கள்ளக்காதலை கைவிட மறுத்ததால் மனைவியின் தலையை துண்டித்து ஊர்வலமாக வந்த கணவன்

by **சிவா** Fri Dec 02, 2011 9:13 am

இடைப்பாடி, டிச.2- கள்ளக்காதலை கைவிட மறுத்த மனைவியின் தலையை துண்டித்து ஊர்வலமாக வந்து கணவன் போலீசில் சரண் அடைந்தார்.

கணவன்-மனைவி

சேலம் மாவட்டம் இடைப்பாடி சின்னமணலி பன்னியான்டி தெருவை சேர்ந்தவர் ராஜா(வயது41). இவரது மனைவி சரோஜா (38). இவர்களுக்கு கோபால்(21) என்ற மகனும், மல்லிகா, மகாலட்சுமி, மகேஷ் என்ற 3 மகள்களும் உள்ளனர். இவர்களில் மல்லிகாவுக்கு திருமணம் ஆகிவிட்டது.

கள்ளக்காதல்

ராஜா சீப்பு, கண்ணாடிகளை விற்பதற்காக ஈரோட்டில் உள்ள ஒரு மொத்த வியாபாரியிடம் வாங்குவார். இதற்காக அங்கு அடிக்கடி மனைவியுடன் அவர் சென்று வருவார். அப்போது அந்த கடைக்காரருக்கும், சரோஜாவுக்கும் இடையே பழக்கம் ஏற்பட்டது. இந்த பழக்கம் நாளடைவில் கள்ளக்காதலாக மாறியது.

அந்த கடைக்காரர் அவ்வப்போது இடைப்பாடிக்கு வந்து சரோஜாவுடன் உல்லாசமாக இருந்துவிட்டு செல்வார். சமீபத்தில் இதை ராஜா நேரில் பாÖத்து விட்டார். உடனே மனைவியை கண்டித்தார். ஆனால் சரோஜா அதை பொருட்படுத்தவில்லை.

இந்த நிலையில் நேற்றுமுன்தினம் அந்த கடைக்காரர் சரோஜாவுடன் உல்லாசமாக இருந்ததை ராஜா நேரில் பார்த்துவிட்டார். இதனால் ஆத்திரம் அடைந்த அவர் மனைவி சரோஜாவை கடுமையாக எச்சரித்தார். அப்போது சரோஜா கணவனை பார்த்து விஷம் வைத்து உன்னை கொன்றுவிடுவேன் என்றார். அதற்கு ராஜா "நீ என்னை கொல்வதற்கு முன்பு உன்னை நான் கொன்றுவிடுவேன்`` என்று கூறியபடி வீட்டில் இருந்த சூரிக்கத்தியை எடுத்து சரோஜாவை சரமாரியாக வெட்டினார்.

இதை சற்றும் எதிர்பார்க்காத சரோஜா அலறி துடித்தார். ஆனாலும் ராஜா விடாமல் சரோஜா கழுத்தில் வெட்டி தலையை தனியாக துண்டித்தார்.

துண்டித்த தலையுடன் ஊர்வலம்

பின்னர் ராஜா மனைவியின் தலையை தோளில் வைத்துக்கொண்டு வீட்டில் இருந்து போலீஸ் நிலையத்துக்கு நடந்து வந்தார். ரத்தம் சொட்ட சொட்ட அவர் மனைவி தலையுடன் வருவதை ரோட்டில் வந்தவர்கள் பார்த்து பயந்து ஓட்டம் பிடித்தனர்.

அவர் ஒரு கிலோ மீட்டர் தூரம் நடந்து வந்து போலீஸ் நிலையத்துக்குள் சென்று "என் மனைவியை கொன்று விட்டேன். அவள் தலையை கொண்டு வந்து உள்ளேன்'' என்று கூறி தலையை அங்கு வைத்து கத்தியையும் ஒப்படைத்து சரண் அடைந்தார்.

மனைவி தலையை துண்டித்து கொண்டு ஒருவர் போலீஸ் நிலையம் வந்திருப்பதாக பரவிய தகவலை கேள்விப்பட்டதும் போலீஸ் நிலையத்துக்கு மக்கள் திரண்டு வந்தனர்.

ராஜாவை போலீசார் கைது செய்தனர். பின்னர் அவர் கோர்ட்டில் ஆஜர்படுத்தப்பட்டு காவலில் வைக்கப்பட்டார்.

தினதந்தி