதோடு, ராடாரின் கண்காணிப்பில் சிக்காத இலக்குகளையும், இந்த ஏவுகணை தாக்கக் கூடிய வல்லமை படைத்தது' என்றார்.

மேலும், முதன் முதலாக உள்நாட்டில் வடிவமைக்கப்பட்ட, நவீன தொழில்நுட்பத்தோடு கூடிய ஏவுகணை ஒன்று பரிசோதிக்கப்பட்டது இதுவே, முதன் முறை என்பது குறிப்பிடத்தக்கது.

அணு எரிபொருள் : இந்நிலையில், நேற்று ஈரான் செய்தி நிறுவனம் வெளியிட்ட மற்றொரு செய்தியில், ஈரான் அணுமின் நிலையங்களில் மின்சார உற்பத்திக்காக பயன்படுத்தப்படும், யுரேனியம் அடங்கிய எரிபொருள் கம்பிகள் தயாரிக்கப்பட்டு, வெற்றிகரமாக சோதனையும் செய்யப்பட்டதாகவும் தெரிவித்துள்ளது.

இந்த கம்பிகள், டெஹ்ரான் ஆய்வு அணு உலையில் பரிசோதிக்கப்பட்டுள்ளன. இதுகுறித்து, டெஹ்ரான் டைம்ஸ் வெளியிட்டுள்ள செய்தி ஒன்றில், "ஈரான், அணு எரிபொருளைத் தயாரிக்க முடியாது என, கொக்கரித்த மேற்குலக நாடுகள், இந்த தயாரிப்பால், நிச்சயம் திகைத்து விடும்' என குறிப்பிடப்பட்டுள்ளது.

பொதுவாக, அணுமின் நிலையங்களில் பயன்படுத்தப்படும் எரிபொருள் கம்பிகளில், குறைவாக செறிவூட்டப்பட்ட யுரேனியம் தான் எரிபொருளாகப் பயன்படுத்தப்படும். அணுகுண்டு உள்ளிட்ட அணு ஆயுதங்கள் தயாரிக்க, அதிகளவில் செறிவூட்டப்பட்ட யுரேனியம் வேண்டும் என்பது குறிப்பிடத் தக்கது.

அதிர்ச்சியில் அமெரிக்கா : குறுகிய தூரம் சென்று தாக்கக்கூடிய ஏவுகணை பரிசோதனை மற்றும் அணுமின் நிலையங்களுக்கான எரிபொருள் ஆகிய இரண்டையுமே தற்போது, ஈரான் தனது சொந்த தொழில்நுட்பத்தில் தயாரித்துள்ளது, அமெரிக்கா மற்றும் மேற்குலக நாடுகளை அதிர்ச்சியில் ஆழ்த்தியுள்ளது. இதன் காரணமாக, ஈரான் மீது அமெரிக்கா மேலும் பல பொருளாதாரத் தடைகளை, நேற்று விதித்துள்ளது.

தினமலர்

எதை தயாாித்தாலும் மனிதகுலம் தழைக்க பயன்படுத்த வேண்டும். தன் நாடு வாழ பிற நாடுகள்மேல் ஆதிக்கம் செலுத்த கூடாது. மிரட்டவும் பயன்படுத்தக்கூடாது. நல்ல ஆக்கப்பூா்வமான திட்டங்களுக்கு பயன்படுத்தினால் நல்லது. தேசாதிபதிகள், மன்னா்கள் உணருவாா்களா?

தன்னிச்சையாக செயல்படும் ராணுவ அதிகாாிகள், சா்வாதிகாாிகள் நிறைந்த நாடுகளில் இப்படிப்பட்ட கண்டுபிடிப்புகள், தயாாிப்புகளுக்கு ஒரு கட்டுப்பாடு கொண்டு வர வேண்டியது ஐ.நா.சபை மற்றும் உலகநாடுகளின் கடமை.

மேற்குலகுக்கு மேலுமோர் தலைவலி