வாங்க சேமிக்கலாம்

‘‘ஒவ்வொருவரும் சம்பாதிக்கும் தொகையில் ஒரு சதவிகிதத்தையாவது சேமிக்க வேண்டும்’’ என்கிறார் நிதி ஆலோசகர் பவித்ரா.
‘‘இன்றைய சூழலில் பால், பஸ் கட்டணம், கேஸ், மின்சாரம் எல்லாம் நாளுக்கு நாள் ஏறிக்கொண்டே போகிறது. இதில் எங்கு சேமிப்பது என்று கேட்கலாம். ஆனால், ஒருவரின் சேமிப்பு அவர்கள் வாழ்க்கையில் மிக முக்கிய பங்கு வகிக்கிறது.

மாதம் ஒரு லட்ச ரூபாய் சம்பாதிப்பவரால் மட்டுமே சேமிக்க முடியும் என்பதில்லை. ரூபாய் 10 ஆயிரம் சம்பாதிப்பவரும் சிறு தொகையை சேமிக்கலாம். அதற்கு பல வழிகள் உள்ளன. வங்கி சேமிப்பு, இன்சூரன்ஸ், தங்கம், நிலம், மியூச்சுவல் பண்ட், தபால் நிலையம் என வசதிக்கு ஏற்ப சேமிக்கலாம்.
முதலில் நாம் சம்பாதிக்கும் தொகையில் எவ்வளவு சதவிகிதம் சேமிக்க போகிறோம் என்று தீர்மானிக்க வேண்டும். பிறகு அதற்குரிய திட்டங்கள் என்ன என்று அறிந்து செயல்படுவது நல்லது.

இன்சூரன்ஸ் நிறுவனங்கள் வருடா வருடம் பல திட்டங்களை அறிமுகம் செய்கின்றன. குழந்தைகளின் படிப்பு, கல்யாணம், பென்ஷன் பிளான்... என நம் வசதிக்கு ஏற்ப காப்பீட்டு திட்டங்களில் சேரலாம்.

இதில் முழு ஆயுள் காப்பீட்டு திட்டம் உள்ளது. மற்ற திட்டங்கள் எல்லாம் குறிப்பிட்ட வருடங்கள் மட்டும். முழு ஆயுள் காப்பீட்டு திட்டம் ஒருவரின் ஆயுள் முழுதும் இன்சூரன்ஸ் உண்டு. அதற்காக கடைசி வரை பிரிமியம் தொகை கட்ட வேண்டிய அவசியம் இல்லை. குறிப்பட்ட காலம் வரை கட்டினால் போதும். பாலிசி காலம் முடியும் போது அதன் மொத்த தொகையும் பெற்றுக் கொள்ளலாம். அல்லது பாலிசிதாரர் இறந்த பிறகு அந்த தொகை நாமினிக்கு கிடைக்கும் படியும் செய்யலாம்.

மியூச்சுவல் பண்ட், பல பேரிடம் பணத்தை பெற்று அதை லாபம் வரும் துறையில் முதலீடு செய்து அதன் மூலம் வரும் சம்பாத்தியத்தை கொடுக்கும். இதில் பல வகை உள்ளன. நம் வசதிக்கு ஏற்ப தேர்வு செய்துக் கொள்ளலாம்.

அடுத்து பங்குச் சந்தை. ஒவ்வொரு நாளும் இதில் ஏற்ற இறக்கங்கள் இருக்கும். எனவே பங்குச் சந்தையில் முதலீடு செய்யும் போது ப்ளூப் சிப் நிறுவனங்களில் முதலீடு செய்ய வேண்டும். காரணம், பங்குச் சந்தையில் வீழ்ச்சி ஏற்பட்டாலும் இந்த நிறுவனங்களில் அதிக பாதிப்பு ஏற்படாது. மேலும் இது குறித்த செய்திகளை தினசரியில், இன்டர்நெட் அல்லது பங்குச்சந்தை புரோக்கர் மூலம் தெரிந்து கொள்வது அவசியம். இதை ஒரு சேமிப்பாக மட்டுமே கருத வேண்டும். காரணம், இன்றைய சூழலில் மொத்த பணத்தையும் இதில் முதலீடு செய்தால், வீழ்ச்சி ஏற்படும் போது அது பெரிய பாதிப்பை ஏற்படுத்தும். இது ரிஸ்கான துறை என்பதால் அதைப் பற்றி நன்கு தெரிந்து கொண்டு பிறகு சேரலாம்.

எந்த பிரச்னையும் இல்லாத சேமிப்பு என்று வங்கி மற்றும் தபால் நிலைய சேமிப்பை சொல்லலாம். வங்கியில் ரெக்கரிங் மற்றும் பிக்சட் டெபாசிட் உண்டு. இதில் முதலாவது, மாதாமாதம் ஒரு தொகை கட்ட வேண்டும். குறிப்பட்ட காலத்திற்கு பிறகு அதை வட்டியுடன் எடுத்துக் கொள்ளலாம். இரண்டாவதில் ஒரே கட்டணத்தில் தொகை செலுத்தி குறிப்பிட்ட காலத்திற்கு பிறகு வட்டியுடன் சேர்த்து எடுக்கலாம். இதே போன்ற திட்டங்கள் தபால் நிலையத்திலும் உள்ளன. இங்கு வட்டி மிகவும் குறைவு.

இப்போது மக்கள் தங்கம் பக்கம் தங்களின் கவனத்தை திருப்பி உள்ளனர். என்னதான் ஏற்ற இறக்கம் இருந்தாலும் தங்கத்தின் தரம் மற்றும் விலை என்றுமே கையை கடிக்காது. சேமிப்பு எதுவாக இருந்தாலும் பணத்தை முதலீடு செய்யும் முன் அதைப்பற்றி நன்கு யோசித்து செயல்பட வேண்டும். எவ்வளவு தான் சம்பாதித்தாலும் சேமிப்பு இல்லாமல் வாழமுடியாது. எனவே வெற்றிகரமான முதலீட்டை தேர்வு செய்வது நல்லது...’’ என்றார் நிதி ஆலோசகர் பவித்ரா.
& ப்ரியா

தினகரன்

நல்ல பயனுள்ள தகவல்.

“சிக்கனம் தேவை இக்கணம்”