காரைக்குடியில் கரடிக்கே பல் துலக்கிய ஆள்யா நானு!

goppi · goppi Wed 21 Dec 2011 - 22:10

உட்துறை அமைச்சர் சிதம்பரத்தை உடும்பு பிடியாக பிடித்துக் கொண்டிருக்கிறது பாரதீய ஜனதா கட்சி. நாடாளுமன்றத்தில் ப.சிதம்பரம் பாக்கு சாப்பிடக்கூட வாய் திறக்க முடியாத நிலையை தொடர்ந்து ஏற்படுத்தி, சிதம்பரத்தையும், அரசையும் வெறுப்பேற்றிக் கொண்டிருக்கிறார்கள் அவர்கள்.

நேற்றும் (செவ்வாய்க்கிழமை) நாடாளுமன்றத்தில் சிதம்பரத்துக்கு எதிரான கூச்சல் உச்சத்திலேயே ஒலித்தது.

சிதம்பரம் நேரில் கலந்து கொள்ளளாத ராஜ்ய சபாவிலேயே நேற்று சிதம்பரம் விவகாரம்தான் ட்ரம் கார்டு!

ராஜ்ய சபா அமர்வு தொடங்கியவுடன் பிலிப்பீன்ஸில் ஏற்பட்ட புயல் சேதங்களுக்கு இரங்கல் தீர்மானம் கொண்டுவரப்பட்டது. அப்போது சபை மிக அமைதியாகக் காணப்பட்டது. ஓகோ, இன்று சபை சுமுகமாக நடைபெறப் போகின்றதோ என்று நினைத்த வேளையில், இரங்கல் தீர்மானம் முடிந்தவுடன் துள்ளி எழுந்தார் பா.ஜ.க. எம்.பி. சந்தன் மித்ரா.

சிதம்பரம் தொடர்பாக ஸ்பெக்ட்ரம் ஊழல் தொடர்பாக முதலில் குரல் கொடுத்த அவர், ஹோட்டல் அதிபர் குப்தாவுக்கு உதவி செய்ததில் சிதம்பரம் தனது பதவியை துஷ்பிரயோகம் செய்தது தொடர்பாகவும் ஆவேசமாக குரல் எழுப்பினார். உடனே சபை குழம்பத் தொடங்கியது. காங்கிரஸ் எம்.பி.க்கள் இவரது பேச்சை மறுக்க, பா.ஜ.க.-வினர் ஆதரிக்க, ஒரே அமர்க்களமாக இருந்தது.

இந்த நிலைமையில், இடையே மற்றொரு ட்ராக்கில் ஓடத் தொடங்கினார்கள் கம்யூனிஸ்ட் எம்.பி.க்கள். கம்யூனிஸ்டு கட்சியின் கேரள உறுப்பினர் ராஜிவ் எழுந்து குரல் கொடுத்தார். அதுவும், சிதம்பரத்துக்கு எதிராகத்தான்! முல்லைப் பெரியாறு அணை பிரச்னை குறித்து சிதம்பரம் தெரிவித்த கருத்தை விமர்சித்து அவர் குரல் எழுப்ப, அவருக்கு ஆதரவாக வேறு கம்யூனிஸ் உறுப்பினர்களும் எழுந்து கோஷமிட்டனர்.

சிதம்பரத்துக்கு எதிராக எல்லாத் திசையில் இருந்தும் வரும் கூச்சல்களைப் பார்த்த சபாநாயகர், “ஒன்றா ரெண்டா..” என்று பாடாத குறையாக சபையை ஒத்தி வைத்துவிட்டு எழுந்து சென்றார்.

சிதம்பரம் நேரில் செல்லாத ராஜ்ய சபாவிலேயே அர்ச்சனை இப்படியென்றால், அவர் நேரில் கலந்துகொண்ட லோக் சபாவில் காட்சி எப்படி இருந்திருக்கும்? சங்காபிஷேகமே நடத்தி விட்டார்கள் பா..க. எம்.பி.க்கள். அவர்களுக்கு ஆதரவாக நம்ம அ.தி.மு.க. எம்.பி.க்களும் கொதி நிலையில் குதித்துக் கொண்டிருந்தார்கள்.

லோக் சபாவில் சிதம்பரம் மீது உரிமை மீறல் தீர்மானம் கொண்டு வர பா.ஜ.க. மனு கொடுத்திருந்தது. சபை தொடங்கிய உடனேயே, அது தொடர்பாக கேள்விகள் பா.ஜ.க. தரப்பில் இருந்து வந்து விழத் தொடங்கின. சபாநாயகர் மீரா குமார், “அதைப் பரிசீலித்துவிட்டு பதில் தருகிறேன். சிறிது அவகாசம் தாருங்கள். அதுவரை கேள்வி நேரம் தொடரட்டும்” என்றார்.

கேள்வி நேரத்தில் பதிலளிக்க எழுந்தது வேறு யாருமல்ல, சாட்சாத் சிதம்பரம்தான். விடுவார்களா பா.ஜ.க. எம்.பி.க்கள்? கூச்சல், கோஷம் என்று விசிலடிப்பதைத் தவிர எல்லாமே அரங்கேறின. சிதம்பரமும் விடாக்கண்டனாக பதில் கூறிக்கொண்டிருந்தார்.

அந்தக் கூச்சலில் அவரது வாய் கூறிய பதில்களை அவரது காதுகூட கேட்டிருக்குமோ என்பது சந்தேகம்தான்! சும்மா சொல்லக்கூடாது ஒத்தை ஆளாக நின்று எத்தனை சபைகளில், எத்தனை குழப்பங்கள் ஏற்படக் காரணமாக இருக்கிறார் அமைச்சர் சிதம்பரம்.

நல்ல வேளையாக இவரை ஐ.நா. சபைக்கு அனுப்பவில்லை மத்திய அரசு!

மகா பிரபு · மகா பிரபு Wed 21 Dec 2011 - 22:16

நன்றி http://viruvirupu.com என்று கண்டிப்பாக பதிய வேண்டும். மேலும் உங்களை இந்த முகவரியில் சென்று அறிமுகம் செய்து கொள்ளுங்கள். http://www.eegarai.net/f1-forum