ஜெயலலிதா மீது ஏன் இன்னும் எப்ஐஆர் போடவில்லை: மு.க.ஸ்டாலின்

**இளமாறன்** · **இளமாறன்** Sat Dec 03, 2011 2:22 pm

சிறுதாவூரில் தலித்துக்களின் நிலத்தையும், கொடநாடு எஸ்டேட்டில் பொதுமக்களின் நிலத்தையும் ஆக்கிரமித்துள்ள முதல் அமைச்சர் ஜெயலலிதா மீது நிலஅபரிப்பு வழக்கின் கீழ், காவல்துறை நடவடிக்கை எடுக்க வேண்டும் என்று டிஜிபியிடம் திமுக பொருளாளர் மு.க.ஸ்டாலின் புகார் அளித்துள்ளார்.

திமுக பொருளாளர் மு.க.ஸ்டாலின் இன்று (02.12.2011) முதல் அமைச்சர் ஜெயலலிதா மீது டிஜிபி அலுவலகத்தில் புகார் அளித்தார். அலுவலகத்தில் டிஜிபி இல்லாததால், நிர்வாக பிரிவு ஏடிஜிபி டிகே.ராஜேந்திரனிடம் அளித்த அந்த புகார் தொடர்பாக பின்னர் செய்தியாளர்களிடம் பேசினார்.

அப்போது அவர் கூறுகையில், அதிமுக அரசு தம் மீது தொடர்ந்துள்ள பொய் வழக்கு தொடர்பாக விளக்கம் அளித்ததாக கூறினார். சிறுதாவூரில் தலித்துக்களின் நிலத்தை, ஜெயலலிதா ஆக்கிரமித்துள்ளதால் அவர் மீது நடவடிக்கை எடுக்க வேண்டும் என்று காவல்துறை டிஜிபியிடம் வலியுறுத்தியதாகவும் அவர் கூறினார். இதேபோல் நீலகிரி மாவட்டம் மலைப்பகுதியில் உள்ள கொடநாடு எஸ்டேட்டில் பொதுமக்களுக்கான பாதையை மறித்து நிலம் ஆக்கிரமிக்கப்பட்டுள்ளதால், அதன் மீது விசாரணை நடத்தி முதல் அமைச்சர் ஜெயலலிதா மீது நிலஅபகரிப்பு வழக்கின் கீழ், காவல்துறை நடவடிக்கை எடுக்க வேண்டும் என்றும், புகார் அளித்திருப்பதாக மு.க.ஸ்டாலின் கூறினார்.

மேலும் அவர் பேசுகையில், நான் கொடுத்திருக்கக் கூடிய புகார் என்னவென்று கேட்டால், நிலஅபகரிப்பு என்று சொன்னால், கொடநாட்டை ஜெயலலிதா தனது பினாமி மூலமாக ஆக்கிரமித்துள்ளார். இதுதான் உண்மையான நிலஅபகரிப்பு. இதேபோல சிறுதாவூர். தலித் மக்கள் வாழ்ந்துகொண்டிருக்கக் கூடிய அந்தப் பகுதியை ஆக்கிரமித்துக்கொண்டு பினாமி பெயரிலே, அங்கேபோய் அடிக்கடி ஓய்வு எடுக்கிறாரே அம்மையார் ஜெயலலிதா அவர்கள். அதுதான் உள்ளபடியே நிலஅபரிப்பு. எனவே நான் இந்தப் புகாரை தருகிறேன். அவர் மீது ஏன் இன்னும் எப்ஐஆர் போடவில்லை. அவர் மீது உடனடியாக எப்ஐஆர் போட வேண்டும் என்றுதான் காவல்துறையிடம் என்னுடைய கோரிக்கையை எடுத்து வைத்திருக்கிறேன் என்றார்.

நக்கீரன்