இலங்கை கடற்படை மீண்டும் தாக்குதல்: தமிழக மீனவர்கள் 7 பேர் நிர்வாணமாக்கி சித்ரவதை

by மீனு Tue Sep 29, 2009 2:24 am

மீன்பிடிக்க சென்ற அக்கரைபேட்டை மீனவர்கள் 7 பேரை இலங்கை கடற்படையினர் நிர்வாணமாக்கி அடித்து சித்ரவதை செய்துள்ள சம்பவத்தால் நாகை, காரைக்காலில் பதற்றம் ஏற்பட்டுள்ளது.

நாகை கீச்சான்குப்பத்தை சேர்ந்த மீனவர்கள் 18 பேர் கடந்த 25-ம் தேதி இரவு மீன்பிடிக்க சென்றனர். சர்வதேச எல்லையில் இழுவை வலை மூலம் மீன்பிடித்துக் கொண்டிருந்தனர். அப்போது இலங்கை கடற்படையினர் துப்பாக்கியால் சுட்டபடி, 3 படகுகளையும் சுற்றி வளைத்தனர்.

பின்னர் 18 பேரையும், செல்வமணி என்பவரின் படகில் நிர்வாணமாக நிற்கவைத்து ரப்பர் கயிற்றால் தாக்கினர். தலையில் ஐஸ்கட்டிகளை சுமக்க வைத்தனர். மீனவர்களின் வெள்ளி அரைஞாண் கயிற்றையும் அறுத்து எடுத்துக்கொண்டனர்.

மீன்களை எடுத்துக்கொண்டு வலைகளை அறுத்தெறிந்தனர். அதன்பின் விடுவிக்கப்பட்ட மீனவர்கள், படகில் இருந்த சாக்குகளை இடுப்பில் சுற்றிக்கொண்டு, நாகை துறைமுகம் அருகேயுள்ள பழைய மீன் இறங்கு தளத்திற்கு நேற்று காலை படகில் வந்து சேர்ந்தனர்.

இந்நிலையில் அக்கரைபேட்டையை சேர்ந்த மீனவர்கள் இலங்கை கடற்படையினர் மீண்டும் தாக்கியுள்ளது, அப்பகுதியில் பரபரப்பை ஏற்படுத்தியுள்ளது.

நாகை அக்கரைபேட்டையை சேர்ந்த வரதராஜன் என்பவருக்கு சொந்தமான படகில் அதே பகுதியை சேர்ந்த 7பேரும், காரைக்காலை சேர்ந்த 114 மீனவர்கள் 19 படகுகளிலும், கடந்த 26ம் தேதி காலை மீன்பிடிக்க சென்றனர்.

கோடியக்கரை அருகே நடுக்கடலில் நேற்று மீன்பிடித்துக்கொண்டிருந்தபோது, இலங்கை கடற்படையினர் துப்பாக்கி முனையில் சுற்றி வளைத்தனர். இதில் 8 படகு மீனவர்கள் தப்பி இன்று காலை நாகை துறைமுகத்துக்கு வந்தனர். ஆனால் வரதராஜன் என்பவரது படகை சுற்றி வளைத்த இலங்கை கடற்படையினர், மீன்கள், ஜி.பி.எஸ். கருவி மற்றும் வலைகளை பறித்துக்கொண்டனர். பின்னர் ஜெகன்நாதன் உள்பட 7 பேரை நிர்வாணமாக்கி இரும்பு தடி மற்றும் ரப்பர் டீயூப்பால் அடித்து சித்ரவதை செய்து அனுப்பினர். இவர்களும் கோணிபைகளை உடுத்திக்கொண்டு இன்று காலை கரைக்கு வந்தனர்.

இதுகுறித்து மீன்வளத்துறை மற்றும் நாகை டவுன் காவல் நிலையத்தில் புகார் செய்யப்பட்டுள்ளது. .

இதேபோல் ஜெகதாப்பட்டினத்தில் இருந்து நேற்றுமுன்தினம் 157 விசைப் படகுகளில் மீன் பிடிக்கச் சென்ற மீனவர்களையும் இலங்கை கடற்படையினர் அடித்து உதைத்து விரட்டியடித்தனர்.