செப்டம்பர்-6

**ரா.ரா3275** · **ரா.ரா3275** Tue Dec 27, 2011 10:29 pm

சிறுமழைத் தூறலின்
பொடி நடையில்
பெருமழைத் தூறலின்
பேச்சரட்டையில்

நனைந்து கொண்டே
உன்னுடன் நானும்
***
வானொழுகி முடித்த
மழையின் மிச்சத்தைப்
பூவொழுகிக் கொண்டிருக்க

இதழுக்கடியில் இணைந்து
துளி தாங்கத் துடிக்கும்
நம்மிரு விரல்கள்
***
ஈரச் சாலையில்
இளம்பசும் புல்வெளியில்
நடை பயிலும்போது
உன் சிறு ஸ்பரிஷத்தால்
உடலில் சேகரமாகும்
‘கிலோவாட்’டில் வராத மின்சாரம்
***
எனக்கே தெரியாமல்
என் னிடையில்
நீ வரையும்
இருவிரல் கோலம்
***
உன்னெழுத்துக்களைப் போலவே
என்னை(யும்) அழகாக்கும்
உன் வார்த்தைகள்
***
நம் மிருவரில்
யாருக்கேனும்
நலம் குறையின்
உடனிருந்து உருகும்
நீ அல்லது நான்
***
விழிமூடித் துயிலும்-நம்மிரு
குழந்தைகள் சயனத்தை
அருகிருந்து ரசிக்கும் நாம்
***
சிறுசிறு ஊடலிலும்
சிருங்காரக் கூடலிலும்
அர்த்தம் சுமக்கும்
அடர் மௌனம்
***
ஓரோர் பொழுதுகளில்
ஒருமையில் அழைத்து
உல்லாசம் கொள்ளும் நான்
‘..ங்க’ மரியாதை செய்யும்
நீ(ங்கள்)
***
காதல் குழைத்த காமம்
காமம் துடைத்த காதல்
“இரண்டிலெது வேண்டும்?”
என்று கேட்கும் நீ

“இரண்டும் குழைத்தது”
என்று சொல்லும் நான்

இப்படி நம் கனவுகள்
நனவாக
ஏற்பாடு செய்தாயிற்றா?
என்றேன்

“மொட்டை மாடி-
முன்புற வாசல்-
தென்னை மரங்களோடு
வீடு பார்த்தாயிற்று

செப்டம்பர்-6 முதல்
சிறகுகள் விரிக்கலாமடி”
என்று
சொல்லிவிட்டுப் போனீர்கள்

உங்களுக்குத் தெரியுமா?
நீங்கள் இல்லாமல்...

நாம்
தாம்பத்ய தவமிருக்கும்
மொட்டை மாடி
கையறு நிலையில்
காய்கிறது

நீங்கள் தமிழ்த்தவம்
செய்யும்
புத்தக அறையில்
புழுதி வ(வா)சிக்கிறது

பூச்செடிகளோடு
முளைத்துப் பூத்த
முன்வாசலில் இப்போது
முட்தோட்டம்

செப்டம்பர்-6க்காக
நான் செய்துவைத்திருந்த
துளிப்படகுகள்
அகதிக் கப்பல்கள்போல்
ஆழ்கடலில்
கவிழ்ந்துபோயின
***
எப்போதும் போலவே
உங்களதும்
விபத்துதானென்று
அறிவித்துவிட்டது அரசாங்கம்

ஆனால்...
கோடம்பாக்கம் பாலத்தில்
நீங்கள் கொட்டிவிட்டுப்போன
நம் கனவுகளை
நான் இன்னும்
தேடிக் கொண்டிருப்பது
யாருக்குத் தெரியும்?
அரசாங்கமா அறியும்?

(காதல்+பெற்றோரால் நிச்சயிக்கப்பட்ட
நண்பரின் திருமணத் தேதி-செப்டம்பர்-6

கோடம்பாக்க மேம்பாலத்தில்
லாரி மோதி இறந்த நாள்-ஜூலை-29

பாதிக்கப்பட்ட சகோதரியின் நிலையில்
நின்று 1998 ஆம் ஆண்டு ஆகஸ்ட்-3ல் எழுதியது)

**இளமாறன்** · **இளமாறன்** Tue Dec 27, 2011 10:53 pm

சிறுசிறு ஊடலிலும்
சிருங்காரக் கூடலிலும்
அர்த்தம் சுமக்கும்
அடர் மௌனம்

இதழுக்கடியில் இணைந்து
துளி தாங்கத் துடிக்கும்
நம்மிரு விரல்கள்
***
ஈரச் சாலையில்
இளம்பசும் புல்வெளியில்
நடை பயிலும்போது
உன் சிறு ஸ்பரிஷத்தால்
உடலில் சேகரமாகும்
‘கிலோவாட்’டில் வராத மின்சாரம்
***
எனக்கே தெரியாமல்
என் னிடையில்
நீ வரையும்
இருவிரல் கோலம்