தமிழே தருவாயா? (கவிதை)

**kirikasan** · **kirikasan** Mon Jan 02, 2012 1:26 am

2012 புதிய ஆண்டு - எழுதும் முதல்கவிதை

தமிழன்னையை வேண்டி இக் கவிதை

தமிழே தருவாயா?

தமிழோடு விளையாடித் தரநூறு கவிபாடித்
தவழ்கின்ற பெருவாழ்வு வேண்டும்
இமைமீது விழிகொண்ட உறவாகக் கணமேனும்
உனையென்றும் பிரியாமை வேண்டும்
கமழ்வாச மினிதான கனிகாணுந் தருவாக
கனம்கொண்டு இவன்சோலை யெங்கும்
திகழின்பத் தமிழான தென்றும்நற்பொலிவாகி
தினமொன்று கனிந்தாக வேண்டும்

சுவையான தெனஅன்னை தமிழோடு பயில்கின்ற
சுகமான உணர்வென்றும் வேண்டும்
அவைகூற அவையேறின் அழகென்பதென யாரும்
அதுகண்டு புகழ்கூற வேண்டும்
எவைமீதி இருந்தாலும் எதுமீறி நடந்தாலும்
உனதன்பு அதைமேவ வேண்டும்
இவைபோதும் எனவல்ல இகமீது தமிழ்போதை
எழுந்தின்ப நதிபாய வேண்டும்

குவை தங்கம் கொடிஆட்சி, குடிவாழும் ஊரென்று
எது தந்தும் பரிசாகக் கேட்டும்
அவையொன்று நிகரில்லை அரசாளத் தமிழேடும்
அதிகாரம் அதில் உண்டுபோதும்
குவிகின்ற மலர்மீது கொள்கின்ற துயில்போலும்
கலையன்னை மடிமீது சாயும்
கவினின்பக் கணம்போதும் கருதேனே பிறிதேதும்
காணென்று மனம்கூற வேண்டும்

ரவிவானில் வரும்போதி லெழுவான ஒளியாக
என்றென்றும் பிரகாசம் வேண்டும்
இரவில்வந்த நிலவாலே எழுகின்ற மனபோதை
இதனோடு இழைந்தோட வேண்டும்
சரமாலை யணியாகத் தமிழன்னை புகழேந்தி
தருகின்ற கவியாவும் என்றும்
வரமான தரவேண்டும் வளர்வொன்று தானின்றி
வழுவாத நிலைகொள்ள வேண்டும்

..

**பிஜிராமன்** · **பிஜிராமன்** Mon Jan 02, 2012 1:33 am

அமுதாக சொல்லமைத்து அழகான கவிபாடி
சுழலும் ஆண்டின் முதலாம் நாளில்முத்தான
கவிதந்த உங்களுக்கு என்மனமார்ந்த நன்றிகள்......

இந்த ஆண்டு தாங்கள் படைத்த முதல் கவிக்கு....நானே முதல் பின்னூட்டம் இடுகிறேன்..........முதல் பின்னூட்டம் இட்டதில் மகிழ்ச்சி ஐயா.........நன்றிகள்

**kirikasan** · **kirikasan** Mon Jan 02, 2012 2:08 am

தங்கள் `முதலாவது பாராட்டுக்கு தலைவணங்கி
மிக்க மகிழ்வுடன் கவிபயணம் தொடர்கிறேன், நன்றிகள்!

kitcha · kitcha Mon Jan 02, 2012 9:42 am

அருமையான கவி.உங்கள் பயணம் தொடர வாழ்த்துகள் மகிழ்ச்சி

Guest · Guest Mon Jan 02, 2012 11:00 am

அருமை அண்ணே .. வாழ்த்துகள்

**kirikasan** · **kirikasan** Mon Jan 02, 2012 4:02 pm

நன்றிகள் kircha , மற்றும் புரட்சி தங்கள் இருவருக்கும்,
பாராட்டுக்கு என் மனமார்ந்த நன்றிகள்!

Sponsored content · Sponsored content

தமிழே தருவாயா? (கவிதை)

தமிழே தருவாயா? (கவிதை)

Re: தமிழே தருவாயா? (கவிதை)

Re: தமிழே தருவாயா? (கவிதை)

Re: தமிழே தருவாயா? (கவிதை)

Re: தமிழே தருவாயா? (கவிதை)

Re: தமிழே தருவாயா? (கவிதை)

Re: தமிழே தருவாயா? (கவிதை)

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக