திருவண்ணாமலையில் மகாதேரோட்டம் ஆயிரக்கணக்கான பக்தர்கள் குவிந்தனர்; கார்த்திகை தீப திருவிழா

திருவண்ணாமலை, டிச.5-




திருவண்ணாமலை அருணாசலேஸ்வரர் கோவிலில் கார்த்திகை தீப திருவிழா 29-ந்தேதி கொடியேற்றத்துடன் தொடங்கி நடந்து வருகிறது. தினமும் காலை-மாலையில் சாமி வீதி உலா நடைபெற்று வருகிறது. நேற்று சாமி அம்மன், 63 நாயன்மார்கள் வீதி உலா நடந்தது. இரவு வெள்ளி ரத தேரோட்டம் நடந்தது. கார்த்திகை தீப திருவிழாவின் 7-ம் நாளான இன்று காலை மகா தேரோட்டம் நடந்தது.

அதிகாலை பஞ்ச மூர்த்திகளுக்கு சிறப்பு அபிஷேகம் செய்து மரத் தேரில் கொண்டு வந்து பூஜை செய்தனர். 7.20 மணிக்கு விநாயகர் தேர் இழுக்கப்பட்டது. ஆயிரக்கணக்கான பக்தர்கள் தேரை வடம் பிடித்து இழுத்தனர். நான்கு மாடவீதிகளில் தேர் வலம் வந்தது. விநாயகர் தேர் நிலைக்கு வந்ததும் முருகர் தேரோட்டம் நடந்தது. இந்த தேர் மதியம் நிலைக்கு வந்ததும் சாமியின் பெரிய தேரோட்டம் நடந்தது. பக்தர்கள் தேரை வடம் இழுத்து சென்றனர்.

மாடவீதிகளில் பக்தர்கள் கூட்டம் அலை மோதியது. அப்போது அண்ணாமலைக்கு அரோகா என்ற பக்தி கோஷம் எங்கும் எதிரொலித்தது. பெரிய மகாதேர் நிலைக்கு வர இரவாகி விடும். அதன்பின் அம்மன் தேர் புறப்படும். இந்த தேரை பெண்கள் மட்டுமே வடம் பிடித்து இழுத்து செல்வார்கள் என்பது குறிப்பிடத்தக்கது. அம்மன் தேர் புறப்படும் அதன் பின்னே சண்டிகேஸ்வரர் தேர் வரும்.

குழந்தை வரம் வேண்டிய தம்பதிகள் வேண்டுதல் நிறைவேறியதும் கரும்பு தொட்டிலில் குழந்தையை வைத்து மாட வீதிகளில் வலம் வருவார்கள். இன்று மகாதேரோட்டத்தின்போது பல தம்பதிகள் இதுபோல் கரும்பு தொட்டிலில் தங்களது குழந்தைகளை வைத்து மாட வீதிகளில் சுற்றி வந்து நேர்த்தி கடனை நிவர்த்தி செய்தனர்.

தேரோட்டத்தையொட்டி பலத்த போலீஸ் போடப்பட்டு இருந்தது. தேரை இழுக்கும் பக்தர்களை போலீசார் ஒழுங்குப்படுத்தினர். மேலும் மாட வீதிகளில் தீவிர கண்காணிப்பு பணிகளிலும் ஈடுபட்டனர்.