விடுப்பு எடுக்காமல் பள்ளிக்கு வந்தால் ரொக்க பரிசு : மாணவர் திறனை மேம்படுத்த திட்டம்

பள்ளியில் மாணவ மாணவியர், விடுப்பு எடுக்காமல் 100 சதவீதம், வகுப்புக்கு வந்தால், 1,000 ரூபாய் ரொக்க பரிசு வழங்க மாநகராட்சி திட்டமிட்டுள்ளது. மாணவர்களின் கல்வித்திறனை மேம்படுத்த இந்த முயற்சி மேற்கொள்ளப்படுகிறது.

தமிழக அரசு மாணவர்களின் கல்வித்திறனை மேம்படுத்த பல்வேறு முயற்சிகளை எடுத்து வருகிறது. மாணவர்கள் புத்தகப்பைகளை பொதி மூட்டை போல் சுமந்து செல்வதை தடுக்கும் வகையில், தேர்வு முறையிலும் அடுத்த ஆண்டு முதல் மாற்றம் கொண்டு வரப்படுகிறது. இதன்படி, பருவமுறைத் தேர்வுகள் நடத்தப்பட உள்ளன. இதை பெற்றோர், ஆசிரியர்கள் வரவேற்றுள்ளனர்.

இதுபோன்று, சென்னை மாநகராட்சி பள்ளி மாணவ, மாணவியரை ஊக்கப்படுத்தும் வகையில், பல்வேறு சிறப்புத் திட்டங்களை ஏற்கனவே செயல்படுத்தி வருகிறது. தற்போது, கூடுதலாக சிறப்புத் திட்டம் ஒன்றை கொண்டு வருகிறது.

தனியார் பள்ளிகளில் விடுப்பு இன்றி வரும் மாணவர்களுக்கு ஆண்டு விழாவில் பரிசளிப்பது வாடிக்கையாக உள்ளது. சில பள்ளிகளில், மாணவர்களின் பெயரை ஆண்டு மலர், டைரியிலும் படத்துடன் பிரசுரித்து ஊக்கப்படுத்தப்படுகின்றனர். இதனால் மாணவர்கள், விடுப்பு எடுக்காமல், அடம்பிடித்து பள்ளிக்கு செல்லும் ஆர்வம் ஏற்படுகிறது.

தனியார் பள்ளிகளில் கடைபிடிப்பது போன்று சிறப்புத் திட்டத்தை சென்னை மாநகராட்சி நடத்தும் பள்ளிகளில் நடைமுறைப்படுத்த முடிவு செய்துள்ளது. மாநகராட்சியால் நடத்தப்பட்டு வரும், 284 சென்னை பள்ளிகளில், 100 சதவீதம் வருகை தரும் மாணவர்களுக்கு, 1,000 ரூபாய் ஊக்கப்பரிசு வழங்கப்பட உள்ளது. நடப்பு கல்வியாண்டு முதல், இது நடைமுறைக்கு வருகிறது. ஆண்டுதோறும் சுதந்திர தின விழாவின் போது, இந்த பரிசு வழங்கப்பட உள்ளது.

மாநகராட்சி அதிகாரி ஒருவர் கூறியதாவது: மாநகராட்சி பள்ளிகளின் தரம், தனியார் பள்ளிகளை விட மேம்பட்டுள்ளது. அரசு பொதுத் தேர்வுகளிலும், மாணவர்கள் சாதித்து வருகின்றனர். அரசு பொதுத் தேர்வுகளில் தேர்ச்சி சதவீதம், 86, 87 சதவீதத்தையும் தாண்டியுள்ளது. மாநிலத்தின் ரேங் பட்டியலில், மாநகராட்சி பள்ளி மாணவர்களும் இடம்பிடிக்கும் அளவுக்கு தரம் மேம்பட்டுள்ளது.

தனியார் பள்ளிகளில் குழந்தைகளை சேர்க்க பெற்றோர் நீண்ட வரிசையில் காத்திருப்பது போன்ற நிலையை சில மாநகராட்சி பள்ளிகளும் உருவாக்கியுள்ளன. இது கல்வித்தரத்தில் உள்ள முன்னேற்றத்தை காட்டுகிறது. மாணவ, மாணவியரின் 100 சதவீத வருகைக்கு பரிசு வழங்குவது, கல்வித் திறனை மேலும் மேம்படுத்தும் என்று நம்புகிறோம். இவ்வாறு மாநகராட்சி அதிகாரி கூறினார்.

சென்னை மாநகராட்சி, பல்வேறு நகராட்சி, பேரூராட்சி, ஊராட்சி பகுதிகளை ஒன்றிணைத்து, கிரேட்டர் சென்னையாக விரிவாக்கம் செய்யப்பட்டுள்ளது. விரிவாக்கப் பகுதிகளில் உள்ள பள்ளிகளையும், மாநகராட்சியுடன் இணைந்து, ஒருங்கிணைக்க முயற்சி நடந்து வருகிறது. இந்த ரொக்கப் பரிசு திட்டம், விரிவாக்கப் பகுதி பள்ளிகளிலும் செயல்படுத்த மாநகராட்சி திட்டமிட்டுள்ளது.

இதுவரை மாநகராட்சி செய்தது?

* அனைத்து மாணவர்களுக்கு இலவச வண்ண சீருடைகள்

* 6 முதல் 8ம் வகுப்பு வரை "ஆங்கிலம்-தமிழ்' விளக்க அகராதி

* 1 முதல் 5ம் வகுப்பு வரையுள்ள மாணவர்களுக்கு "ஷூ'

* 10, பிளஸ் 2 மாணவர்களுக்கு சிறப்பு வகுப்புகளில், "பிஸ்கட்'

* தேர்வாகும் 25 மாணவர்களுக்கு தேசிய கல்விச் சுற்றுலா

* பிளஸ் 2 தேர்வில் பள்ளி அளவில் முதலிடம் பெறுபவருக்கு லேப்-டாப்

* மாணவியருக்கு "சானிடரி நாப்கின்'

* ஆங்கில பேச்சு பயிற்சி

- நமது சிறப்பு நிருபர் -

தினமலர்

வாழ்த்துக்கள்.

மேலும் வளர மீண்டும் வாழ்த்துக்கள்