அச்சம் தவிர்!

‘‘இறைவா, மரணத்தின் வேதனையிலிருந்தும் மண்ணறையின் வேதனையிலிருந்தும்
எங்களைப் பாதுகாப்பாயாக.’’ (நபிமொழி) மரணத்தைக் கண்டு அஞ்சாத மனிதர்கள் நம்மில் வெகு சிலரே. ‘இறந்து விடுவோம்’ என்ற அச்சத்தாலேயே இறந்துபோனவர்களும் உண்டு.இது மனிதர்களின் பொதுவான பலவீனம். இந்த மரண பயத்தை வெல்ல என்ன வழி?இறைவன் கூறும் தூய வழியில், அவனுடைய வேதம் காட்டும் நேரிய பாதையில், நம் வாழ்க்கையை அமைத்துக்கொண்டால் இந்த ‘மரண பயம்’ நம்முன் மண்டியிடும்.‘இறைவழியில் உயிர்நீத்தல் மிகச் சிறப்புக்குரிய செயல்’ எனும் எண்ணம் நம் ஆழ்மனங்களில் பதிந்துவிடும்போது மரண பயம் அங்கு எட்டிக்கூடப் பார்ப்பதில்லை.
அச்சம் நீங்கும்போது புதியதோர் ஆற்றலும் தெம்பும் அங்கு தோன்றுகின்றன. ஆகவே மரணத்தைக் கண்டு வீணாக அஞ்சத் தேவையில்லை. அது வரும்போது வந்தே தீரும். ‘‘நீங்கள் எங்கிருந்தபோதும் உங்களை மரணம் அடைந்தே தீரும்’’ என்று அறுதியிட்டுக் கூறும் குர்ஆன், ‘‘ஒவ்வோர் உயிரும் மரணத்தைச் சுவைத்தே தீரும்’’ (குர்ஆன் 31: 35) என்றும் அழுத்தமாகக் குறிப்பிடுகிறது.

இறைவழியில் செயலாற்றிக் கொண்டிருக்கும்போது மரணம் வந்து விட்டால் அது மாபெரும் வெற்றியையும் ஈட்டித் தரும்.
இறைவழியில் உயிர் இழந்தவர்களை ‘இறந்தவர்கள்’ என்று கூறுவது சரியன்று. அவர்களை உயிருள்ளவர்களாகவே கருதவேண்டும். இறைவனின் பார்வையில் அவர்கள் மிகச் சிறந்த கண்ணியமும் உயர்வும் பெற்றவர்கள் ஆவர்.இப்படிப்பட்ட மரணம், ஆயிரம் வாழ்வுகளைவிட அதிக மதிப்பு வாய்ந்தது. எனவே, இறைவழியில் செயலாற்றும்போது ஏற்படும் மரணம்ஒருதோல்வியல்ல; ஆபத்தின் மறுபெயரும் அல்ல.
‘மறுமை’ எனும் ஊரின் நுழைவாயில்தான் மரணம். மறுவுலகப் பேறுகளையும் சிறப்புகளையும் பெற்றுத்தரும் வகையில் நம் மரணம் அமைந்துவிட்டால் அதைவிடச் சிறப்பான வெற்றி வேறில்லை. இதற்கு மாறாக, இம்மையின் குறுகிய லாபங்களைப் பெறுவதிலேயே குறியாக இருந்து, காலங்களை வீணாக்கிவிட்ட நிலையில், மரணம் நம்மை அணுகிவிட்டால் அதைவிடப் பெரிய இழப்பு வேறில்லை. ஆகவே, ‘இறைவழியில் மரணம்’ என்பதே நம் இலட்சியமாக இருக்கட்டும்! ‘மறுமையில் வெற்றி’ என்பதே நம் நோக்கமாக இருக்கட்டும்!
&சிராஜுல் ஹஸன்

தினகரன்