கோல்கட்டா தீவிபத்து: கேரள நர்சின் கடைசி நிமிடங்கள்

மகா பிரபு · மகா பிரபு Sat Dec 10, 2011 4:59 pm

கோல்கட்டா மருத்துவமனையில் நடந்த தீவிபத்தில் சிக்கி இறந்த கேரளாவைச் சேர்ந்த நர்ஸ் ஒருவர், தனது இறுதி நேரத்தில் குடும்பத்தினருடன் பேசிய தகவல் தற்போது வெளியாகியுள்ளது. கேரள மாநிலம் கோட்டயம் பகுதியைச் சேர்ந்தவர் ரம்யா. கோல்கட்டா அம்ரி மருத்துவமனையில் நர்சாக பணிபுரிந்து வருகிறார். இந்நிலையில், நேற்று அதிகாலை தனது வீட்டிற்கு போன் செய்த ரம்யா, மருத்துவமனை முழுவதும் கரும்புகை சூழ்ந்துள்ளதாகவும், தன்னால் சுவாசிக்க முடியவில்லை எனவும் தாய் உஷாவிடம் தெரிவித்துள்ளார். அவர் பேசிக்கொண்டு இருந்த போது போன் துண்டிக்கப்பட்டுள்ளது. எனினும் தனது மகள் தனது இறுதிப்பேச்சை தன்னிடம் பேசியுள்ளார் என்பதை உஷா அப்போது உணரவில்லை. மருத்துவமனை தீவிபத்து குறித்து டி.வி.,யில் செய்திகள் வெளியான போதே தனது மகளுக்கு ஏற்பட்ட கதி குறித்து உஷா உணர்ந்துள்ளார். பின்னர் கோல்கட்டாவைச் சேர்ந்த ராணுவ நர்ஸ் ஒருவர் ரம்யா தீவிபத்தில் மரணமடைந்தது குறித்து தகவல் தெரிவித்துள்ளார். இச்சம்பவம் அப்பகுதியில் சோகத்தை ஏற்படுத்தியுள்ளது.

நன்றி தினமலர்