எகிப்து நாட்டில் மீண்டும் கலவரம்; ராணுவம் சுட்டதில் 8 பேர் பலி 260 பேர் காயம்

எகிப்து நாட்டில் மீண்டும் பயங்கர கலவரம் வெடித்தது. போராட்டக்காரர்கள் பெட்ரோல் குண்டுகளை வீசி தாக்கினர். இதனை ஒடுக்க ராணுவம் துப்பாக்கி சூடு நடத்தியதில் 8 பேர் பலியானார்கள். 260 பேர் படுகாயம் அடைந்தனர்.

மீண்டும் கலவரம்

எகிப்து நாட்டில் அதிபராக இருந்த முபாரக்குக்கு எதிராக போராட்டம் நடைபெற்று அவர் ஆட்சியில் இருந்து அகற்றப்பட்டார். பிறகு ஆட்சி நிர்வாகத்தை ராணுவம் ஏற்று தேர்தல் நடத்தப்பட்டது. இத்தேர்தலில் ஓட்டுப்பதிவு பெரும்பாலும் அமைதியாக நடந்தது. நேற்று முன்தினம் 2-வது கட்ட தேர்தல் முடிந்தது.

என்றாலும் ஓட்டுப்பதிவு நடக்கும்போதே ராணுவ ஆட்சிக்கு எதிராக சில இடங்களில் ஆர்ப்பாட்டங்கள் நீடித்தன. இந்நிலையில் தலைநகர் கெய்ரோவில் திடீரென்று மீண்டும் கலவரம் வெடித்தது. நகரின் மத்திய பகுதியில் உள்ள பாராளுமன்றம், மந்திரிசபை அலுவலகம் முன்பு ஏராளமானோர் கூடி முற்றுகையிட்டனர். போராட்டக்காரர்கள் முன்னேறி செல்லாமல் இருக்க ராணுவத்தினர் தடுப்புகளை அமைத்திருந்தார்கள்.

அப்போது போராட்டக்காரர்கள் திடீரென்று ராணுவத்தினர் மீது பெட்ரோல் குண்டுகளையும், கற்களையும் வீசி தாக்கினர். நகரின் பல்வேறு இடங்களில் ஒரு நாள் முழுவதும் வன்முறை சம்பவங்கள் நடந்தது.

8 பேர் பலி

இதனால் கலவரத்தில் ஈடுபட்டவர்களை கலைக்க ராணுவத்தினர் நடத்திய துப்பாக்கி சூடு மற்றும் வன்முறை சம்பவங்களில் 8 பேர் பலியானார்கள். சுமார் 260 பேர் படுகாயம் அடைந்தனர். பலியானவர்களில், `தார்-அல்-இப்தா அமைப்பை சேர்ந்த முக்கிய நிர்வாகி சேக் இமத் இப்பாத் என்பவர் ஒருவர்' என்று அந்த அமைப்பை சேர்ந்தவர்கள் கூறினார்கள்.

ஆனால் ராணுவத்தினர் துப்பாக்கி சூடு எதுவும் நடத்தவில்லை என்று மறுத்தனர். மந்திரிசபை கட்டிடத்திற்குள் போராட்டக்காரர்கள் நுழைய முயன்றதால் தடுக்க முயன்றதாகவும் தெரிவித்தனர். சாவு எண்ணிக்கை 3 பேர் தான் என்றும், பாராளுமன்றத்தின் முன்பு திரண்டவர்களை தடுக்க முயன்ற அதிகாரி தாக்கப்பட்டதால் வன்முறை ஏற்பட்டதாகவும் தெரிவித்தனர்.

ராணுவ உயர் அதிகாரி கூறுகையில், `இந்த வன்முறை தேர்தல் நடைமுறைகளை சீர்குலைப்பதற்காக நடத்தப்படும் சதி செயல்' என்று குற்றம் சாட்டினார். புதிதாக பொறுப்பேற்றுள்ள மந்திரிசபை கூட்டம் முதல் முறையாக நாளை நடப்பதாக இருந்தது. இதற்கிடையில்தான் இந்த பயங்கர வன்முறை ஏற்பட்டுள்ளது.

தினதந்தி