தேச வரலாறு - கினியா

தலைநகர்: கோனாக்ரி

பரப்பளவு: 2 லட்சத்து 45 ஆயிரத்து 857 சதுர கிலோமீட்டர்

மக்கள் தொகை: ஒரு கோடியே 2 லட்சத்து 11 ஆயிரத்து 500

மொழி: பிரெஞ்சு, கினியன்

நாணயம்: கினி பிராங்க்

மதம்: இஸ்லாம், கிறிஸ்தவம், பழங்குடி மதம்

எழுத்தறிவு: 36 சதவீதம்

அமைவிடம்: கினியா முன்னாள் பிரெஞ்சு காலனி. இது மேற்கு ஆப்பிரிக்காவின் அட்லாண்டிக் கடற்கரையோரம் உள்ளது. இதன் வடக்கே கினியா பிஸ்ஸவ், செனகல் மற்றும் மாலி போன்ற நாடுகள் உள்ளன. கிழக்கே ஐவரி கோஸ்ட்டும், தெற்கே சியாரா, லியோன் மற்றும் லைபீரியா போன்ற நாடுகளும் உள்ளன.



சரித்திரம்: கினியா, 9-ம் நூற்றாண்டில் இருந்த கானா பேரரசின் பகுதியாக இருந்தது. அதன் பிறகு பல பேரரசுகள் மாறி விட்டன. 1235-ல் கிரினா போர் நடந்தது. அதன் பின்னர், மாலி பேரரசு ஆட்சிக்கு வந்தது. உள்நாட்டுப் பிரச்சினைகளால் அப்பேரரசு வலுவிழந்தது.

15-ம் நூற்றாண்டில் ஐரோப்பியர் வருகை தந்தனர். அதன் காரணமாக அடிமை வர்த்தகம் ஆரம்பமானது. மாலி பேரரசுக்குப் பிறகு சங்காய் பேரரசு வந்தது. இது நாட்டின் எல்லையையும், வளத்தையும் அதிகரித்தது. 1591-ல் டொண்டிபி போர் நடந்தது. இதன் காரணமாக இந்த ஆட்சி முடிவுக்கு வந்தது.

18-ம் நூற்றாண்டில் இஸ்லாமிய அரசு நிறுவப்பட்டது. 1890-ல் பிரான்ஸ், கினியாவை காலனியாக்கிக் கொண்டது. அப்போது நோயல் பல்லே என்பவரை கவர்னராக நியமித்தது. 1895-ல் பிரெஞ்சு மேற்கு ஆப்பிரிக்காவுடன் இணைக்கப்பட்டது. 28.9.1958-ல் பிரெஞ்சு அதிபர் சார்லஸ் டி கால், ஒரு பொது வாக்கெடுப்பு நடத்தினார். அதனால், கினியா விடுதலை பெற விரும்பியது. அதைத் தொடர்ந்து 2.10.1958-ல் விடுதலை பெற்றது.

கினியாவின் அதிபர் அகமது சீகோ டுரே சோஷலிச கொள்கையைக் கடைபிடித்தார். எதிர்கட்சியினரையும், பேச்சு சுதந்திரத்தையும் அடக்கினார். அணிசேரா இயக்கத்தில் கினியா இணைந்தது. 1984-ல் டுரேயின் மறைவிற்குப் பின்னர் லான்சான கோண்டி அதிபரானார். இவர் பொருளாதாரக் கொள்கையை மாற்றி அமைத்தார். கினியாவின் சர்வாதிகாரியானார்.

சுதந்திரத்திற்குப் பின்னர் முதல் தேர்தல் 1993-ல் நடந்தது. 2005-ல் பிரான்ஸ் சென்றார், பிரதமர் பிராங்காய்ஸ் லான்செனி பால். இவர் கோண்டியின் நடவடிக்கைகளை எதிர்த்து பிரான்சிலேயே தஞ்சம் புகுந்தார். புதிய பிரதமரை நியமனம் செய்வதில் காலதாமதம் ஏற்பட்டது. அதனால், விலைவாசி உயர்வு, ஊழல், பொருளாதாரச் சீர்கேடு ஆகியவற்றை எதிர்த்து நாடு தழுவிய வேலை நிறுத்தங்கள் நடந்தன.

பலத்த வன்முறைப் போராட்டங்களும் நடந்தன. கொள்ளைகளும், ராணுவத்தினரால் கற்பழிப்புகளும் நடந்தன. அரசு அலுவலகங்கள் எரிக்கப்பட்டன. பெரும் உள்நாட்டுக் கிளர்ச்சி நடந்து கொண்டிருந்தபோது கோண்டியை ராஜினாமா செய்ய வற்புறுத்தினர்.

அண்டை நாடுகளும், மேற்கு நாடுகளின் பொருளாதார அமைப்பும் தலையிட்டன. தொழிற்சங்கங்கள் 5 பெயர்களை சிபாரிசு செய்தது. அதில் இருந்து ஒருவரை கோண்டி பிரதமராக அறிவித்தார்.

23.12.2008-ல் கோண்டி காலமானார். இவருக்குப் பின், கேப்டன் மவுஸா டாடிஸ் கமாரா ராணுவப்புரட்சியின் மூலம் ஆட்சியைக் கைப்பற்றினார். அரசை கலைத்து விட்டு, அனைத்து சட்டம் மற்றும் நடவடிக்கைகளை முடக்கினார்.

கினியா ஒரு குடியரசு நாடு. இது 7 நிர்வாகப் பகுதிகளாகவும், 33 வட்டாரப் பகுதிகளாகவும் பிரிக்கப்பட்டுள்ளது. தலைநகர் கோனாக்ரி சிறப்பு நிர்வாகப் பகுதியாக உள்ளது.



கனிம வளம்: இரும்பு, அலுமினியம். உலகில் அதிகளவில் அலுமினியம் உள்ள நாடு இதுதான்.

விளைபொருட்கள்: வாழை, கரும்பு, எண்ணெய் பனை, காப்பி, நிலக்கடலை, தேயிலை.

ஏற்றுமதிப் பொருட்கள்: காப்பி, தேயிலை, வாழை, எண்ணெய் பனை.

தினதந்தி

செய்திக்கு நன்றி...சிவா அவர்களே

நன்றி தல அறியத்தந்தமைக்கு

தகவலுக்கு நன்றி தல