லோக்பால் மசோதா நிறைவேறியது

by **சிவா** Wed Dec 28, 2011 1:16 pm

லோக்பால் மசோதா மீது, பாராளுமன்றத்தில் நேற்று இரவு 11 மணி வரை நடந்த விவாதத்துக்கு பின் ஓட்டெடுப்பு மூலம் மசோதா நிறைவேற்றப்பட்டது.

பாராளுமன்ற மக்களவையில் லோக்பால் மசோதா மீது நேற்று அனல் பறக்கும் விவாதம் நடந்தது.

இந்த மசோதா பலவீனமாகவும், அரசியல் சட்டத்துக்கு விரோதமாகவும் இருப்பதாக குற்றம் சாட்டிய எதிர்க்கட்சி தலைவர் சுஷ்மா சுவராஜ், மசோதாவை மீண்டும் பாராளுமன்ற நிலைக்குழுவுக்கு அனுப்பி வலுவான மசோதாவாக மாற்றியமைக்க வேண்டும் என்று கேட்டுக்கொண்டார்.

எதிர்ப்பு

எதிர்க்கட்சிகள் மட்டுமின்றி, திரிணாமுல் காங்கிரஸ், தி.மு.க. உள்ளிட்ட காங்கிரஸ் கூட்டணி கட்சிகளும் மசோதாவுக்கு கடும் எதிர்ப்பு தெரிவித்தன. இந்த விவாதத்தின்போது பிரதமர் மன்மோகன்சிங் குறுக்கிட்டு பேசினார்.

தனது 15 நிமிட உரையில், ஐக்கிய முற்போக்கு கூட்டணி அரசின் சாதனைகளை பட்டியலிட்ட பிரதமர் மன்மோகன்சிங், வலுவான லோக்பால் மசோதாவை நிறைவேற்ற மத்திய அரசு உறுதி பூண்டு இருப்பதாக தெரிவித்தார்.

லோக்பால் மசோதாவுக்கு, அ.தி.மு.க. உறுப்பினர்களும் எதிர்ப்பு தெரிவித்தனர். எம்.தம்பிதுரை (அ.தி.மு.க.) பேசுகையில், பிரதமரை லோக்பால் வரம்புக்குள் கொண்டு வருவதற்கும், மாநிலங்களில் லோக் அயுக்தா நியமனத்துக்கும் எதிர்ப்பு தெரிவித்தார்.

லோக் அயுக்தா நியமனம், மாநில உரிமைகளை பறிப்பதாக அமையும் என்றும், சட்டம் இயற்றும் உரிமை மாநில அரசுகளிடமே இருக்க வேண்டும் என்றும் காங்கிரஸ் கூட்டணி கட்சி உறுப்பினரான டி.கே.எஸ்.இளங்கோவன் (தி.மு.க.) எதிர்ப்பு தெரிவித்தார்.

திரிணாமுல் காங்கிரஸ்

காங்கிரசின் கூட்டணி கட்சியான திரிணாமுல் காங்கிரஸ் உறுப்பினர் கல்யாண்பானர்ஜியும் லோக் அயுக்தா அமைப்பதற்கு எதிர்ப்பு தெரிவித்தார். மேலும் இந்த மசோதாவை உடனடியாக (நேற்றே) நிறைவேற்ற வேண்டும் என்பதற்கும் கண்டனம் தெரிவித்த அவர், ஒருசிலரின் உண்ணாவிரத போராட்டத்திற்காக பாராளுமன்றத்தின் கவுரவத்தை விட்டுக்கொடுப்பதா? என்றும் அவர் கேள்வி எழுப்பினார்.

தேசியவாத காங்கிரஸ் உறுப்பினர் சுப்ரியா சுலேவும் நிர்ப்பந்தம் காரணமாக மசோதாவை நிறைவேற்றக்கூடாது என்று வற்புறுத்தினார். பிரதமரை லோக்பால் வரம்புக்குள் கொண்டு வருவதற்கும் அவர் எதிர்ப்பு தெரிவித்தார்.

முக்கிய திருத்தங்கள்

மத்திய அரசின் புதிய லோக்பால் மசோதாவுக்கு பாராளுமன்றத்தில் கடும் எதிர்ப்பு தெரிவிக்கப்பட்டது. இதனால் மசோதாவில் சில முக்கிய திருத்தங்களை கொண்டுவர மத்திய அரசு முடிவு செய்தது. அது குறித்து நேற்று இரவில் காங்கிரஸ் கட்சியின் மேலிட தலைவர்கள் நேற்று அவசரமாக கூடி விவாதித்தனர்.

காங்கிரஸ் தலைவர் சோனியா, பிரதமர் மன்மோகன்சிங், உள்ளிட்ட மத்திய மந்திரிகள், சோனியாவின் அரசியல் ஆலோசகர் அகமது பட்டேல் ஆகியோர் கலந்து கொண்ட இந்த கூட்டத்தில், மசோதாவில் கொண்டு வரவேண்டிய திருத்தங்கள் குறித்து விவாதிக்கப்பட்டது.

திருத்தங்கள் நிராகரிப்பு

இதற்கிடையில், விவாதத்தின்போது லோக்பால் மசோதாவுக்கு அரசு தரப்பில் 10 திருத்தங்களும், மற்ற கட்சிகள் சார்பில் 46 திருத்தங்களும் கொண்டு வரப்பட்டன. நிதி மந்திரி பிரணாப் முகர்ஜி விவாதத்துக்கு பதில் அளித்து பேசியபின், திருத்தங்கள் ஒவ்வொன்றாக பரிசீலனைக்கு எடுத்துக்கொள்ளப்பட்டன.

இடதுசாரி கட்சிகள் சார்பில் கொண்டுவரப்பட்ட திருத்தங்கள் நிராகரிக்கப்பட்டன. லோக்பால் வரம்புக்குள் தனியார் நிறுவனங்களை கொண்டுவரக்கோரும் திருத்தம் நிராகரிக்கப்பட்டது. மாநிலங்களில் லோக் அயுக்தா தொடர்பாக அ.தி.மு.க. கொண்டு வந்த தீர்மானமும் நிராகரிக்கப்பட்டது.

மசோதா நிறைவேறியது

பின்னர் 11 மணி அளவில், 2011-ம் ஆண்டு லோக்பால் மசோதா மற்றும் லோக்பால், லோக் அயுக்தா அமைப்புகளுக்கு அரசியல் சட்ட அந்தஸ்து வழங்குவதற்கான அரசியல் சட்ட திருத்த மசோதா ஆகிய இரு மசோதாக்களும் குரல் ஓட்டெடுப்பு மூலம் நிறைவேற்றப்பட்டன.

அ.தி.மு.க. வெளிநடப்பு

முன்னதாக, ஓட்டெடுப்பில் கலந்து கொள்ளாமல் சமாஜ்வாடி மற்றும் பகுஜன் சமாஜ் ஆகிய இரு கட்சி உறுப்பினர்களும் வெளிநடப்பு செய்தனர். லோக்பால் மசோதா நிறைவேற்றப்பட்டதாக அறிவிக்கப்பட்டதும் இடதுசாரி கட்சிகள், அ.தி.மு.க. மற்றும் பிஜ× ஜனதா தளம் கட்சி உறுப்பினர்கள் வெளிநடப்பு செய்தனர்.

பாராளுமன்ற மக்களவையில் லோக்பால் மசோதா நிறைவேறினாலும், மேல்-சபையில் ஆளும் கூட்டணிக்கு போதிய பெரும்பான்மை பலம் இல்லாததால், அங்கு நிறைவேறுவது கடினம் என்று எதிர்பார்க்கப்படுகிறது.

தினதந்தி