கேரளாவுக்கு பதிலடி கொடுக்க தமிழக சட்டசபையில் இன்று தீர்மானம் : கருணாநிதியும் பங்கேற்க முடிவு

தமிழக சட்டசபையின் சிறப்புக் கூட்டம், இன்று காலை நடக்கிறது. சுப்ரீம் கோர்ட் உத்தரவு காரணமாக, முல்லைப் பெரியாறு அணை தொடர்பாக நிறைவேற்றப்படும் தீர்மானம், கடுமையாக இருக்காது என்று கூறப் படுகிறது. முல்லைப் பெரியாறு பிரச்னை தீவிரமடைந்து வருவதால், தமிழக அரசியல் கட்சிகள் அனைத்தும், இவ்விஷயத்தில் ஒரே கருத்தைக் கொண்டுள்ளன என்பதை நிலைநிறுத்த வேண்டிய அவசியம் ஏற்பட்டது. கேரள அரசு அனைத்துக் கட்சிக் கூட்டம், சிறப்பு சட்டசபைக் கூட்டம் போன்றவற்றை நடத்தியது.

இந்நிலையில், தமிழகமும் சிறப்பு சட்டசபைக் கூட்டத்தை நடத்தி, ஒருமித்த கருத்துடன் தீர்மானம் நிறைவேற்ற இருப்பதாக, முதல்வர் ஜெயலலிதா அறிவித்தார். இதன்படி, இன்று காலை 11 மணிக்கு சட்டசபையை கூட்ட, கவர்னர் ரோசய்யா உத்தரவிட்டுள்ளார். இக்கூட்டத்தில், முதல்வர் ஜெயலலிதா தீர்மானத்தை முன்மொழிய உள்ளார். அதன் மீது, சட்டசபையில் உள்ள கட்சிகளின் பிரதிநிதிகள் பேச அனுமதிக்கப்படுவர். அவர்கள் பேசியதும், அதற்கு முதல்வர் நன்றி தெரிவித்து பேசுவார். பின்னர், தீர்மானம் நிறைவேற்றப்படும். இரு மாநில அரசுகளும் பதட்டத்தைத் தணிக்க முயற்சிக்க வேண்டுமென, சுப்ரீம் கோர்ட் கடுமையாக தெரிவித்துள்ளது. எனவே, சட்ட சபையில் தமிழக அரசு தரப்பில் கடுமையான விமர்சனங்கள் இருக்காது என்று கூறப்படுகிறது. மேலும், முல்லைப் பெரியாறு அணையில், தமிழகத்தில் உரிமையை விட்டுக் கொடுக்க மாட்டோம் என்ற வகையில் மட்டும் தீர்மானம் நிறைவேற்றப்பட உள்ளது. கேரளா மாநில அரசையோ, அங்குள்ள அரசியல்வாதிகளையோ விமர்சித்து தீர்மானம் இருக்காது என்று கூறப்படுகிறது.

கருணாநிதி பங்கேற்பு:
இன்றைய சட்டசபைக் கூட்டத்தில், தி.மு.க., தலைவர் கருணாநிதி பங்கேற்க உள்ளார். ஆட்சி மாறியதில் இருந்து, அவர் சட்டசபைக் கூட்டத்தில் கலந்து கொள்ளவில்லை. ஒரு முறை மட்டும் வந்து, கையெழுத்து போட்டுவிட்டுச் சென்றார். இந்நிலையில், முல்லைப் பெரியாறு விவகாரம் விஸ்வரூபம் எடுத்துள்ளதால், இன்று நடக்கும் சிறப்புக் கூட்டத்தில், கருணாநிதி கலந்து கொள்ள இருக்கிறார். அவருக்கு, இரண்டாவது வரிசையில் இடம் ஒதுக்கப்பட்டுள்ளது. இதற்கு, சக்கர நாற்காலியில் வர வசதியில்லை. எனவே, அவர் எவ்வாறு சட்டசபைக்கு வருவது, எந்த வழியில் நுழைவது, அவரை இருக்கையில் எங்கு அமர வைப்பது போன்றவை குறித்து நேற்று, சட்டசபை அதிகாரிகளுடன் ஆலோசிக்கப்பட்டது.

dinamalar

ஒன்றுபட்டால் உண்டு வாழ்வு. நம்மில் ஒற்றுமை நீங்கின், அனைவருக்கு தாழ்வு. புரிஞ்சால் சரி.

ஒபெனிங்க எல்லாம் நல்லாதான் இருக்கு...ஆனா உங்ககிட்ட பினிஷிங்க் சரியில்லையே

விஜயகுமார் wrote:ஒன்றுபட்டால் உண்டு வாழ்வு. நம்மில் ஒற்றுமை நீங்கின், அனைவருக்கு தாழ்வு. புரிஞ்சால் சரி.

தீர்மானம் போட்டால் மட்டும் போதாது ... ஒற்றுமையுடன் இருந்தால் சரி தான்