சாலை பாதுகாப்பு வாரம்

"விபத்தால் வருவது துன்பம், பாதுகாப்பால் வருவது இன்பம்' என்ற கோஷத்தோடு சாலை பாதுகாப்பு வாரம் ஜன., 1 முதல் 7ம் தேதி வரை கடைபிடிக்கப்படுகிறது. ஒரு விஷயத்தை மக்களுக்கு உணர்த்த ஒரு குறிப்பிட்ட நாள் மட்டும் சிறப்பு தினமாக கடைபிடிக்கப்படுகிறது. உதாரணமாக காதலர் தினம், புகையிலை தினம், எய்ட்ஸ் தினம். ஆனால் சாலை பாதுகாப்பு நாள் மட்டும் ஏழு நாட்கள் கடைபிடிக்கப்படுவதில் இருந்தே, அதன் முக்கியத்துவத்தை உணரலாம்.

விபத்து இல்லாமல் வாகனங்கள் ஓட்டுவது குறித்து, மதுரை தெற்கு வட்டார போக்குவரத்து அலுவலர் கே.நடராஜன் கூறியதாவது: மதுரை மாவட்டத்தில் 2010ம் ஆண்டில் சாலை விபத்தில் 120 பேர் இறந்தனர். 418 பேர் காயமடைந்தனர். 2011ல் நவம்பர் வரை 116 பேர் இறந்தனர். 452 பேர் காயமடைந்தனர். எனவே இதுபோன்ற விபத்துக்களை தடுப்பதற்கு வாகன ஓட்டிகள் சாலை விதிகளை கடைபிடிக்கவேண்டும்.

இருசக்கர வாகன ஓட்டிகள்:
* எப்போதும் தலைக்கவசம் அணிந்தே வாகனம் ஓட்ட வேண்டும். பின்புறம் அமர்ந்திருப்போரும் தலைக்கவசம் அணிய வேண்டும்.
* இரண்டு பேருக்கு மேல் பயணம் செய்யக் கூடாது. மீறினால் வாகனத்தை எளிதில் கட்டுப்படுத்த இயலாமல் விபத்து ஏற்படும்.
* பயணத்தின்போது மொபைல் போன் பேசுவதை தவிர்க்க வேண்டும்.
* கண்டிப்பாக சுமைகளை எடுத்துச் செல்லவே கூடாது.
* மிதமான வேகத்திலேயே செல்ல வேண்டும். சாலையில் திரும்பும்போது கையால் சைகை செய்து திரும்ப வேண்டும்.
* இருவழிச்சாலை, நான்கு வழிச்சாலையில் திரும்பும்போது வாகனத்தை நிறுத்தி, சாலையின் இருபறமும் வாகனங்கள் வரவில்லை என உறுதி செய்த பின்பே திரும்ப வேண்டும்.
* குறுகிய பாலங்கள் மற்றும் வளைவுகளில் பிற வாகனங்களை முத்திச் செல்லக் கூடாது. முன்னால் செல்லும் வாகனத்தை ஒட்டிச் செல்லாமல் 10 அடி தூரம் இடைவெளி விட்டு செல்ல வேண்டும்.

நான்கு சக்கர வாகனங்களுக்கு:
* குறிப்பிட்ட வேகத்திற்கு மேல் செல்லக் கூடாது. ஓவர் டேக் செய்யும்போது, முன், பின் வரும் வாகனங்களின் நிலை அறிந்தே கடக்க வேண்டும்.
* வளைவுகள், குறுகிய பாலம், சந்திப்புகள், எதிர்வரும் வாகனம் தெரியாத இடம், பாதசாரிகள் கடக்கும் இடங்களில் வேகத்தை குறைக்க வேண்டும்.
* இடதுபுறம் ஓவர் டேக் செய்யக் கூடாது. பகலில் ஹெட்லைட் போட்டு முந்தக் கூடாது.
* வாகனத்தை நன்கு பராமரிக்க வேண்டும்.
* உடன் வருவோரிடம் பேசிக் கொண்டே வரக் கூடாது.
* மது அருந்தி வாகனம் ஓட்டக் கூடாது. தூக்கம், ஓய்வின்றி ஓட்டுவதை தவிர்க்க வேண்டும்.
* ஆளில்லாத ரயில்வே கேட் பகுதி, கிளைச் சாலையில் இருந்து பிரதான சாலையில் நுழையும் பகுதியில் இரு புறமும் ரயிலோ, வாகனமோ வரவில்லை என உறுதி செய்தே கடக்க வேண்டும்.
* மழை, பனிமூட்ட நேரங்களில் கவனமாக இருக்க வேண்டும்.

கனரக வாகனங்கள்
* அதிகாலை 3 முதல் 5 மணி வரை அதிக விபத்து நிகழ்வதால், அந்நேரம் சர்வீஸ் சாலையில் ஓரமாக வாகனத்தை நிறுத்தி ஓய்வு எடுக்க வேண்டும்.
*ஒவ்வொரு 150 கி.மீ., தூரத்திலும் வாகனத்தை நிறுத்தி முகம் கழுவி, டீ குடித்த பின் இயக்க வேண்டும்.
* பழுது, விபத்தாகி நிற்கும் வாகனங்களின் பின்புறம் சிவப்பு நிற கூம்புகள் வைக்க வேண்டும். சிவப்பு விளக்கை எரியவிட வேண்டும். முடிந்தளவு சாலையின் ஓரத்தில் வாகனத்தை நிறுத்த வேண்டும். நிற்கும் வாகனங்கள் மீது வாகனங்கள் மோத வாய்ப்புள்ளதால், அவற்றின் முன், பின் நிற்பதை தவிர்க்க வேண்டும்.
* முன்னால் செல்லும் வாகனத்தில் இருந்து பத்து மீட்டர் இடைவெளி விட்டே செல்ல வேண்டும். ஹெட்லைட் மட்டும் போட்டுக் கொண்டு ஓவர் டேக் செய்தல் கூடாது. முந்திச் செல்கையில், ஹார்ன் ஒலி எழுப்பி முன்னால் செல்லும் வாகன ஓட்டுனரிடம் இருந்து சைகை கிடைத்த பின்பே, பாதுகாப்பாக முந்திச் செல்ல வேண்டும்.
* இரவு நேரங்களில் கண்கள் கூசும் விளக்குகளை ஒளிர செய்யக் கூடாது. எதிரே வரும் வாகன ஓட்டிகளுக்காக ஒளியை குறைத்து செல்ல வேண்டும்.
மனக்கட்டுப்பாடு, மனிதநேய பண்பு, பொறுமை, கடமை உணர்வு ஓட்டுனர்களுக்கு அடிப்படை தேவை. இதைப் பெற எளிய உடல், மனப் பயிற்சிகளை செய்யலாம். சீரான உணவு முறை, தியானம், ஒழுக்கம் மூலமும் பெறலாம்.

தினமலர்