மதுரையில் பீதியை கிளப்பும் வெடிகுண்டுகள்

மேலூர் : மதுரையில் நேற்று, பயணிகளுடன் சென்ற அரசு டவுன் பஸ்சில், மதியம் 12 மணிக்கு வெடிக்குமாறு, "செட்' செய்யப்பட்டிருந்த டிபன் பாக்ஸ் வெடி குண்டு கண்டெடுக்கப்பட்டது. இது டம்மியா, உண்மையானதா என உறுதி செய்யப்படாத நிலையில், அதை, வெடிகுண்டு தடுப்புப் பிரிவு போலீசார், செயலிழக்கச் செய்தனர்.

மதுரை பெரியார் பஸ் ஸ்டாண்டில் இருந்து, திருவாதவூருக்கு, டி.என்.58 -1644 எண் கொண்ட அரசு டவுன் பஸ், காலை 6 மணிக்கு சென்றது. பின், மதுரையை நோக்கி 7.20க்கு பயணிகளுடன் திரும்பிய போது, கண்டக்டர் விருமாண்டியின் காலில், நீல நிற பிளாஸ்டிக் பை தட்டியது. அதை பிரித்துப் பார்த்த போது, மின் ஒயர்கள் இணைக்கப்பட்ட கடிகாரம் இருந்துள்ளது. அதற்குள் பஸ், திருவாதவூர் இலங்கை அகதிகள் முகாம் வந்து சேர்ந்தது.

அங்கு பஸ்சில் ஏறிய அகதி நிஷாந்தனிடம், 28, "இந்த பிளாஸ்டிக் பையை கீழே போட்டு விட்டு வா' என, விருமாண்டி கூறினார். இதைத் தொடர்ந்து, முகாம் எதிரில் உள்ள முக்கம்பட்டி கண்மாய் கரையில் வீசிவிட்டு நிஷாந்தன், பஸ்சில் பெரியார் பஸ் ஸ்டாண்டிற்கு வந்து சேர்ந்தார்.

இதுகுறித்த தகவலை, முகாமில் உள்ளவர்கள், மேலூர் இன்ஸ்பெக்டர் மாடசாமிக்குத் தெரிவித்தனர். இதைத் தொடர்ந்து, கண்டக்டர் விருமாண்டி, நிஷாந்தனிடம் போலீசார் விசாரித்தனர். பின், கண்மாய் கரையில் கிடந்த வெடிகுண்டை, நிபுணர்கள் செயலிழக்கச் செய்தனர்.

"செட்' செய்தது எப்படி? : மதியம் 12 மணிக்கு வெடிக்குமாறு, அது, "செட்' செய்யப்பட்டிருந்தது. இரண்டு சுவிட்சுகள் மூலம் ஒயர் இணைக்கப்பட்டு, ஸ்பிரிங் மூலம் வெப்பம் ஏற்படுத்தி வெடிக்குமாறு வடிவமைக்கப்பட்டிருந்தது. இதற்காக, நான்கு பேட்டரிகள் இணைக்கப்பட்டிருந்தன. ஏ.டி.எஸ்.பி., தங்கராஜ், இன்ஸ்பெக்டர் மாடசாமி, எஸ்.ஐ., ராணி மற்றும் வெடி குண்டு நிபுணர்கள், ஸ்பெஷல் பிராஞ்ச் போலீசார் ஆகியோர், சம்பவ இடத்தில் ஆய்வு மேற்கொண்டனர். ஒத்தக்கடை ஸ்டேஷனில் விருமாண்டி, நிஷாந்தனிடம் எஸ்.பி., அஸ்ரா கர்க் விசாரணை நடத்தினார். சிறப்பு புலனாய்வுப் பிரிவு போலீசாரும் விசாரிக்கின்றனர்.

மீண்டும் அச்சுறுத்தல்? : அகதிகள் முகாமின் பின்புறமுள்ள ஓவா மலையில் தான், இமாம் அலி கூட்டாளிகள், முதன் முதலில் வெடி குண்டு வெடித்து சோதனை செய்தனர். அதைத் தொடர்ந்து, கோவை குண்டு வெடிப்பு சம்பவம் நடைபெற்றது. சமீபத்தில் திருமங்கலத்தில் அத்வானி பாதையில், பைப் வெடிகுண்டு சிக்கியது. தற்போது, இதே ஓவா மலை அருகில், இந்த வெடிகுண்டு சிக்கி உள்ளது. இவ்விவகாரம், போலீசாரை அதிர்ச்சியடைய வைத்துள்ளது.

பாபர் மசூதி இடிப்பு தினத்தை ஒட்டி கார், வேன் போன்ற வாகனங்களில் பலத்த சோதனை மேற்கொண்டவர்கள், அரசு பஸ்சை சோதனையிடாமல் இருந்ததும், பயங்கரவாதிகளுக்கு வசதியாக இருந்திருக்கக் கூடும். இரு மாதங்களுக்கு முன் இதே போல், புதூர் டிப்போவில், அரசு பஸ்சில், டிபன் பாக்ஸ் வெடிகுண்டு கண்டெடுக்கப்பட்டது.

http://www.dinamalar.com/News_Detail.asp?Id=363371