இந்தியா-ஆஸ்திரேலியா அணிகள் இதுவரை மோதிய டெஸ்ட் போட்டிகளின் கண்ணோட்டம்

**இளமாறன்** · **இளமாறன்** Mon Dec 26, 2011 1:32 am

இந்தியா ஆஸ்திரேலியா அணிகளுக்கிடையேயான டெஸ்ட் தொடர் நாளை நடக்கிறது. இதுவரை இரு அணிகளும் மோதிய டெஸ்ட் போட்டிகளின் சிறு கண்ணோட்டம்:

இந்திய அணி 9 முறை ஆஸ்திரேலியா சென்றுள்ளது. ஆனால் ஒரு முறைகூட தொடரை வென்றது இல்லை. முதல் முறையாக 1947-48-ம் ஆண்டு ஆஸ்திரேலியா சென்றது. 5 டெஸ்ட் கொண்ட தொடரை 0-4 என்ற கணக்கில் இழந்தது. அதன்பிறகு 1967-ம் ஆண்டு 0-4 என்ற கணக்கிலும், 1977-ம் ஆண்டு 2-3 என்ற கணக்கிலும் இழந்தது.

1980-ம் ஆண்டு 1-1 என்ற கணக்கில் சமநிலையில் முடிந்தது. 1985-ம் ஆண்டு 3 டெஸ்டும் “டிரா” ஆனது. 1991-92ம் 0-4 என்ற கணக்கிலும், 1999-2000-ம் ஆண்டு 0-3 என்ற கணக்கிலும், 2007-08-ம் ஆண்டு 1-2 என்ற கணக்கிலும் தொடரை இழந்தது.

2003-ம் ஆண்டு 1-1 என்ற கணக்கில் சமநிலையில் முடிந்தது. ஆஸ்திரேலியாவில் இந்தியா 6 முறை தொடரை இழந்துள்ளது. 3 முறை தொடர் சமநிலையில் முடிந்தது.

இந்திய அணி 2004-ம் ஆண்டு 7 விக்கெட் இழப்புக்கு 705 ரன் குவித்ததே (சிட்னி) அதிகபட்ச ஸ்கோர் ஆகும். ஆஸ்திரேலியா 1947-ம் ஆண்டு 674 ரன் (அடிலெய்ட்) குவித்து இருந்தது.

இந்திய அணி 1947-ம் ஆண்டு 58 ரன்னில் (பிரிஸ்பேன்) சுருண்டதே குறைந்தபட்ச ஸ்கோர் ஆகும். ஆஸ்திரேலியா 1980-ம் ஆண்டு 83 ரன்னில் (மெல்போர்ன்) சுருண்டு இருந்தது.

தெண்டுல்கர் 31 டெஸ்டில் 3151 ரன் எடுத்துள்ளார். அதிகபட்சம் 241 ரன் ஆகும். 11 சதம் அடித்துள்ளார். லட்சுமண் 2279 ரன் எடுத்துள்ளார். 6 சதம் அடித்துள்ளார். அதிகபட்சம் 281 ரன் ஆகும்.பாண்டிங் 25 டெஸ்டில் 2011 ரன் எடுத்துள்ளார். அதிகபட்சம் 257 ஆகும்.

கும்பளே 20 டெஸ்டில் 111 விக்கெட் கைப்பற்றியுள்ளார். ஆஸ்திரேலிய வீரர்களில் பெர்ட்லீ 53 விக்கெட் (12 டெஸ்ட்) கைப்பற்றியுள்ளார்.

மாலைமலர்