கிராமங்களில் கொட்டப்படும் மருத்துவ கழிவுகள்

**இளமாறன்** · **இளமாறன்** Sat Dec 03, 2011 1:59 pm

சூலூர்: சுகாதாரத்தை கடைபிடிக்க மக்களை வலியுறுத்தும் தனியார் மருத்துவமனைகள், கோவை புறநகர் பகுதியில் உள்ள கிராமங்களில் மக்களை பாதிக்கும் வகையில் மருத்துவக்கழிவுகளை இரவு நேரங்களில் கொட்டுகின்றன. இதனால் சுற்றுச்சூழல் கடுமையாக பாதிக்கப்பட்டு, நோய் பரவும் அபாயம் ஏற்பட்டுள்ளது.

கோவை மாநகராட்சியை ஒட்டியுள்ள வெள்ளானைப்பட்டி, செரயாம்பாளையம் மற்றும் பூராண்டாம்பாளையம் கிராமங்களில் நீர்நிலைகள் மற்றும் ரோட்டின் ஓரத்தில் மருத்துவக்கழிவுகள், கடந்த சில மாதங்களாக கொட்டப்படுகின்றன. இக்கிராமங்களுக்கு நள்ளிரவு நேரங்களில் வரும் தனியார் மருத்துவமனை வாகனங்கள், கேன்டீன் கழிவுகள் மற்றும் மருத்துவக்கழிவுகளை கொட்டிச்செல்வதாக கிராம மக்கள் புகார் தெரிவித்துள்ளனர். மருத்துவமனைகளில் பயன்படுத்திய ஊசி, ஆபரேஷனுக்கு பயன்படுத்திய கத்தி, கை உறை, மாஸ்க், நோயாளிகள் அணிந்திருந்த ரத்தம் உறைந்த துணிகள், காலி குளுக்கோஸ் பாட்டில்கள் உள்ளிட்ட பொருட்கள், செரயாம்பாளையத்தில் இருந்து பூராண்டாம்பாளையம் செல்லும் ரோட்டில் மலை போல் கொட்டப்பட்டுள்ளன. கேன்டீன் கழிவுகள், ரத்தம் உறைந்த நிலையில் உள்ள துணிகள், ஆபரேஷன் செய்து அகற்றப்பட்ட மனித உறுப்புக்கள் மீது ஈக்கள் மொய்க்கின்றன. நாய்கள் கழிவுகளை கிளறி ரோட்டில் இழுத்து போடுகின்றன. மழைக்காலம் என்பதால் கடும் துர்நாற்றம் வீசுகிறது. அப்பகுதிகளை கடந்து செல்லும் மக்கள் மூக்கை பிடித்தவாறே செல்ல வேண்டி உள்ளது. இந்த கழிவுகளால் கிராமங்களில் சுற்றுச்சூழல் சுகாதாரம் பாதிக்கப்பட்டு, நோய் பரவும் அபாயம் உள்ளது. ஆடு, மாடுகள் கழிவுகளை தின்று நோய் தாக்குதலுக்கு உள்ளாகி உள்ளன.
பூராண்டாம்பாளையத்தை சேர்ந்த விவசாயி ராஜூ கூறியதாவது: கடந்த சில மாதங்களாக செரயாம்பாளையம், பூராண்டாம்பாளையம் சுற்றுவட்டாரப்பகுதி விளை நிலங்களில் தனியார் மருத்துவமனை கழிவுகள், லாரி, லாரியாக கொண்டு வந்து கொட்டப்படுகின்றன. பகலில் பலர் ஆடு,மாடுகள் மேய்ப்பதால் யாரும் வருவதில்லை. நள்ளிரவு நேரத்தில் வந்து, கண்ட இடங்களில் கொட்டிவிடுகின்றனர். இதனால் ஆடு, மாடு மேய்க்க முடிவதில்லை.

காற்றில் பறக்கும் பிளாஸ்டிக் பொருட்கள் மேய்ச்சல் நிலங்களில் பரவிக்கிடக்கின்றன. ஊசிகள், சிறிய கத்திகளை மாடுகள் தின்று விடுகின்றன. இதனால் ஆடு, மாடுகள் கடுமையாக பாதிக்கப்படுகின்றன. ஊராட்சி நிர்வாகத்திடம் பல முறை முறையிட்டும் எந்த நடவடிக்கையும் இல்லை. மருத்துவக்கழிவுகள், கோழிக்கழிவுகள், செப்டிக் டேங்க் கழிவுகள் மற்றும் பவுண்டரி கழிவுகளால் கிராமத்தின் சுற்றுச்சூழல் கடுமையாக பாதிக்கப்பட்டுள்ளது. இவ்வாறு, அவர் தெரிவித்தார்.

கோவை நகரின் சுற்றுச்சூழலை மேம்படுத்த
தன்னார்வ தொண்டு நிறுவனங்கள் தீவிர முயற்சி எடுத்து வருகின்றன. மக்கள் பின்பற்ற வேண்டிய சுகாதாரம் குறித்து விழிப்புணர்வு ஏற்படுத்த வேண்டிய மருத்துவமனை நிர்வாகங்கள், நள்ளிரவு நேரங்களில் சுகாதாரத்தை குழிதோண்டி புதைக்கும் வகையில் மருத்துவக்கழிவுகளை கிராமங்களில் மூட்டை, மூட்டையாக கொட்டி வருவது மனிதநேயமற்ற செயல். இது போன்ற செயல்களில் ஈடுபடும் மருத்துவமனை நிர்வாகங்கள் மீது, மாவட்ட நிர்வாகம் கடும் நடவடிக்கை எடுக்க வேண்டும்.
தினமலர்