ப.சிதம்பரம் கருத்துக்கு, கேரளாவில் காங்கிரஸ் கடும் எதிர்ப்பு

முல்லைப்பெரியாறு அணை பிரச்சினையில் மத்திய உள்துறை மந்திரி ப.சிதம்பரம் தெரிவித்த கருத்துக்கு, கேரள மாநில காங்கிரஸ் தலைவர்கள் கடும் எதிர்ப்பு தெரிவித்தனர்.

இடைத்தேர்தல் அச்சம்

மத்திய உள்துறை மந்திரி ப.சிதம்பரம் நேற்று சென்னையில் நடைபெற்ற நிகழ்ச்சி ஒன்றில் கலந்து கொண்டு பேசியபோது முல்லைப்பெரியாறு அணை பிரச்சினையில் கேரள அரசின் அச்ச உணர்வு குறித்து கருத்து தெரிவித்தார்.

அப்போது அவர், "கேரள அரசின் அச்சம் தேவையற்றது. அது நிரந்தரமான அச்சம் அல்ல. இடைக்கால அச்சம்கூட அல்ல. கேரளாவில் பிரவம் தொகுதியில் நடைபெற இருக்கும் இடைத்தேர்தல் அச்சம்தான்'' என்று கேரள அரசுக்கு எதிராக கருத்து தெரிவித்து இருந்தார்.

முதல்-மந்திரி புகார்

கேரளாவில் உம்மன்சாண்டி தலைமையில் காங்கிரஸ் கூட்டணி ஆட்சி நடைபெற்று வருகிறது. ப.சிதம்பரத்தின் இந்த கருத்துக்கு உம்மன் சாண்டி கடும் எதிர்ப்பு தெரிவித்துள்ளார். `முதலில், சிதம்பரம் கருத்து பற்றி காங்கிரஸ் மேலிடத்தில் புகார் தெரிவிப்போம். கேரள அரசும், காங்கிரஸ் கட்சியும் தங்கள் எதிர்ப்பை தெரிவிக்கும்' என்று உம்மன் சாண்டி கூறினார்.

மேலும், காங்கிரஸ் தலைவர்களும் ப.சிதம்பரம் கருத்துக்கு கடும் எதிர்ப்பு தெரிவித்தனர். `பிரதமர் மன்மோகன்சிங் பிரச்சினைக்கு தீர்வு காண முயற்சி மேற்கொண்டுள்ள நேரத்தில் ப.சிதம்பரத்தின் இந்த கருத்து மிக மிக துரதிர்ஷ்டவசமானது' என்று மாநில காங்கிரஸ் தலைவர் ரமேஷ் சென்னிதாலா கண்டனம் தெரிவித்தார்.

மந்திரி கண்டனம்

அவருடைய தவறான இந்த கருத்து பிரதமரின் கவனத்துக்கு கொண்டு செல்லப்படும் என்றும் அவர் தெரிவித்தார். கூட்டணி கட்சியான கேரள காங்கிரஸ் (எம்)-ஐ சேர்ந்தவரும், நீர்ப்பாசனத்துறை மந்திரியுமான பி.ஜே.ஜோசப், ப.சிதம்பரம் பதவிப்பிரமாண உறுதிமொழியை மீறிவிட்டதால், அவர் மந்திரி பதவியில் நீடிக்கும் உரிமையை இழந்துவிட்டார். பிரதமர் மன்மோகன்சிங் அவரை பதவி நீக்க வேண்டும் என்று வற்புறுத்தினார்.

பா.ஜனதா-மார்க்சிஸ்ட்

மார்க்சிஸ்ட் கம்யூனிஸ்டு கட்சி தலைவரும், சட்டசபை எதிர்க்கட்சி தலைவருமான வி.எஸ்.அச்சுதானந்தனும் ப.சிதம்பரத்தை பதவி நீக்கம் செய்ய வற்புறுத்தினார்.

கேரள தொழில்துறை மந்திரி பி.கே.குஞ்சாலி குட்டி, கேரளாவைச் சேர்ந்த காங்கிரஸ் எம்.பி.க்கள் ஷாநவாஸ், பி.டி.தாமஸ், மூத்த காங்கிரஸ் தலைவர் வி.எம்.சுதீரன், மார்க்சிஸ்ட் கம்யூனிஸ்டு கட்சியின் மேலிட குழு உறுப்பினர் கொடியேறி பாலகிருஷ்ணன், அக்கட்சியின் மாநில செயலாளர் பினராயி விஜயன், நீர்ப்பாசனத்துறை முன்னாள் மந்திரியும், புரட்சிகர சோசலிஸ்ட் கட்சியின் தலைவருமான பிரேமச்சந்திரன் ஆகியோரும் சிதம்பரம் கருத்துக்கு கடும் எதிர்ப்பு தெரிவித்துள்ளனர்.

ப.சிதம்பரம் மத்திய மந்திரி என்பதை மறந்துவிட்டு உள்ளூர் தலைவர் போல் பேசுகிறார் என்று அவர்கள் குற்றம் சாட்டினர். பா.ஜனதா மாநில தலைவர் வி.முரளிதரன் கூறும்போது, இந்த பிரச்சினையில் `காங்கிரசின் நாடகம்' அம்பலமாகிவிட்டதாக குற்றம் சாட்டினார்.

தினதந்தி

:ப.சிதம்பரம் மத்திய மந்திரி என்பதை மறந்துவிட்டு உள்ளூர் தலைவர் போல் பேசுகிறார் என்று அவர்கள் குற்றம் சாட்டினர்.”

உள்துறை அமைச்சா் அங்கு சென்று தமிழகத்தின் உ்மை நிலையையும், கேரளத்தின் தவறான கணிப்பையும் அவா்கள் பூியும்படி சொல்லியிரந்தால் பாராட்டுக்கூியது. அவா் அதை விட்டுவிட்டு இப்படி பேசுவது அரசியல்தான். மத்தியில் உயா்பதவி வகிப்பவா் தனது செல்வாக்கை பயன்படுத்தி பேச வேண்டிய இடத்தில் சாியான காரணங்களை தனது கேருத்துக்களை பதிவு செய்து தீா்வு காண்பதை விட்டுவிட்டு இப்படி செய்தால் அப்படிப்பட்ட விமா்சனம் வரத்தானே செய்யும்.. அவா் செய்தத பேசியது அரசியலே தவிர வேறல்ல.