சிவன்மலை முருகன்

முருகப்பெருமான், வள்ளியுடன் நின்ற திருக்கோலத்தில் காட்சி தரும் தலம், சிவன் மலை.

சிவபெருமான் மேருமலையை வில்லாக வளைத்து அசுரர்களை அழிக்க முயன்றபோது அதிலிருந்து விழுந்த சிறுதண்டே "சிவன்மலை'யானது எனவும், ஆஞ்சநேயர் சஞ்சீவி பர்வதத்தை எடுத்துச் செல்லும் வழியில் கீழே விழுந்த துண்டே சிவன்மலை என்றும் இருவேறு கருத்துகள் நிலவுகின்றன.

மலையுச்சி சென்று சுவாமியை தரிசிக்க 496 படிகள் ஏறவேண்டும். அங்கே உச்சிப் பிள்ளையாரின் ஆசி பெற்று ஆலயத்தின் பரந்த வளாகத்தை அடையலாம்.

ஐந்து நிலை கொண்ட ராஜகோபுரம் நம்மை எதிர்நோக்கி நிற்கிறது. அதன் வழியே நுழைந்தால் தீபஸ்தம்பம், கொடி மரம், மயில்வாகனம் நம்மை வரவேற்கிறது.

உள்ளே இடபுறமாக சூரியனும், புளிய மரத்தடியில் விநாயகரும் உள்ளனர். அடுத்து ஞானாம்பிகை, கைலாசநாதர், தட்சிணாமூர்த்தி, கன்னிமூலை கணபதி, சண்டிகேஸ்வரர், துர்க்கை சன்னதிகள் உள்ளன. தல விருட்சமாக "தொரட்டி மரம்' உள்ளது.

சிவன்மலை சுப்பிரமணியசுவாமியை காங்கேயன், சிவன்மலை குகன், மரகத மயூரன் என்றெல்லாம் அழைக்கின்றனர்.

மூலவர் சுப்பிரமணிய ஸ்வாமியாக வள்ளியுடன் நின்ற திருக்கோலத்தில் காட்சியளிக்கிறார்.

சிவன்மலை முருகன், ஒவ்வொரு காலகட்டத்திலும் பக்தர்களின் கனவில் தோன்றி, குறிப்பிட்ட பொருளை வைத்து பூஜை செய்யச் சொல்வாராம். அந்தக் காலகட்டத்தில் அப்பொருளில் மதிப்பு கூடும் என்பது நம்பிக்கை. இது காலங் காலமாய் இங்கு நடைமுறையில் இருந்து வரும் வழக்கமாம். தற்சமயம் மண்ணை வைத்து பூஜை செய்து வருகிறார்கள். இதனால்தான் நிலத்தின் விலை அதிகரித்துள்ளது என்கிறார்கள்.

காங்கேயத்திற்கும் திருப்பூருக்கும் இடையே 4 கி.மீ.யில் உள்ளது சிவன்மலை முருகன் கோயில்

- ம. வின்சென்ட் ராஜ், திருப்பூர்.

சிவன் மாலையில் தற்போது தண்ணீர் வைத்து பூஜை செய்வதாக கூறினார்கள்...
ராஜகோபுரத்தின் பணிகள் இன்னும் முழுமையாக முடிவடையவில்லை...
கோவிலுக்கு செல்ல தார் சாலை வசதியும் உள்ளது...