எஸ்.எம்.எஸ். மூலம் சமையல் கியாஸ் சிலிண்டர் பதிவு செய்வதில் குளறுபடி

by **இளமாறன்** Thu Dec 15, 2011 1:20 am

சென்னை, டிச.14-

சமையல் கியாஸ் வினியோகம் செய்வதில் இந்தியன் ஆயில் நிறுவனம், பாரத் பெட்ரோலியம், இந்துஸ்தான் பெட்ரோலியம் ஆகிய 3 நிறுவனங்கள் ஈடுபட்டு வருகின்றன.

மத்திய அரசின் இந்த நிறுவனங்களில் இந்தியன் ஆயில் கார்ப்பரேசன் மட்டும் 60 சதவீத சமையல் கியாஸ் வாடிக்கையாளர்களை பெற்றுள்ளது. சென்னையில் சுமார் 26 லட்சம் சமையல் கியாஸ் இணைப்புகள் இவற்றிக்கு உள்ளன.

அடுத்ததாக பாரத் பெட்ரோலியம் நிறுவனத்திற்கு சுமார் 15 லட்சம் இணைப்புகள் இருக்கின்றன. 3-வது இடத்தில் இந்துஸ்தான் பெட்ரோலியம் நிறுவனம் உள்ளது. கடந்த 3 மாதமாக சமையல் கியாஸ் தட்டுப்பாடு இருந்து வந்தது.

தொழிலாளர்கள் பிரச்சினையால் ஐ.ஓ.சி. யின் சிலிண்டர் வினியோகம் பாதித்தது. அவை படிப்படியாக சரிசெய்து தற்போது நிலைமை சீரடைந்துள்ளது. சிலிண்டர் கேட்டு பதிவு செய்த 4 அல்லது 5 நாளில் சப்ளை செய்யப்படும். தாமதம் ஏற்படாது என்று உயர் அதிகாரி ஒருவர் தெரிவித்தார்.

ஆனால் பாரத், இந்துஸ்தான் நிறுவன சிலிண்டர்கள் இன்னும் தட்டுப்பாடாக இருக்கிறது. பதிவு செய்து 25, 30 நாட்கள் காத்திருந்தும் கிடைக்கவில்லை என பாதிக்கப்பட்ட மக்கள் குமுறுகின்றனர்.

சிலிண்டர் எப்போது கிடைக்கும் என்று கியாஸ் ஏஜென்சிகளும் வாய் திறப்பது இல்லை. முன்பு ஏஜென்சிகளின் அலுவலகத்திற்கு நேரிலோ, போனிலோ தொடர்பு கொண்டால் பதிவு தருவார்கள். ஆனால் எஸ்.எம்.எஸ். மூலம் பதிவு செய்யும் முறை வந்தபிறகு ஏஜென்சிகள் வினியோகம் செய்வது பற்றி விளக்கம் தருவது இல்லை.

எஸ்.எம்.எஸ். மூலம் பதிவு செய்யும் முறையில் ஏஜென்சிகள் முறைகேடு செய்ய வழியில்லை. பொது மக்களுக்கு சிலிண்டர் தட்டுப்பாடு இல்லாமல் கிடைக்க வேண்டும் என்பதற்காக இத்திட்டம் செயல்படுத்தப்பட்டது. ஆனால் அதிலும் பல்வேறு கோளாறுகள் அடிக்கடி நடப்பதால் பொதுமக்கள் பாதிக்கப்படுகின்றனர்.

பாரத் பெட்ரோலிய வாடிக்கையாளர்கள் கடந்த 25 நாட்களாக பெரும் பாதிப்புக்கு ஆளாகி உள்ளனர். எஸ்.எம்.எஸ். மூலம் பதிவு செய்து விட்டோம் என்று நம்பிக்கையுடன் இருந்த வாடிக்கையாளர்களுக்கு அதிர்ச்சி ஏற்பட்டது.

பதிவு செய்து 20 நாட்களாகியும் சிலிண்டர் வராததால் ஏஜென்சியிடம் தொடர்பு கொண்டு கேட்டதற்கு நீங்கள் இன்னும் பதிவு செய்யவே இல்லை... எப்படி சிலிண்டர் அனுப்ப முடியும் என்று பதில் அளித்தனர்.

சென்னையில் உள்ள பாரத் பெட்ரோலிய கியாஸ் நிறுவன வாடிக்கையாளர்கள் பதிவு செய்தும் சிலிண்டர் கிடைக்காமல் அவதிப்பட்டு வருகிறார்கள். சிலர் ஏஜென்சிகளிடம் தகராறு செய்தனர். பதிவு செய்ததற்கான ரசீது எண்ணையும் காண்பித்தனர். குறிப்பிட்ட தேதியில் பதிவு செய்து அதற்கான எண்ணும் தனக்கு வழங்கப்பட்டு இருப்பததாக தெரிவித்தனர்.

ஆனாலும் கியாஸ் ஏஜென்சிகள் பொதுமக்கள் கூறுவதை ஏற்றுக் கொள்ளவில்லை. ஒரு கட்டத்தில் நிலைமை மோசமாகி பிரச்சினை பாரத் பெட்ரோலிய நிறுவன அதிகாரிகளுக்கு சென்றது. அதன்பிறகுதான் தவறு நடந்திருப்பதை அதிகாரிகள் கண்டுபிடித்தனர்.

எஸ்.எம்.எஸ். மூலம் பதிவு செய்யும் கம்ப்யூட்டரில் ஏற்பட்ட கோளாறு காரணமாக பதிவு செய்த வாடிக்கையாளர்களின் எண், பெயர் பதிவு செய்த நாள் ஆகியவை அழிந்து விட்டது தெரியவந்தது. தினமும் பல்வேறு பகுதிகளில் இருந்து பதிவு செய்யும் பொதுமக்கள் கொடுத்த தகவல்கள் அனைத்தும் அழிந்து விட்டது.

இந்த விவரம் அதிகாரிகளுக்கும், கியாஸ் ஏஜென்சிகளுக்கும் தெரியவில்லை. பதிவு செய்த மக்கள் இன்னும் சிலிண்டர் வரவில்லையே என்று பாதிக்கப்பட்டனர். ஒரு சிலிண்டர் இணைப்பு வைத்திருந்தவர்கள் கடும் சிரமத்திற்கு ஆளானார்கள்.

இதுபற்றி பாரத் பெட்ரோலிய அதிகாரியிடம் கேட்டதற்கு, தவறு எங்கள் பக்கம்தான் நடந்துள்ளது. எஸ்.எம்.எஸ். மூலம் பதிவு செய்யப்படும் தகவல்கள் கம்ப்யூட்டர் பதிவாகும். தினமும் ஆயிரக்கணக்கான பதிவுகள் இடம்பெறும். இவற்றில் ஒரு பகுதியை தவிர மற்ற எண்கள் அனைத்தும் அழிந்து விட்டன. கம்ப்யூட்டரில் ஏற்பட்ட தொழில்நுட்ப கோளாறு காரணமாக இந்த தவறு நடந்துள்ளது. அவற்றை சரி செய்துவிட்டோம் என்றார்.

மாலைமலர்

by **Aathira** Thu Dec 15, 2011 2:08 am

பத்து நாள்கள் ஆயிற்று. எனக்கும் இன்னும் வரவில்லை. என்ன கொடுமை.. எல்லாத்துக்கும் மெஷினை நம்பினா இப்படித்தான்.....

இதுல ஒரு மொபைல் எண்ணில் இருந்து கேஸ் பதிவு செய்தால் அதே அலைபேசியில் இருந்துதான் பதிவு செய்யனுமாம். எல்லாம் விதி.
தகவலுக்கு நன்றி இளா.

by **இளமாறன்** Thu Dec 15, 2011 2:47 am

Aathira wrote:பத்து நாள்கள் ஆயிற்று. எனக்கும் இன்னும் வரவில்லை. என்ன கொடுமை.. எல்லாத்துக்கும் மெஷினை நம்பினா இப்படித்தான்.....

இதுல ஒரு மொபைல் எண்ணில் இருந்து கேஸ் பதிவு செய்தால் அதே அலைபேசியில் இருந்துதான் பதிவு செய்யனுமாம். எல்லாம் விதி.
தகவலுக்கு நன்றி இளா.

வரும் ஆனா வராது சிரி