இன்று முதல் ஒருநாள் போட்டி

இன்று முதல் ஒருநாள் போட்டி

First Published : 29 Nov 2011 02:55:57 AM IST


கட்டாக்கில் திங்கள்கிழமை பயிற்சி மேற்கொண்ட சேவாக், கம்பீர்.
கட்டாக், நவ.28: இந்தியா - மேற்கிந்தியத்தீவுகளுக்கு இடையிலான முதல் ஒருநாள் கிரிக்கெட் போட்டி ஒடிசா மாநிலம் கட்டாக்கில் செவ்வாய்க்கிழமை நடைபெறவுள்ளது.

பகல்- இரவாக நடைபெறும் இப்போட்டி பிற்பகல் 2.30 மணிக்குத் தொடங்குகிறது. தூர்தர்ஷன், நியோ கிரிக்கெட் சேனல்களில் நேரடியாக ஒளிபரப்பாக உள்ளது.

கேப்டன் தோனிக்கு ஓய்வு அளிக்கப்பட்டுள்ளதால், இந்திய அணிக்கு சேவாக் தலைமை ஏற்றுள்ளார். சச்சினுக்கும் ஒருநாள் போட்டியில் இருந்து ஓய்வு அளிக்கப்பட்டுள்ளது.

ஏற்கெனவே நடைபெற்ற டெஸ்ட் போட்டியில் இந்திய அணி 2-0 என்ற கணக்கில் தொடரை வென்றது. இப்போது 5 போட்டிகள் கொண்ட ஒருநாள் போட்டி தொடங்கியுள்ளது. ஒருநாள் போட்டியிலும் இந்திய அணியின் ஆதிக்கம் தொடரும் என்றே எதிர்பார்க்கப்படுகிறது. ஒருநாள் கிரிக்கெட்டில் உலக சாம்பியனான இந்தியாவை எதிர்கொள்வது மேற்கிந்தியத்தீவுகள் அணிக்கு நிச்சயம் சவாலாகவே இருக்கும்.

இந்திய அணியில் கேப்டன் சேவாக், ரஹானேவுடன் இணைந்து தொடக்க வீரராக களம் இறங்குவார். அடுத்து கம்பீர், விராட் கோலி, ரெய்னா, ரோஹித் சர்மா என இந்திய பேட்டிங் வரிசை வலுவாக உள்ளது. பார்தீவ் படேல் விக்கெட் கீப்பராக இருப்பார்.

பந்து வீச்சில் வினய் குமார், உமேஷ் யாதவ், வருண் ஆரோன் ஆகியோர் உள்ளனர். டெஸ்ட் போட்டியில் சிறப்பாக பந்து வீசிய தமிழக வீரர் அஸ்வின் மீது ஒருநாள் போட்டியிலும் எதிர்பார்ப்பு அதிகரித்துள்ளது.

டேரன் சமி தலைமையிலான மேற்கிந்தியத்தீவுகள் அணியில் தொடக்க வீரர் லெண்டல் சிம்மன்ஸ் அணிக்குத் திரும்பியுள்ளது பேட்டிங்கில் பலம் சேர்க்கும். இந்தியாவுக்கு எதிரானடெஸ்ட் போட்டிகளில் இரண்டு சதம் அடித்துள்ள பிராவோ, அனுபவ வீரர் சாமுவேல்ஸ் ஆகியோரும் மேற்கிந்தியத்தீவுகள் அணியில் பேட்டிங் வரிசைக்கு வலு சேர்ப்பார்கள்.

பந்து வீச்சில் ரவி ராம்பால், கேமர் ரோச், பொல்லார்டு, ஆண்ட்ரூ ரசல், கேப்டன் சமி ஆகியோர் சிறப்பான நிலையில் உள்ளனர். எனவே இந்தப் போட்டியில் விறுவிறுப்புக்கு பஞ்சம் இருக்காது.

டிக்கெட்டுகள் தீர்ந்தன: டெஸ்ட் போட்டிகளைப் போல் அல்லாமல், இந்த ஒருநாள் போட்டிக்கான டிக்கெட்டுகள் அனைத்தும் ஏற்கெனவே விற்றுத் தீர்ந்துள்ளன. எனவே மைதானத்தில் ரசிகர்களின் ஆரவாரத்துக்கும் பஞ்சம் இருக்காது. முன்னதாக நடைபெற்ற இந்தியா- மேற்கிந்தியத்தீவுகள் டெஸ்ட் போட்டிகளைப் பார்க்க பெருமளவில் ரசிகர்கள் ஆர்வம் காட்டவில்லை.

அணி விவரம்:

இந்தியா: சேவாக் (கேப்டன்), கம்பீர், கோலி, ரஹானே, ரெய்னா, ஜடேஜா, பார்தீவ் படேல், அஸ்வின், வினய் குமார், உமேஷ் யாதவ், வருண் ஆரோன், ரோஹித் சர்மா, மனோஜ் திவாரி, ராகுல் சர்மா

மேற்கிந்தியத்தீவுகள்: சமி (கேப்டன்), சிம்மன்ஸ், பரத், ஹெயட், சாமுவேல்ஸ், பிராவோ, ராம்தீன், பொல்லார்டு, ரசல், மார்டீன், முகமது, சுநீல், பாவெல், ராம்பால், ரோச்.



கேப்டன் சேவாக்

வீரேந்திர சேவாக் தலைமையில் இந்திய அணி இதுவரை 7 ஒருநாள் போட்டிகளில் விளையாடியுள்ளது. இதில் 4 போட்டிகளில் வெற்றியும், 3 போட்டிகளில் தோல்வியும் அடைந்துள்ளது. உலகக் கோப்பை கிரிக்கெட் போட்டி இறுதி ஆட்டத்தில் பங்கேற்றபின் சேவாக் இப்போதுதான் ஒருநாள் கிரிக்கெட் போட்டியில் பங்கேற்க உள்ளார் என்பதும் குறிப்பிடத்தக்கது.

ஆஸ்திரேலிய தொடரைக் கருத்தில் கொண்டு சச்சின், கேப்டன் தோனி ஆகியோருக்கு ஓய்வு அளிக்கப்பட்டுள்ளது. இதனால் சேவாக் கேப்டன் பொறுப்பை ஏற்றுள்ளார்.



பிரவீண் குமார் இல்லை

இந்திய அணியில் திடீர் பின்னடைவாக வேகப்பந்து வீச்சாளர் பிரவீண் குமார் விலகியுள்ளார். அவரது இடது மார்பில் காயம் ஏற்பட்டுள்ளதால் முதல் 3 ஒருநாள் போட்டியில் பங்கேற்க மாட்டார் என்று தெரிவிக்கப்பட்டுள்ளது. அவருக்கு பதிலான கர்நாடகத்தைச் சேர்ந்த மிதவேகப்பந்து வீச்சாளர் அபிமன்யு மிதுன் அணியில் இடம் பெறவுள்ளார்

தினமணி

கில்லி... கில்லி.... கில்லி ... தகவல்

வெற்றி பெறுவோம் ஒரு நாள் தொடரிலும்...