நாளை 2-வது போட்டி:இந்தியாவின் வெற்றி தொடருமா?

**இளமாறன்** · **இளமாறன்** Fri Dec 02, 2011 1:23 am

விசாகப்பட்டனம்,டிச. 1-

இந்தியாவில் சுற்றுப் பயணம் செய்து விளையாடி வரும் வெஸ்ட் இண்டீசுக்கு எதிரான 3 டெஸ்ட் போட்டிக் கொண்ட தொடரை இந்தியா 2-0 என்ற கணக்கில் கைப்பற்றியது.

5 ஒருநாள் போட்டித் தொடரில் கட்டாக்கில் நடந்த முதல் ஆட்டத்தில் இந்தியா 1 விக்கெட்டில் வெற்றி பெற்றது.

இந்தியா-வெஸ்ட் இண்டீஸ் மோதும் 2-வது ஒருநாள் கிரிக்கெட் போட்டி ஆந்திர மாநிலம் விசாகப்பட்டனத்தில் நாளை (வெள்ளிக்கிழமை) நடக்கிறது. இந்திய அணியின் வெற்றி தொடருமா என்று எதிர்பார்க்கப்படுகிறது. ஏனென்றால் கடந்த போட்டியில் தோல்வியை சந்தித்து இருக்க வேண்டியது. ரோகித் சர்மா, ஜடேஜா மற்றும் கடைசி நேர ஆட்டக்காரர்களால் வெற்றி பெற்றது.

முன்னணி பேட்ஸ் மேன்களின் ஆட்டம் சொதப்பலாக இருந்தது. காம்பீர், கோலி, ரெய்னா ஆகியோர் சரியாக விளையாடவில்லை. பந்துவீச்சை பொறுத்தவரை மிகவும் சிறப்பாக இருந்தது. உமேஷ் யாதவ், வருண் ஆரோன் நன்றாக பந்து வீசினார்கள். அதோடு பேட்டிங் மூலமும் வெற்றிக்கான பங்களிப்பில் இருந்தனர்.

நாளைய போட்டிக்கான இந்திய அணியில் மாற்றம் எதுவும் இருக்காது. முதல் ஆட்டத்தில் போராடி வெற்றி பெற்றதால் ஷேவாக் தலைமையிலான இந்திய அணிக்கு நெருக்கடி இருக்கிறது. அவரது அதிரடியான ஆட்டத்தை ரசிகர்கள் ஆவலுடன் எதிர் பார்க்கின்றனர்.

கடந்த ஆட்டத்தில் மயிரிழையில் தோல்வியை தழுவ விட்ட வெஸ்ட் இண்டீஸ் அணி 2-வது ஆட்டத்திலாவது வெற்றி பெற கடுமையாக போராடும். முதல் போட்டியில் அந்த அணி பேட்டிங்கில் மோசமாக இருந்தாலும். பந்து வீச்சில் திறமையை வெளிப்படுத்தியது.ரஸ்சல், கேமர் ரோச், கேப்டன் டாரன் சேமி ஆகியோரது பந்துவீச்சு நன்றாக இருந்தது.
பேட்டிங்கில் டாரன் பிராவோ, லெண்டில் சிம்மன்ஸ், சாமுவேல்ஸ் நல்ல நிலையில் உள்ளனர். அந்த அணி இந்தியாவுக்கு பதிலடி கொடுக்க ஆவலுடன் காத்திருக்கிறது.

நாளைய ஆட்டமும் பகல்-இரவாக நடக்கிறது. பிற்பகல் 2.30 மணிக்கு தொடங்கும். இந்தப்போட்டி தூர்தர்சன் மற்றும் நியோ கிரிக்கெட் சேனலில் நேரடியாக ஒளிபரப்பு செய்யப்படுகிறது.

இரு அணி வீரர்கள் விவரம்:-இந்தியா: ஷேவாக் (கேப்டன்), பார்த்தீவ் பட்டேல், காம்பீர், வீராட் கோலி, ரோகித்சர்மா, ரெய்னா, ரவிந்திர ஜடேஜா, அஸ்வின், வினய்குமார், வருண்ஆரோன், உமேஷ் யாதவ், மனோஜ் திவாரி, ரகானே, ராகுல் சர்மா, அபிமின்யூ மிதுன்.

வெஸ்ட் இண்டீஸ்: டாரன் சேமி (கேப்டன்), லெண்டில் சிம்மன்ஸ், அட்ரியன் பரத், டாரன் பிராவோ, சாமுவேல்ஸ், போலார்ட், ராம்தின், ரஸ்சல், கேமர் ரோச், ஹயாட், அந்தோவி மார்ட்டின், போவெல் ஹாசன் முகமது, ராம்பால், சுனில் நரீன்.

மாலைமலர்