மதுரை அருகே பயங்கரம்: மனைவி, குழந்தைகளை கொன்று அரிசி மில் அதிபர் தற்கொலை

மதுரை அருகே கணவன், மனைவி, குழந்தைகள் உள்பட 4 பேர் கருகி பலியான சம்பவத்தில் திடுக்கிடும் திருப்பமாக, குடும்பத்தினரை விஷம் வைத்துக் கொன்று அரிசி மில் அதிபர் தீவைத்து தற்கொலை செய்து கொண்டாரா என்பது பற்றி போலீசார் விசாரித்து வருகிறார்கள்.

நள்ளிரவில் திடீர் `தீ'

மதுரை மாவட்டம் திருமங்கலம் அருகே உள்ள குதிரைசாரிக்குளத்தை சேர்ந்தவர் ராஜாமணி. இவருடைய மகன் வீரபாண்டி (வயது 37). அரிசி மில் வைத்து நடத்தி வருகிறார்.

இவருடைய மனைவி செல்வி (35). இவர்களுடைய மகள் சர்ஷினி (9); மகன் நந்தகுமார் (4). இவர்கள் இருவரும் திருமங்கலத்தில் உள்ள தனியார் பள்ளியில் 3-ம் வகுப்பும், எல்.கே.ஜி.யும் படித்து வந்தனர்.

இந்தநிலையில் நேற்றுமுன்தினம் இரவு அனைவரும் தூங்கச் சென்று விட்ட நிலையில் நள்ளிரவு சுமார் 1 மணியளவில் வீட்டில் திடீரென்று தீப்பிடித்து எரிந்தது. இதைப்பார்த்ததும் அக்கம்பக்கம் இருந்தவர்கள் விரைந்து வந்து தீயை அணைக்க முயன்றனர்.

வீட்டுக்குள் 4 பேர் பிணம்

இதுகுறித்து தீயணைப்பு படையினருக்கும் தகவல் தெரிவித்தனர். உடனே அவர்கள் விரைந்து வந்து தீயை அணைத்து வீட்டுக்குள் சென்று பார்த்த போது வீரபாண்டி, அவருடைய மனைவி செல்வி, குழந்தைகள் சர்ஷினி, நந்தகுமார் ஆகிய 4 பேரும் எரிந்து கரிக்கட்டையாக பிணமாக கிடந்தனர்.

நள்ளிரவில் வீடு தீப்பிடித்து எரிந்து குடும்பமே பலியான தகவல் அறிந்து அந்த பகுதியை சேர்ந்தவர்கள் வீரபாண்டி வீடு முன் திரண்டனர். பின்னர் திருமங்கலம் தாலுகா போலீசார் விரைந்து வந்து பிணங்களை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

அரிசி மில்லை ஒட்டியுள்ள இந்த வீட்டில் ஒரே ஒரு அறை மட்டும் உள்ளது. இதனால் அங்கு சமையல் செய்து வந்துள்ளனர். இரவு நேரத்தில் படுத்து தூங்க மட்டும் இந்த அறையை பயன்படுத்தி வந்துள்ளனர்.

தற்கொலை திட்டம்?

இந்தநிலையில் தான் இங்கு தீப்பிடித்து கணவன், மனைவி, குழந்தைகள் என 4 பேர் உடல் கருகி பலியாகி உள்ளனர். வீடு தீப்பிடித்து எரிந்த போது வீட்டுக்குள் இருந்து எந்த அலறல் சத்தமும் கேட்கவில்லை.

எனவே, வீரபாண்டி தன் மனைவி, குழந்தைகளுக்கு விஷம் கொடுத்து கொன்று விட்டு தானும் தற்கொலை செய்து இருக்கலாம் என்று தெரிகிறது. கடன் தொல்லையால் இந்த சம்பவம் நடந்திருக்கலாமா, வேறு காரணம் என்ன என்பது குறித்து போலீசார் தீவிரமாக விசாரணை நடத்தி வருகிறார்கள்.

கியாஸ் சிலிண்டர் சிக்கியது

தீப்பிடித்த வீட்டின் அறையில் இருந்து ஒரு சமையல் கியாஸ் சிலிண்டரை போலீசார் கைப்பற்றினர். அந்த சிலிண்டரின் மேல்புறத்தில் உள்ள வளையத்தின் கீழே ஒரு இடத்தில் வெட்டப்பட்டது போல் துவாரம் காணப்படுகிறது. இது எப்படி ஏற்பட்ட ஓட்டை என்று போலீசார் சந்தேகிக்கிறார்கள்.

மேலும் சமையல் வேலை நடக்காத இந்த அறைக்கு சிலிண்டர் வந்தது எப்படி? குடும்பத்துடன் தற்கொலை செய்து கொள்ளும் திட்டத்தை நிறைவேற்ற வீரபாண்டியே அதை கொண்டு வந்து வைத்து நள்ளிரவில் அரிவாளால் வெட்டி கியாசை கசியச் செய்து தீவைத்தாரா என்பது பற்றியும் போலீசார் விசாரிக்கிறார்கள்.

தினதந்தி