அரசு மருத்துவமனையில் டாக்டர்கள் இல்லை; நோயாளிகளும் இல்லை

சென்னையின் பரபரப்பான சைதாப்பேட்டை பகுதியில், பரபரப்பே இல்லாமல் தூங்கி வழிந்து கொண்டிருக்கிறது, இந்த பகுதி அரசு மருத்துவமனை. மொத்தம் ஒன்பது டாக்டர்கள் இருக்க வேண்டிய இந்த மருத்துவமனையில், இப்போது இரண்டு டாக்டர்கள் தான் உள்ளனர். அந்த இரண்டு டாக்டர்களும், மாலை ஐந்து மணிக்கு மேல் இருப்பது இல்லை. இரவுப் பணியில் டாக்டர்கள் இல்லாததால், 32 படுக்கைகளும் பெரும்பாலும் காலியாக வைக்கப்பட்டுள்ளன.

சென்னை, சைதாப்பேட்டை பனகல் மாளிகை அருகே, இந்த அரசு மருத்துவமனை உள்ளது. முதலில், மருத்துவக் கல்வி இயக்ககத்துக்கு உட்பட்ட ராயப்பேட்டை அரசு மருத்துவமனை நிர்வாகத்தின் கீழ், இது இயங்கி வந்தது. கடந்த சில மாதங்களுக்கு முன், மருத்துவ ஊரக சேவைகள் இயக்ககத்தின் (டி.எம்.எஸ்.,) கீழ் கொண்டு வரப்பட்டுள்ளது.

500 வெளி நோயாளிகள் : குடிசைப் பகுதிகள் உட்பட அப்பகுதியில், 50 ஆயிரத்துக்கும் மேற்பட்ட மக்களுக்கு இந்த மருத்துவமனை மிகவும் பயனுள்ளதாக இருந்து வந்தது. இங்கு, ஒன்பது டாக்டர், 12 செவிலியர், 15 மருத்துவ ஊழியர் பணி இடங்கள் உள்ளன. அவசர சிகிச்சைப் பிரிவு, எக்ஸ் ரே பிரிவு மற்றும் வெளிநோயாளி பிரிவு உள்ளது.

காலை நேரத்தில் மட்டும் வெளிநோயாளிகள் பிரிவுக்கு, தினமும் 500 பேர் வருகின்றனர். பகல் ஒரு மணி வரை தான் இந்தக் கூட்டம். அதன் பின், ஆள் ஆரவாரம் எல்லாம் அடங்கி, இந்த இடமே அமைதியாகிறது.

தற்போது, இரண்டு டாக்டர்கள் மட்டும் பணிபுரிகின்றனர். முதல் மாடியில், ஆர்.எம்.ஓ., என்ற பெயர் பலகையுடன் அறை உள்ளது. ஆனால், அங்கு டேபிள், சேர் கூட இல்லை. நீண்ட நாட்களாக ஆர்.எம்.ஓ., பணியிடம் காலியாக உள்ளது. தலைமை மருத்துவருக்கு ஓர் அறை உள்ளது. ஆனால், பல மாதங்களாக தலைமை மருத்துவரும் இல்லை. அருகில் மருத்துவமனை அலுவலகம் பூட்டிக் கிடந்தது. இது குறித்து அந்த பகுதியில் வசிக்கும் ஒருவரிடம் கேட்ட போது, ""அலுவலகப் பணிக்காக ஒருவர் உள்ளார். ஆனால், அவர் நினைத்த நேரத்தில் வருவார்; நினைத்த நேரத்துக்கு செல்வார். அவரை கேள்வி கேட்பாரில்லை,'' என்றார்.

எல்லா படுக்கைகளும் வெறிச் : மொத்தம் 32 படுக்கைகள் உள்ளன. ஆனால், எல்லா படுக்கைகளும் காலியாக உள்ளன. இது பற்றி, செவிலியர் ஒருவரிடம் கேட்ட போது, ""இரவு நேரப் பணியில் டாக்டர்கள் இல்லாததால், இந்த படுக்கைகளில் நோயாளிகளை சேர்ப்பதில்லை,'' என்றார்.

"எக்ஸ் ரே' பிரிவு மதியம் 1 மணிக்கு பூட்டிக் கிடந்தது. அதுபற்றி விசாரித்த போது, ""காலை நேரங்களில் இயங்கும். மின் வெட்டு என்று சொல்லி அவ்வப்போது பூட்டிவிடுகின்றனர்,'' என்றனர்.

மருத்துவமனை அவலம் குறித்து, அப்பகுதிவாசி கண்ணன் கூறியதாவது: கையில் 500 ரூபாய் இருந்தால் தான், தனியார் மருத்துவமனைக்குச் செல்ல முடியும். இப்பகுதியைச் சுற்றி குடிசைகள் நிறைந்துள்ளன. இந்த மக்களுக்கு அரசு மருத்துவமனை விட்டால் வழியில்லை. மாலை ஐந்து மணிக்கு மேல், அவசர சிகிச்சைக்கு இங்கு வந்தால், டாக்டர்கள் கிடையாது. இதுகுறித்து முதலமைச்சர் தனிப் பிரிவு, தொகுதி எம்.எல்.ஏ., மேயர் என எல்லாருக்கும் மனு கொடுத்துள்ளோம். இதுவரை விமோசனம் பிறக்கவில்லை. இவ்வாறு அவர் கூறினார்.

கண்ணாடிகள் உடைப்பு : கடந்த சில நாட்களுக்கு முன், இரவு ஒன்பது மணியளவில், காயமடைந்த ஒருவரை அங்குள்ள குடிசைப் பகுதி மக்கள் சிகிச்சைக்காக அழைத்து வந்துள்ளனர். சிகிச்சை அளிக்க டாக்டர் இல்லை என்பதை அறிந்ததும், ஆத்திரத்தில் தகராறு செய்தனர். இதில், மருத்துவமனை ஜன்னல் கண்ணாடிகள் அடித்து நொறுக்கப்பட்டன.

"ஒரு மாதத்தில் சூப்பராக்கப்படும்' : மருத்துவமனையில் டாக்டர் இல்லாதது மற்றும் அடிப்படை சிகிச்சை வசதிகள் இல்லாதது குறித்து, மருத்துவ ஊரக சேவைகள் இயக்குனர் ராஜா கூறியதாவது: கடந்த சில மாதங்களுக்கு முன்னர் தான், இந்த மருத்துவமனை எங்கள் நிர்வாகத்தின் கீழ் வந்துள்ளது. சமீபத்தில் இணை இயக்குனர் ஒருவர் அங்கு சென்று, என்னென்ன தேவை என மதிப்பீடு செய்துள்ளார். ஒரு மாதத்துக்குள் டாக்டர்கள் நியமிக்கப்படுவதோடு, மருத்துவமனைக்கு தேவையான அனைத்து வசதிகளும் செய்யப்பட்டு, சூப்பர் மருத்துவமனையாக்க அரசு நடவடிக்கை எடுக்கும். இவ்வாறு ராஜா கூறினார். அதுவரை மக்களுக்கு நோய் வராமலோ, விபத்து நடக்காமலோ இருக்குமா என்ன? தினமலர்