தேடுகிறேன்

shineson · shineson Sun Jan 01, 2012 7:47 am

நடுக்கடலுக்குச் சென்று சிப்பிகளைத் தேடுகிறேன்,
ஆயிரம் சிப்பிகளில் ஒரு முத்தினைத் தேடுகிறேன்.

இலைகளின் நுனியில் பனித்துளியைத் தேடுகிறேன்,
பனித்துளியில் பதுங்கும் கதிரவனைத் தேடுகிறேன்.

அலுவலகத்திற்குப் போன அம்மாவைத் தேடுகிறேன்,
அம்மாவின் அடங்கிப் போன அன்பைத் தேடுகிறேன்.

விமானமேறிப் போன தந்தையைத் தேடுகிறேன்,
தந்தையின் எதிர்பார்ப்புகளை என்னுள் தேடுகிறேன்.

பெண்களின் மனதில் காதலைத் தேடுகிறேன்,
காதலில் கசிந்துருகும் கனிவைத் தேடுகிறேன்

போகும் பாதையில் மனிதர்களைத் தேடுகிறேன்,
மனிதர்கள் தொலைத்த மனிதத்தைத் தேடுகிறேன்.

சாலையோரங்களில் யாசகர்களைத் தேடுகிறேன்,
சட்டைப்பைக்குள் சில்லறையைத் தேடுகிறேன்.

கவிதைகளிடையே மவுனத்தைத் தேடுகிறேன்,
மவுனத்தில் ஒளிந்திருக்கும் வலியைத் தேடுகிறேன்.

வாழ்வில் கடந்து போன இளமையைத் தேடுகிறேன்,
இளமையோடு தொலைந்த இனிமையைத் தேடுகிறேன்.

நினைவுகளால் கலைந்து போன கனவினைத் தேடுகிறேன்,
கனவுகளில் கடந்து போன கன்னியரைத் தேடுகிறேன்.

இன்னும் தேடுகிறேன்; இறக்கும் வரை தேடுவேன்.